2 कुरिन्थियो 10 - मंडयाली नंऊँआं नियम

आत्मिक लड़ाई

¹ हांऊँ सेई पौलुस आ, जेसरे बारे मन्झ लोक बोल्हे कि जेबे हांऊँ तुस्सा रे साम्हणें हुआ ता बोलणे मन्झ फाहूका आ, पर तुस्सा ले दूर हूंणे पर कठोर हुई किन्हें बोला। तुस्सा ले मसीह री नम्रता, होर कोमलता री वजहा ले हांऊँ ये अर्ज करहा।

² कुछ लोक ये बोले कि आस्सा रे जीणे रा ढंग संसारा रे लोका साहीं आ, इधी कठे जेबे हांऊँ तेथी आऊ, ता हांऊँ सोचा कि मुंजो तिन्हा लोका किन्हें कठोर हूंणा पो, जेसरी स्यों उम्मीद रख्हा ऐ। हांऊँ दिला ले चाहां कि मुंजो तुस्सा साउगी एह्ड़ा बर्ताव नी करणा पो।

³ क्यूंकि येह सच्च आ कि आस्से एस संसारा मन्झ रैंहयां ऐं, तेबे भी आस्से आपणे व्रोधीया साउगी संसारा रे लोका साहीं नी लड़दे।

⁴ क्यूंकि आस्सा री लड़ाई रे हथियार एस संसारा रे लोका रे हथियारा साहीं नी ऐं, पर ये गढ़ा जो ढाई देणे रे कठे परमेसरा रे सामर्थी हथियार ऐं।

⁵ एसरे ज्रीए आस्से हर एक व्रोधीया जो, होर हर एक बडयाई करणे वाले जो, जो परमेसरा री पैहचाणा रे व्रोधा मन्झ उठा ईं, तेस जो सट्टी देहें। होर लोको रे विचार जो कैद करी किन्हें तिन्हो मसीह रा हुक्म मनणे वाल़ा बणाई देहां ऐं।

⁶ जेबे तुस्से मसीह रे सभ हुक्मा जो मनणे वाले बणी जाहें, ता आस्से, सभ हुक्म नी मनणे वाल़ेया जो सजा देणे रे कठे त्यार रहे।

पौलुसा रे हक

⁷ तुस्से इन्हा गल्ला जो देख्हा ऐं, जो हाखिया रे साम्हणें हो, अगर केसी रा आपणे गास ये भरोसा हो कि, हांऊँ मसीह रा आ, ता से ये भी दबारा सोची ले कि, जिहां से मसीह रा आ, तिहां ईं आस्से भी मसीह रे ऐं।

⁸ क्यूंकि अगर हांऊँ तेस हका रे बारे मन्झ होर भी गर्व दस्सुं, जो प्रभुए तुस्सा रे विस्वास जो खत्म करणे रे कठे नी, पर तुस्सा जो विस्वासा मन्झ बढ़ने री मदद रे कठे दितिरा। ता एह्ड़ा करणे ले मां सर्मिन्दा नी हूंणां।

⁹ हांऊँ नी चाहंदा कि तुस्सा जो ये लगे कि मैं डराणे रे कठे ये चिठ्ठी लिख्दा लगिरा।

¹⁰ क्यूंकि तुस्सा मन्झ कुछ बोल्हा ऐं कि, “पौलुसा री चिठिया ता सख्त होर ठेस पौहुन्चाणे वाली ई; पर जेबे से आस्सा साउगी आ ता से सरीरा ले कमजोर होर ग्लाणे बोलणे मन्झ बौह्त फाहूका आ।”

¹¹ इधी कठे एह्ड़ा बोलणे वाले जो ये समझणा चहिए कि, जिहां आस्से दूर रही किन्हें चिठिया रे ज्रीए तुस्सा किन्हें गल्ला करहा ऐं, तिहां ईं तुस्सा साउगी रहणे पर आस्सा रे काम भी हूंणे।

पौलुसा रे हका री सीमा

¹² क्यूंकि आस्से तिन्हा कुछ लोका साउगी आपणी तुलना करणे री हिम्मत नी करदे जो आपणे आपा जो बौह्त खास मन्हां ऐं, पर जेबे स्यों आपणे जो दूजे किन्हें नाप्हा ऐं, ये सभ करी किन्हें स्यों ये साबित करहा ऐं कि स्यों कितने नर्क्कले ऐं।

¹³ जो भी हो आस्सा आपणी हदा ले बाहर कधी गर्व नी करदे, बल्की आस्सा तेस हदा तक गर्व करणा जो परमेसरे आस्सा रे कठे तय कितिरा, होर तेस हदा मन्झ तुस्से भी आई गईरे।

¹⁴ क्यूंकि ऐबे तुस्से तेस हदा मन्झ आई गईरे, होर आस्से भी तिन्हा हदा जो पार नी कितेया, जेबे आस्से पैहली बारी तुस्सा वाले मसीह री खुसी री खबर रा प्रचार लेई किन्हें कुरिन्थुस सैहरा मन्झ आये थे।

¹⁵ होर आस्से सीमा ले बाहर होरी री मैहनता पर गर्व नी करदे; बल्की आस्सा जो आस ई कि, जिहां तुस्सा रा विस्वास बढ़दा जाणा तिहां आपणी सीमा मन्झ रेह्न्दे हुये तुस्सा रे ओरे परे रैहणे वाले लोका जो मसीह रे कठे जीती सके।

¹⁶ ताकि आस्से तुस्सा री सीमा ले अगे दूर-दूर जगहा मन्झ भी खुसी री खबर सुणाई सके, होर ये नी कि आस्से होरी री सीमा रे अंदर बणे बणाईरे कामा पर गर्व करहे।

¹⁷ पर जिहां पवित्र सास्त्रा मन्झ लिखिरा कि, जो बडयाई करहे, से प्रभु पर गर्व करहे।

¹⁸ क्यूंकि जो आपणी बड़ाई करहा, से नी, बल्की जेसरी बड़ाई प्रभु करहा, तेस जो ई परमेसर ग्रैहण करहा।