1 तिमिथियुस 6 - मंडयाली नंऊँआं नियम

मसीह गुलामा रा बर्ताव

¹ जितने विस्वासी लोक गुलाम ऐं, स्यों आपणे-आपणे माल्का जो हर गल्ला मन्झ बड़ी इज्जत दे, ताकि दूजे लोक परमेसरा री होर आस्सा रे उपदेसा री निंदा नी करहे

² होर जिन्हारे माल्क विस्वासी ऐं, स्यों आपणे माल्का जो विस्वासी भाई हूंणे रे नाते होर भी ज्यादा इज्जत दे; बल्की तिन्हारी होर भी ज्यादा सेऊआ करहे। क्यूंकि तिन्हारी सेऊआ रा फायदा उठाणे वाले विस्वासी लोक ऐं, होर जिन्हा ले स्यों मसीह भाई हूंणे रे नाते होर भी प्यार करहे। इन्हा गल्ला जो स्खान्दा रेह, होर लोका किन्हें बोल कि स्यों इन्हा गल्ला जो मन्नेया करहे।

झूठी उपदेस होर पैसे रा लालच

³ अगर कोई गलत उपदेसा जो सखा; होर आस्सा रे प्रभु यीसू मसीह रे दितिरे सही उपदेस होर परमेसरा री भक्ति री बिधिया ले राजी नी हुंदा,

⁴ ता से बौह्त बडयाई करणे वाल़ा बणी गईरा, होर कुछ नी जाणदा। एह्ड़ा माह्णुं जो बेकारा री गल्ला पर होर सब्दा पर लड़ने होर बैहस करणे री ब्मारी ई। एता री वजहा ले हिर्ख, होर झगड़े, होर दूजेया री बदनामी, होर बुरे-बुरे सक पैदा हुंहाँ ऐं।

⁵ एह्ड़े माह्णुंआं हमेसा एक दूजे किन्हें लड़ने मन्झ लगी रैहया, होर तिन्हारी बुद्धि खराब हुई गईरी। होर ऐबे स्यों कधी नी समझी सकदे कि सच्चाई क्या ई। स्यों समझे कि परमेसरा री सेऊआ करणा पैसे कमाणे रा जरिया।

⁶ पर परमेसरा री सेऊआ करणा होर जो कुछ से आस्सा जो देआ तेता मन्झ संतुस्ट रेहणा, येई सभी ले बडी कमाई ई।

⁷ क्यूंकि जेबे आस्से एस संसारा मन्झ जम्मीरे थे ता कुछ लेई किन्हें नी आईरे थे, होर जेबे मरणा तेबे भी कुछ नी लेई जाई सकदे।

⁸ होर अगर आस्सा वाले खाणे होर पैन्ह्णे रे कठे आ, ता एता मन्झ ई संतुस्ट रेहणा चहिए।

⁹ पर जो माह्णुं अमीर बणना चाहें, स्यों असानी किन्हें हर प्रकारा रे पाप करणे री परखणी मन्झ पई जाहें, होर एक जानवरा साहीं फसी जाहें। स्यों नर्क्कले होर खतरनाक कामा जो करणा चाहें, जो पूरी तरहा ले तिन्हारा विनास करी देईं।

¹⁰ क्यूंकि धन रा मोह सभ किस्मा री बुराईया री जड़ ई, जेस धना जो पाणे री कोसिस करदे-करदे कुछ लोक मजे-मजे मसीह रे उपदेसा पर विस्वासा करणा छाडी दे। एता री वजहा ले स्यों लोक कई किस्मा रे दुःख सहन करहे, तेस माह्णुं साहीं जिन्हें हथियारा किन्हें आपणे आपा जो छलनी करी दितिरा हो।

तिमिथियुसा जो निजी बिधिया दसणा

¹¹ पर हे तिमिथियुस, तू जो परमेसरा रा जण आ, तू इन्हा गल्ला ले दूर रेह। हर एक कोसिस कर कि तू धर्मा रे काम करी सके। परमेसरा री भक्ति करणे वाली जिन्दगी जी। मसीह पर विस्वास रख। दूजे लोका किन्हें प्यार कर। मुस्किल हालात मन्झ धीरज रख। होर दूजे लोका ले नम्रता साउगी बर्ताव कर।

¹² एक खरे स्पाही साहीं जो लड़ाई रे टैम कधी हिम्मत नी हारदा, आपणे विस्वासा रे कठे खरी लड़ाई कर, होर अनंत जिन्दगी जो पकड़ी ले, जेसरे कठे तू सादी गईरा था, होर बौह्त लोका रे साम्हणें तैं गुआही दितीरी थी कि तू मसीह पर विस्वास करा।

¹³ परमेसरा जो गुआह मनी किन्हें, जो सभी जो जिन्दगी देहां, होर मसीह यीसू जो भी गुआह मनी किन्हें जिन्हें पुन्तियुस, पिलातुस हाकमा रे साम्हणें सच्च बोलिरा था, हांऊँ तुजो ये हुक्म देहां,

¹⁴ कि तू आस्सा रे प्रभु यीसू मसीह रे दबारा वापस आऊणें रे ध्याड़े तक इन्हा गल्ला जो मनदा रेह, ताकि कोई तेरे पर गलत काम करणे रा दोस नी लगाई सके।

¹⁵ परमेसर जो बढ़ाई रे लायक आ, होर एकमात्र राजा, से राजेया रा राजा, होर प्रभुआ रा प्रभु आ, तेस मसीह जो ठीक टैमा पर जाहिर करणा।

¹⁶ सेई आ जो हमेसा रे कठे जिउंदा, होर जो एह्ड़े तेज प्रयासे मन्झ रैंहयां, जेसरे नजदीक कोई नी आई सकदा, जेस जो केसी माह्णुंऐ ना ता देखिरा, होर ना ता देखी सकदा, तेसरा आदर होर सामर्थ जुग-जुग रहे। आमीन।

अमीर लोका जो बिधिया

¹⁷ एस संसार रे अमीर लोका जो ये आदेस दे कि, स्यों घमंडी नी बणे, होर स्यों धना पर भरोसा नी रखे, जो हमेसा रे कठे नी आ, पर परमेसरा पर ई भरोसा रखे जो आस्सा रे सुखा रे कठे सभ कुछ भरपूरी किन्हें देहां।

¹⁸ होर तिन्हा किन्हें बोला कि स्यों भलाई करहे, होर बौह्त सारे भले काम करहे, होर दूजेया जो जेस भी चीजा री जरूरत हो तेस जो उदारता किन्हें बांडी दे।

¹⁹ अगर स्यों एह्ड़ा करहे ता मानो स्यों आपणे रे कठे स्वर्गा मन्झ धन कठा करी करहे, जो कधी भी नास नी हूंणा। होर तिन्हा जो सच्ची जिन्दगी भी मिलणी यानि हमेसा री जिन्दगी।

विस्वासा री देखभाल

²⁰ हे तिमिथियुस, परमेसरे जो काम तुजो सौंपी रा, तू तेता जो पूरा कर। जो गल्ला आत्मिक नी, होर बेकारा री बैहसा ले दूर रह, होर तिन्हा ले भी जो परमेसरा रे सच्चे उपदेसा रे व्रोधा मन्झ ई, जिन्हा जो स्यों गलती किन्हें “ज्ञान” बोले।

²¹ कुछ लोके इन्हा झूठे ज्ञाना जो अपनाई लईरा, एह्ड़ा करणे ले ऐबे स्यों मसीह रे सच्चे उपदेसा पर विस्वास नी करदे। हांऊँ प्रार्थना करहा कि परमेसर तुस्सा सभी जो आपणा अनुग्रह देंदा रहे।