2 कुरिन्थियो 1 - मंडयाली नंऊँआं नियमनमस्कार 1 हांऊँ पौलुसा ये चिठ्ठी तुस्सा रे कठे लिख्दा लगिरा। हांऊँ परमेसरा री इच्छा ले मसीह यीसू रा चुणिरा चेला आ। होर मसीह मन्झ आस्सा रा भाई तिमिथियुस मेरे साउगी आ। हांऊँ ये चिठ्ठी कुरिन्थुस सैहरा रे परमेसरा री कलीसिया रे लोका रे कठे होर सारे अखाया ईलाके रे सब परमेसरा रे पवित्र लोका रे कठे लिखी करहा। 2 हांऊँ प्रार्थना करहा कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे। तस्सली देणे वाल़ा परमेसर 3 आस्सा रे प्रभु यीसू मसीह रा बापू, होर परमेसरा री बड़ाई हो, जो आस्सा पर दया करणे वाल़ा बापू, होर जो हमेसा आस्सो तस्सली देणे वाल़ा परमेसर आ। 4 से आस्सा रे सब दुःखा मन्झ आस्सा जो तस्सली देहां; ताकि आस्से तेस्सा तस्सली री वजहा ले जो परमेसर आस्सा जो देहां, तिन्हा जो भी तस्सली देई सके, जो केसी न केसी वजहा ले दुःखा मन्झ हो। 5 क्यूंकि आस्से जितना ज्यादा मसीह यीसू रे कठे दुःख सैहया करहा ऐं, परमेसरा तेता ले ज्यादा मसीह रे ज्रीए आस्सा जो होर भी तस्सली देआ। 6 आस्से दुःख सैहया करहे, ताकि परमेसर तुस्सा जो तस्सली दे, होर तुस्सा रा उद्धारा करहे। क्यूंकि परमेसर आस्सो तस्सली देआ, इधी कठे तेस तुस्सा जो भी तस्सली देणी। क्यूंकि तुस्से बड़े सबरा साउगी आस्सा साहीं दुःख सहीरा। 7 होर आस्सा री आस तुस्सा रे बारे मन्झ बिल्कुल पक्की ई; क्यूंकि आस्से जाणहां ऐं कि, जिहां तुस्से आस्सा रे दुःखा मन्झ सहभागी हुंहाँ ऐं, तिहां ईं तुस्से तेस तस्सली मन्झ भी सहभागी हो जो परमेसर आस्सा जो देआ। दुःखा ले बचाणा 8 हे भाईयो बैहणो, आस्से चाहां ऐं कि तुस्से आस्सा रे तेस दुःखा रे बारे मन्झ जाणा, जो आसिया रे ईलाके मन्झ आस्सा पर पया। आस्से एह्ड़े भारी बोझा साउगी दभी गईरे थे, जो आस्सा रे सैहणे ले बाहर था, एथी तक कि आस्से मरणे ही वाले थे। 9 जेब्की आस्से आपणे मना मन्झ सोची लईरा था कि, आस्सा रा मरणा पक्का। ये इधी कठे हुआ कि आस्से आपणे आपा पर नी पर परमेसरा पर भरोसा रखे, जो मरिरे जो जिउंदा करहा। 10 परमेसरे ही आस्से एह्ड़ी बडी मौता ले बचाए, होर तेस बचाणें भी; होर आस्सा जो होंसला कि तेस आस्से अगे भी बचान्दे रैंह्णां। 11 होर तुस्से भी मिली जुली किन्हें प्रार्थना रे ज्रीए आस्सा री मदद करहा ऐं, ताकि परमेसर तिन्हा प्रार्थना रे ज्रीए आस्सा पर अनुग्रह करहे। होर एस गल्ला री वजहा ले कई सारे लोक आस्सा रे कठे परमेसरा रा धन्यावाद करणा। अंतरात्मा री सच्चाई 12 आस्से आपणी अंतरात्मा री सच्चाई पर बडयाई करहा ऐं। संसारा मन्झ होर खास करी किन्हें तुस्सा रे बीचा मन्झ आस्सा रा जीवन पवित्र होर सच्चा था, जो परमेसरा री तरफा ले आस्सा जो मिलिरा था। आस्से माह्णुंआं रे ज्ञाना पर भरोसा नी रखेया, बल्कि परमेसरा रे अनुग्रहा पर भरोसा रखेया। 13-14 आस्से तुस्सा जो हमेसा आपणी चिठ्ठीया मन्झ तिन्हा गल्ला जो लिख्हा ऐ, जो तुस्से पढ़ी सको होर समझी सको। भले ही ऐबे तुस्से आस्सो पूरी तरहा नी समझी पाए, पर मुंजो आस ई कि प्रभु यीसू रे दबारा वापस आऊणें रे ध्याड़े तुस्सा इन्हा सभी गल्ला जो पूरी तरहा समझी जाणा, ताकि तेस ध्याड़े तुस्से आस्सा रे कठे गर्वा री वजहा बणा, जिहां कि आस्से तुस्सा रे गर्वा री वजहा ऐं। सफरा री योजना मन्झ बदलाऊ 15 क्यूंकि मुंजो भरोसा आ कि तुस्सा री समझ अधूरी ई, इधी कठे ऐबे हांऊँ चाहां कि हांऊँ सभी ले पैहले तुस्सा वाले आऊँ; ताकि मेरे दो बारी तुस्सा वाले आऊणें ले तुस्सा जो दो गुणी आसीस मिले। 16 हांऊँ सोच्या करहा था कि तुस्सा वाले ले हुई किन्हें हांऊँ मकीदुनिया ईलाके जो जाऊं, होर मकीदुनिया ईलाके ले तुस्सा वाले वापस आऊँ; होर तुस्से मुंजो यहूदिया ईलाके तक सफरा करणे रे समान देई किन्हें मेरी मदद करो। 17 तुस्से पूछदे लगिरे कि मैं आपणी सोच किधियो बदली दिती। क्या तुस्सा जो लगां कि हांऊँ आपणा फैसला लापरवाही किन्हें करहा? क्या तुस्सा जो लगां कि हांऊँ सांसारिक लोका साहीं करणा चाहां जो कुछ गल्ला मन्झ “हां” ता करहे पर सही मन्झ तेता रा मतलब “नांह” हूँआ। 18 जिहां परमेसर सच्चा आ, तिहां ही जो कुछ आस्से तुस्सा किन्हें बोले से हमेसा सच्चा हूँआ। 19 क्यूंकि परमेसरा रा मह्ठा प्रभु यीसू मसीह जेसरे बारे मन्झ हांऊँ, सिलास होर तिमिथियुस प्रचार करहे, से प्रभु यीसू सच्चा आ; तेस मन्झ हां होर नांह दुंहें नी थी, पर तेता मन्झ “हां” ईं “हां” हुई थी। 20 क्यूंकि परमेसरा रे जितने वादे, स्यों सभ मसीह मन्झ हां ई, इधी कठे आस्से आमीन बोल्हा ऐं यानि हां, ताकि आस्सा रे ज्रीए परमेसरा री महिमा हो। 21-22 परमेसर ही आ, जो आस्सा जो मसीह रे कठे तुस्सा साउगी मजबूत बणी रैह्णे मन्झ आस्सा री मदद करहा। परमेसरे आस्सा पर आपणी छाप लगाई किन्हें ब्याने रे रूपा मन्झ आपणी आत्मा आस्सा रे दिला मन्झ रखी किन्हें आस्सा जो आपणे कठे चुणिरा। 23 परमेसरा मेरी एस सच्चाई रा गुआह आ कि हांऊँ तुस्सा किन्हें सच्च बोल्हा। हांऊँ दबारा कुरिन्थुस सैहरा मन्झ इधी कठे नी आया, क्यूंकि हांऊँ तुस्सा जो दुःख नी देणा चांहदा था। 24 एता रा मतलब ये नी कि, आस्से तुस्सा पर एस गल्ला रा हक जताया करहे कि तुस्सा जो केस गल्ला पर विस्वास करणा चहिए। क्यूंकि तुस्से आपणे ही विस्वासा रे ज्रीए मजबूत बणिरे, होर आस्से तुस्सा री ही खुसी रे कठे तुस्सा साउगी काम करणा चाहें। |
This work is licensed under Creative Commons Attribution-ShareAlike 4.0 License.