1 थिस्सलुनकियो 4 - मंडयाली नंऊँआं नियम

पवित्र जिन्दगी जीणे रे कठे सादेया जाणा

¹ हे भाईयो होर बैहणो ऐबे आखरी, आस्से तुस्सा ले अर्ज करहा ऐं, होर तुस्सा जो प्रभु यीसू मन्झ सम्झाहें कि, जिहां तुस्से आस्सा ले ठीक व्यवहार रखणा, होर परमेसरा जो खुस करणा सिख्या, होर तुस्से ठीक व्यवहार रख्हा ऐ भी, तिहां ईं इन्हा गल्ला मन्झ होर बी ज्यादा बढ़दे जाऊआ।

² क्यूंकि तुस्से जाणहां ऐं कि, आस्से तुस्सा जो प्रभु यीसू रे दितिरे हका ले तुस्सा जो कुण-कुण बिधिया दिती।

³ क्यूंकि परमेसरा री इच्छा येई कि, तुस्से पवित्र बणां; होर व्यभिचारा ले बची किन्हें रहा।

⁴ होर तुस्सा मन्झा ले हर एक आदमी आपणी लाड़ी किन्हें पवित्रता होर इज्जता किन्हें रेहणा सीखी सको,

⁵ होर बुरी इच्छा साउगी नी, जिहां अन्यजाति लोका करहे, जो परमेसरा जो नी जाणदे।

⁶ ये भी परमेसरा री इच्छा ई कि एस गल्ला मन्झ कोई भी आपणे विस्वासी भाई होर बैहणा रे प्रति पाप नी करहे होर ना ई ठगे, क्यूंकि प्रभु यीसू मसीह एह्ड़े काम करणे वाले जो सजा देणी; जेह्ड़ा कि आस्से पैहले तुस्सा किन्हें बोल्या, होर चिताया भी था।

⁷ क्यूंकि परमेसरे आस्से असुद्ध जिन्दगी जीणे रे कठे नी, पर पवित्र जिन्दगी जीणे रे कठे सादिरे।

⁸ इधी कठे जो इन्हा बिधियो जो नी मनदा, से माह्णुं री नी, पर परमेसरा री बिधिया जो टाल्हा, जिन्हें आपणा पवित्र आत्मा तुस्सा जो दितिरा।

प्यार होर काम

⁹ पर जेथी तक विस्वासी भाईया होर बैहणा किन्हें प्यार करणे री गल ई ता तेसरे बारे मन्झ ये जरूरी नी आ कि कोई हांऊँ तुस्सा जो लिखूं; क्यूंकि एक दूजे किन्हें प्यार रखणा तुस्से आप्हुए परमेसरा ले सिख्या।

¹⁰ हे भाईयो होर बैहणो तुस्से मकीदुनिया ईलाके रे सभ विस्वासी लोका साउगी प्यार कितिरा, पर ऐबे आस्से तुस्सा किन्हें अर्ज करहा ऐं कि, एता मन्झ होर भी ज्यादा बढ़दे जाऊआ।

¹¹ होर जेह्ड़ा आस्से तुस्सा जो हुक्म दितेया, तिहां ईं सांति किन्हें एक दूजे किन्हें रैहणे होर आपणा-आपणा काम काज करणे, होर आपणे-आपणे हाथा ले कमाणे री कोसिस करा।

¹² कि अविस्वासी लोका रे साम्हणें तुस्सा री जिन्दगी जीणे रा तरीका इज्जत पाणे रे लायक हो, होर तुस्सा री जरूरता रे कठे तुस्सा जो होरी पर आस नी रखणी पो।

यीसू रा दबारा आऊंणा

¹³ हे भाईयो होर बैहणो, आस्से चाहें कि, तुस्से जाणी लो कि तिन्हा मरिरे विस्वासी लोका साउगी क्या हूंणा। एह्ड़ा नी हो कि, तुस्से अविस्वासी लोका साहीं दुःखी हो, जिन्हों ये आसा नी हुन्दी कि परमेसर तिन्हारे मरणे रे बाद तिन्हो जिउंदा करी सक्हा।

¹⁴ क्यूंकि अगर आस्से विस्वास करहा ऐं कि, यीसू मरेया, होर जिउंदा भी हुई गया, ता तिहां ईं स्यों जो यीसू पर विस्वास रखदे हुए मरी गईरे, तिन्हा सभी जो परमेसरा यीसू साउगी वापस लेई आऊणें।

¹⁵ क्यूंकि आस्से प्रभु यीसू रे बचना रे मताबक तुस्सा किन्हें ये बोल्हा ऐं कि, आस्से विस्वासी लोक जो प्रभु यीसू मसीह रे वापस आऊणें रे ध्याड़े तक जिउंदे रैंह्णां, पक्का आस्सा मरिरे विस्वासी लोका ले पैहले यीसू किन्हें नी मिलणा।

¹⁶ क्यूंकि प्रभु यीसू आपणे आप स्वर्गा ले उतरणा; तेस टैम तेस उची अवाजा किन्हें हुक्म देणा, होर प्रधान दूता रा उची अवाज सुणाई देणी, होर परमेसरा री तुरही बजाई जाणी, होर जो मसीह मन्झ विस्वास करदे हुए मरी गईरे, तिन्हा पैहले जी उठणा।

¹⁷ तेता ले बाद आस्से विस्वासी लोक, जो जिउंदे ऐं, तिन्हा साउगी आसमाना मन्झ प्रभु किन्हें मिलणे रे कठे बदला पर उठाए जाणे, होर तेबे ले आस्सा जुग-जुग आपणे प्रभु साउगी रैंह्णां।

¹⁸ इधी कठे इन्हा गल्ला ले एक दूजे जो तस्सली देआ करा।