2 कुरिन्थियो 11 - मंडयाली नंऊँआं नियमतिन्हारे भरोसे रे लायक हूंणे रे कठे चिंता 1 तुस्से दूजेया री ता सुणी ले जेबे स्यों आपणे बारे मन्झ खरी गल्ला बोला ऐं, इधी कठे हांऊँ सोचा कि अगर हांऊँ थोह्ड़ी वेवकुफी री गल्ला करहा, ता तुस्सा हांऊँ सही लैणा। 2 क्यूंकि जिहां परमेसर तुस्सा री फिकर करहा, तिहां हांऊँ भी तुस्सा री फिकर करहा; इधी कठे हांऊँ पवित्र कुआरी साहीं तुस्सा जो मसीह जो देआ जो तुस्सा रा एक ही लाड़ा। 3 पर हांऊँ डरहा कि जिहां सैताने सांपा रे रूपा मन्झ आपणी चलाकी किन्हें पैहली जन्नानी हव्वा बैहकाई, तिहां ईं तुस्सा रे मन तेस्सा सिधाई होर पवित्रता किन्हें तुस्सा जो मसीह री इज्जत करणी चहिए कि केते भ्रस्ट नी किते जाए। 4 अगर कोई तुस्सा वाले आई किन्हें, यीसू रे बारे मन्झ लग ही प्रचार करहे, जेह्ड़ा आस्से यीसू रे बारे मन्झ प्रचार कितेया था; या तुस्सा जो कोई होर आत्मा मिले, जो पवित्र आत्मा ले लग ई जो तुस्सा जो पैहले मिलिरी थी; या होर कोई एह्ड़ी खबर मिले जो तेस खुसी री खबरा ले लग हो जो तुस्से पैहले ग्रहण कितिरी थी, तेबे तुस्से इन्हा झूठे उपदेसा जो बड़ी असानी किन्हें मनी ले। होर एह्ड़ा करी किन्हें तुस्सा ले बौह्त बडी गलती हुई गईरी। पौलूस होर झूठे चुणिरे चेले 5 हांऊँ नी समझ्दा कि, स्यों झूठे चुणिरे चेले मेरे ले बढ़िया ऐं, जो आपणे आपा जो सभी ले महान चुणिरे चेले समझा ऐ। 6 हांऊँ मना कि तिन्हा लोका साहीं बोलणे ग्लाणे मन्झ माहिर नी आ, पर हांऊँ तिन्हा ले ज्यादा ज्ञान रखा आ; बल्की मैं आपणा ज्ञान तिन्हा सारे उपदेसा रे ज्रीए साबित कितिरा। 7 मैं आपणे आपा जो छोटा करी दितेया होर मुफ्ता मन्झ ही तुस्सा जो परमेसरा री खुसी री खबर रा प्रचार कितेया, ताकि तुस्से इज्जत पाओ; क्या एह्ड़ा करी किन्हें मै कुछ पाप कितेया? 8 मैं दूजी कलीसिया रे लोका ले दान ग्रहण कितेया; ताकि हांऊँ मुफ्ता मन्झ तुस्सा री सेऊआ करूं। इधी कठे तुस्से एह्ड़ा मत बोला कि मै कलीसिया रे लोक लुटे। 9 होर जेबे हांऊँ तुस्सा साउगी था, होर मुंजो पैसे री कमी हुई, ता मैं केसी पर भार नी पाया, क्यूंकि विस्वासी लोके, मकीदुनिया ईलाके ले आई किन्हें मेरी कमी पूरी किती। होर मैं केसी गल्ला मन्झ आपणे आपा जो तुस्सा पर बोझ नी बणने दितेया, होर ना आगे बणने देणा। 10 हांऊँ मसीह रे बारे मन्झ तुस्सा जो सच्चाई ही दसां, तिहां ही हांऊँ दसां कि मुंजो गर्व आ कि मैं अखाया ईलाके मन्झ केसी ले पैसे नी लिते। 11 मैं तुस्सा रा पैसा किधियो नी लितेया? क्या इधी कठे कि हांऊँ तुस्सा किन्हें प्यार नी रखदा? परमेसर ये जाणहां कि हांऊँ तुस्सा किन्हें प्यार रखा। 12 बल्की जो हांऊँ करेया करहा, मां तेह्ड़ा ई करदे रैंह्णां; ताकि जो लोक आस्सा री बराबरी करणे रा मौका तोप्हा ऐं, मां तिन्हा जो एस गल्ला री बडयाई नी करणे देऊँ। 13 क्यूंकि एह्ड़े लोक झूठे चुणिरे चेले ऐं, होर धोखा धड़ी करणे वाले, होर मसीह रे चुणिरे चेले हूंणे रा झूठा दावा करहा ऐं। 14 होर ये कुछ हरानी री गल नी ई क्यूंकि सैतान आपु भी ज्योतिमर्य स्वर्गदूत हूंणे रा झूठा दावा करहा। 15 होर अगर सैताना रे सेऊआदार भी धार्मिकता रे सेऊआदार हूंणे रा झूठा दावा करहा ऐं, ता कुछ बड़ी गल नी ई, पर तिन्हारा अंत तिन्हारे कामा रे मताबक हूंणां। मसीह रे कठे पौलुसा रा दुःख सैहणा 16 हांऊँ दबारा याद कुराई करहा, कोई मुंजो नर्क्कला नी समझे; पर अगर तुस्से हांऊँ नर्क्कला ही समझीरा ता एह्ड़ा समझी किन्हें मुंजो अपनाई लऊआ, ताकि मुंजो भी थोहड़ा बडयाई करणे रा मौका मिली जाये। 17 ऐबे ये गल्ला जो हांऊँ निधड़क हुई किन्हें बोल्या करहा, तेहड़ा नी बोलदा लगिरा जिहां प्रभु मेरे ले बुलाणा चाहां, पर नर्क्कले री वजहा ले बोल्या करहा। 18 जेबे कि बौह्त लोक संसारा रे लोका रे मताबक बडयाई करहा ऐं, ता मां भी बडयाई करणी। 19 तुस्से ता आपणे आपा जो समझदार समझे, पर फेरी भी तुस्से बड़ी खुसी किन्हें नर्क्कल्या जो सही ले! 20 क्यूंकि जेबे तुस्सा जो कोई गुलाम बणाई लैहां, या सब कुछ लेई लेया जो तुस्सा वाले हाया, या तुस्सा रा फायदा लैहां ऐं, या आपणे आपा जो तुस्सा ले बडा बणाहां, या तुस्सा रे मुंहा पर चांडा मारहा, ता तुस्से तेसरी सही लैहां ऐं। 21 तुस्सा जो क्या लगहा कि मैं तुस्सा साउगी एह्ड़ा नी कितेया, ता क्या मुंजो सरम आऊणीं चहिए? नी! पर जेस केसी गल्ला मन्झ कोई बडयाई करणे री हिम्मत करहा ता हांऊँ भी नर्क्कल्या मन्झ बोल्या करहा कि हांऊँ भी तिहां बडयाई करणे री हिम्मत करहा। 22 क्या स्यों ईं इब्रानी भासा बोलणे वाल़े? हांऊँ भी इब्रानी आ। क्या स्यों इस्राएल देसा रे लोक ये? हांऊँ भी आ; क्या स्यों अब्राहमा रे बंसा रे ऐं? हांऊँ भी आ। 23 क्या स्यों ईं मसीह रे सेवक ऐं? हांऊँ तिन्हा ले बढ़ी किन्हें आ! हांऊँ पागल आदमी साहीं हुई किन्हें बोल्हा कि मैं तिन्हा ले ज्यादा मैहनत कितिरी; तिन्हा ले ज्यादा जेल्हा मन्झ पाईरा; कई बारी कुटीरा; कई बारी मुंजो मौता रा साम्हणां करणा पईरा। 24 यहूदी अगुवे पांज बारी मुंजो उन्ताली कोड़े मारे। 25 तीन बार मैं बैंता री मार खाध्ही; एक बार पत्थरवाह हुआ; तीन बार मेरा जहाज डुबेया; एक ध्याड़ा होर एक रात मैं समुद्रा मन्झ काटी। 26 बार-बार मुंजो सफर करना पया। कधी दराऊआ मन्झ, कधी खूंखार डाकुआ मन्झ, कधी आपणे देसा रे लोका मन्झ, कधी अन्यजाति लोका मन्झ, कधी सैहरा मन्झ, कधी जंगला मन्झ, कधी समुद्रा रे खतरे मन्झ, कधी झूठे विस्वासी लोका रे खतरे रा सामना करना पया। 27 मैं मैहनत किती होर संघर्स कितेया, होर कई रातीया जागी किन्हें काटी। हांऊँ भूख-प्यासा रहा होर खाणे रे कठे कुछ नी था। होर मैं ठंडा रे ध्याड़े काटीरे, होर मेरे वाले निघे कपड़े नी थे। 28 होर इन्हा सभी मुस्किला रे अलावा हर रोज मुंजो कलीसिया री भलाई री चिन्ता रा बोझ बणी रहा। 29 जेबे कोई कमजोर हूँआ था ता हांऊँ भी आपु जो कमजोर समझा था। मुंजो बौह्त दुःख हुआं था जेबे कोई पाप करहा था। 30 अगर बडयाई करणा जरूरी आ, ता मां आपणी कमजोरी री गल्ला पर करणा। 31 परमेसर, जो यीसू मसीह रा बापू, जो हमेसा बड़ाई रे लायक आ, से जाणहां कि, हांऊँ झूठ नी बोल्दा। 32 जेबे हांऊँ दमिस्क सैहरा मन्झ था तेबे राजा अरितास रे हाकमे मुंजो पकड़णे रे कठे सैहरा पर पैहरा बैठाई रखिरा था। 33 पर मुंजो सैहरा री चार दिवारी रे खोले ले किरडू मन्झ बठ्याली किन्हें हेठ तुआरी दितेया गया, होर हांऊँ हाकमा रे हाथा ले बची निख्ल्या। |
This work is licensed under Creative Commons Attribution-ShareAlike 4.0 License.