1 तिमिथियुस 3 - मंडयाली नंऊँआं नियम

कलीसिया रे अगुवे रे गुण

¹ ये भरोसे करणे रे लायक गल्ला ई कि, जो कलीसिया रे अगुवा बणना चाहां, से इज्जता रे लायक काम करणे री इच्छा रखे।

² होर इधी कठे ये जरूरी आ कि कलीसिया रे अगुवे वाले ये सारे गुण हो-कि से बेकसूर हो, होर तेसरी एक ई लाड़ी हो, होर समझदारी किन्हें काम करणे वाल़ा होर आपणे आपा पर काबू रखणे वाल़ा हो। होर से एह्ड़ा हो कि दूजे लोक तेसरी इज्जत करदे हो, होर आपणे घरा मन्झ प्रोहणेया रा आदर-खातर करणे वाल़ा, होर परमेसरा रे वचना जो सही ढंगा किन्हें स्खाणे वाल़ा हो।

³ से दारुबाज या मारपीट करणे वाल़ा नी हो; बल्की दूजेया पर दया करणे वाल़ा हो। होर ना झगड़ा करणे वाल़ा हो होर ना पैसे रा लालच करणे वाल़ा हो।

⁴ से आपणे घरा-परिवारा जो ठीक ढंगा किन्हें चलाणे वाल़ा हो, होर से आपणे बाल-बच्चे जो स्खायें कि स्यों हर गल्ला मन्झ बड़ी इज्जता किन्हें तेसरा केहणा मन्हें।

⁵ जेबे कोई आपणे घरा-परिवारा जो ठीक ढंगा किन्हें चलाणा नी जाणदा हो, ता से सच्चे परमेसरा री कलीसिया जो सम्भाल्णा भी नी जाणदा।

⁶ से एह्ड़ा माह्णुं नी हो, जो हाल्ले ही विस्वासी बणीरा हो, केते एह्ड़ा नी हो कि से घमंडी बणी जाये, होर परमेसर तेस जो तेस तरीके किन्हें सजा दे, जिहां सैताना जो भी घमंडी बणने पर सजा दितिरी थी।

⁷ होर कलीसिया रे बाहरवाले मन्झ भी तेसरा नाम खरा हो, केते एह्ड़ा नी हो कि लोक तेसरे बारे मन्झ बुरी गल्ला करहे होर सैतान तेस जो फसाई ले।

कलीसिया रे सेऊआदारा रे गुण

⁸ कलीसिया रे अगुवे साहीं कलीसिया रे सेऊआदार भी एह्ड़े लोक हो जिन्हारी लोक इज्जत करदे हो, होर जो कुछ स्यों बोलदे हो तेता मन्झ इमानदार हो, सराबी होर दूजेया जो धोखा देई किन्हें पैसे कमाणे वाले नी हो।

⁹ पर तिन्हा जो सुद्ध अंतरात्मा ले तेस सच्ची खबरा पर विस्वास करणा चहिए, जो परमेसरे जाहिर कितिरी।

¹⁰ होर तिन्हा जो कलीसिया रे सेऊआदार नियुक्त करणे ले पैहले ये गल परखी जाए कि तिन्हा वाले सही गुण हाए की नी, होर फेरी अगर सभिये तिन्हा जो बेकसूर पाईरा हो, ता स्यों कलीसिया रे सेऊआदारा रा काम करहे।

¹¹ एस तरहा सेऊआदारा री लाड़ीया भी तेह्ड़ी हो जिन्हारी सब लोक इज्जत करदे हो, दूजेया जो बदनाम करणे वाली नी हो, पर आपणे आपा पर काबू रखणे वाली हो, होर सभ गल्ला मन्झ भरोसे रे लायक हो।

¹² कलीसिया रे सेऊआदारा री एक ई लाड़ी हो, होर से आपणे बाल बच्चे साउगी आपणे घरा रे बाकि सदस्या जो ठीक ढंगा किन्हें चलाणे वाल़ा हो।

¹³ क्यूंकि जिन्हें सेऊआदारा रा काम ठीक ढंगा किन्हें पूरा कितेया, से आपणे कठे एक खरा नाम कमाई लेया। होर से बड़ी हिम्मता किन्हें यीसू मसीह पर विस्वास करणे रे बारे मन्झ दूजे लोका जो दसा।

बडी गल्ला रा जाहिर हूंणा

¹⁴ ये आस रखी किन्हें हांऊँ तुस्सा जो लिख्या करहा कि मां जल्दी ई तुस्सा वाले आऊंणा।

¹⁵ अगर मुंजो आऊणें मन्झ टैम लगी जाए ता तुस्से एस चिठ्ठी रे ज्रीए जाणी लया कि, परमेसरा रे घरा रे सदस्य हूंणे रे नाते यानि जिउंदे परमेसरा री कलीसिया हूंणे रे नाते आस्सो आपणी जिन्दगी केह्ड़ी जीणी चहिए। जिहां निंऊँआं होर खम्बे घरा जो मजबूत रखे, तिहां ही ये विस्वासी लोक सच्चे उपदेसा जो मजबूत बणाई रखे।

¹⁶ होर एता मन्झ कोई सक नी आ कि, परमेसरे जो सच्ची खबर जाहिर कितिरी, से पूरी तरहा ले सच्च ई, मसीह जो माह्णुं रे रूपा मन्झ जाहिर हुआ, पवित्र आत्मे तेस जो हर कामा मन्झ धर्मी ठैहर्या, स्वर्गदूते से देखेया, होर स्वर्गा री महिमा री वखा जो से चकी लितेया गया, लोके तेसरे बारे मन्झ जाति-जाति मन्झ प्रचार कितेया, संसारा रे लोके तेस पर विस्वास कितेया।