1 तिमिथियुस 1 - मंडयाली नंऊँआं नियम

नमस्कार

¹ हांऊँ पौलुस, एस्सा चिठ्ठी जो लिख्या करहा। आस्सा रे उद्धारकर्ता परमेसर होर यीसू मसीह रे हका ले जेस पर आस्से आस रखे, हांऊँ यीसू मसीह रा चुणिरा चेला आ।

² हे तिमिथियुस, हांऊँ ये चिठ्ठी तुजो लिखी करहा, तू मेरे आपणे मह्ठे साहीं आ क्यूंकि तू भी मसीह पर विस्वास रखा। हांऊँ प्रार्थना करहा कि बापू परमेसर होर आस्सा रा प्रभु मसीह यीसू तुजो अनुग्रह, दया, होर सांति देंदा रहे।

झूठे उपदेस सखाणे वाले रे बरखलाफ चेतावनी

³ इफिसुस सैहरा जो छाडी किन्हें मकीदुनिया ईलाके जो जाणे रे टैमा मन्झ जो गल्ला मैं तेरे किन्हें दिला ले बोलिरी थी तेस्सा गल्ला जो हांऊँ दबारा बोली करहा कि, इफिसुस सैहरा मन्झ कुछ लोक एह्ड़े जो गलत उपदेसा जो सखाई करहे, तू तेथी रही किन्हें तिन्हो एह्ड़ा समझा कि स्यों एह्ड़ी गल्ला नी स्खाये।

⁴ होर लोका किन्हें बोल कि स्यों पुराणी मन घड़न्त काह्णियां, होर तिन्हारे बापदादेया री नांऊँआ री लम्बी सूची रे बारे री गल्ला पर आपणा टैम बर्बाद नी करहे। इन्हा गल्ला ले सिर्फ बैहस हुंहाँ ईं; होर बैहस करणे ले आस्सा री जिन्दगी मन्झ परमेसरा री योजना पूरी नी हुन्दी, होर एह्ड़ी योजना सिर्फ तेस पर विस्वासा करणे वाले रे ज्रीए ही पूरी हुईं।

⁵ हांऊँ ये आदेस तुस्सा जो इधी कठे देआ कि तुस्से एक दूजे किन्हें सच्चे दिला किन्हें प्यार करा, होर साफ अंतरात्मा, होर भरपूर विस्वास रखो।

⁶ झूठे उपदेसा जो स्खाणे वाले एह्ड़े खरे कामा जो करणा छाडी दितिरा, होर बेकारा री बैहस-बाजी मन्झ फसी गईरे।

⁷ ये झूठे उपदेस स्खाणे वाले, तिन्हा व्यवस्था स्खाणे वाल़े साहीं बणना चाहें, जिन्हा जो मूसा री व्यवस्था रा ज्ञान आ। पर जिन्हा गल्ला जो स्यों स्खाणा चाहें, होर जिन्हा गल्ला जो स्यों बोलणे री हिम्मत करहे, तिन्हा गल्ला जो स्यों आपु नी समझ्दे।

⁸ ऐबे आस्से जाणहां ऐं कि, अगर कोई मूसा री व्यवस्था जो ठीक ढंगा किन्हें स्खाये, तेबे ही ये व्यवस्था खरी ई।

⁹ ये जाणी किन्हें कि मूसा री व्यवस्था धर्मी माह्णुं रे कठे नी, पर तिन्हा लोका रे कठे ई जो परमेसरा री व्यवस्था जो भूली जाएं, होर तेसरे हुकमा जो नी मनदे; होर जो लोक परमेसरा री भक्ति नी करदे होर हमेसा पाप करहे; होर जो दुस्ट काम करहे, होर स्यों जो परमेसरा री इज्जत नी करदे; होर स्यों जो आपणे माऊ-बापू होर दूजे लोका जो मारी दे।

¹⁰ व्यभिचारीया, समलैंगिक, माह्णुंआं रा अपहरण करणे वाले, झूठ बोलणे वाले, झूठी कसम खाणे वाले, हर एक एह्ड़ा काम करहे, जो खरे उपदेसा रे बरखलाफ ऐे।

¹¹ ये सच्चा उपदेस आस्सा रे परमप्रधान परमेसरा री महिमा री खुसी री खबरा रे मताबक ई, जिन्हें मुंजो एता री प्रचार करणे री जिम्मेदारी दितिरी।

पौलुसा री गुआही

¹² होर हांऊँ, आस्सा रे प्रभु यीसू मसीह रा धन्यावाद करहा, जिन्हें मुंजो सामर्थ दिती; कि तिन्हें मुंजो भरोसे लायक समझी किन्हें आपणी सेऊआ रे कठे नियुक्त कितेया।

¹³ मसीह पर विस्वास करणे ले पैहले ता हांऊँ मसीह री निंदा करणे वाल़ा, होर विस्वासी लोका जो स्ताणे वाल़ा, होर निर्दयी था। क्यूंकि मैं हाल्ले तक विस्वासा नी कितिरा था, इधी कठे हांऊँ नी जाणदा था कि जो हांऊँ करहा था से गलत आ। होर एस वजहा ले मसीहे मेरे पर दया किती।

¹⁴ आस्सा रे प्रभुए हमेसा मेरे पर बौह्त ज्यादा अनुग्रह कितेया। होर मसीह यीसू साउगी एक हूंणे री वजहा ले तिन्हें मुंजो विस्वास होर प्यार दितेया।

¹⁵ ये भरोसे करणे रे लायक गल्ला ई होर हर तरहा मन्नणे रे लायक ई कि, मसीह यीसू आस्सा पापिया रा उद्धार करणे रे कठे संसारा मन्झ आया, जिन्हा मन्झ सभी ले बडा पापी हांऊँ था।

¹⁶ होर इधी कठे प्रभु यीसू मसीहे मेरे गास दया किती कि, से मेरे साहीं सभी ले बडे पापी रे ज्रीए आपणी असीम सैहनसीलता दसी सके कि, तिन्हें केस तरीके किन्हें हांऊँ माफ कितिरा, होर आगे चली किन्हें जो लोक तेस मन्झ विस्वास करघे, तिन्हारे कठे अनंत जिन्दगी पाणे रे कठे एक उदाहरणा रे रूपा मन्झ मुंजो खड़ा कितेया।

¹⁷ ऐबे अनंतकाला रा राजा, कधी भी नी मरणे वाल़ा, अनदेखे, होर एक सच्चा परमेसरा रा आदर होर महिमा जुग-जुग हुन्दी रहे। आमीन।

तिमिथियुस री जिम्मेदारिया

¹⁸ मेरे मह्ठे, तिमिथियुस, हांऊँ इन्हा आदेसा जो तुस्सा जो देई करहा: हांऊँ चाहां कि तुस्से तिन्हा गल्ला जो याद रखा जो नबिये बौह्त पैहले बोलिरी थी कि तुस्सा किन्हें एह्ड़ा हूंणा। तू तिन्हा गल्ला जो झूठे उपदेसा स्खाणे वाले रे बरखलाफ लड़ने रे कठे इस्तेमाल करेया।

¹⁹ तुस्सा रा मसीह पर विस्वास बणेया रहे, होर साफ अंतरात्मा हो। कुछ लोके आपणी एस साफ अंतरात्मा जो नकारी दितिरी, जेसरी वजहा ले तिन्हारा विस्वास रूपी जहाज डूबी गया।

²⁰ होर तिन्हा मन्झा ले हुमिनियुस होर सिकंदर ऐं, जिन्हा जो मैं कलीसिया ले बाहर काढी दितिरा होर सैताना रे हका मन्झ सौंपी दितिरे, ताकि स्यों परमेसरा री निंदा करणा ना सीखे।