1 थिस्सलुनकियो 2 - मंडयाली नंऊँआं नियमपौलुसा रा प्रचार होर जिन्दगी 1 हे भाईयो होर बैहणो, तुस्से आपु ई जाणहां ऐं कि आस्सा रा तुस्सा वाले आऊंणा फायदेमंद हुआ। 2 बल्की तुस्से आपु ई जाणहां ऐं कि, फिलिप्पी सैहरा मन्झ दुःख उठाणे होर दंगे सैहणे ले बाद भी आस्सा जो परमेसरे एह्ड़ी हिम्मत दिती कि लोका रा घोर व्रोध करणे पर भी तुस्सा रे सैहरा मन्झ भी आस्से तुस्सा जो परमेसरा री खुसी री खबर सुणाई सके। 3 क्यूंकि आस्सा रा उपदेस भड़काने वाल़ा नी आ, होर ना असुद्ध मकसदा ले, होर ना छल कपटा साउगी बोली जां। 4 पर जिहां परमेसरे आस्सा जो लायक समझी किन्हें आपणी खुसी री खबर आस्सा जो दिती। इधी कठे आस्से माह्णुंआं जो नी पर दिला जो जांचने वाले परमेसरा जो खुस करणे रे कठे प्रचार करहा ऐं। 5 तुस्से जाणहां ऐं कि, आस्से ना कधी चापलूसी री गल्ला करहा ऐं थे, होर ना ही लालचा री वजहा ले कोई काम कितिरा। होर परमेसर गुआही देआ कि आस्से एह्ड़ा काम नी कितिरा। 6 आस्से माह्णुंआं ले आदर नी चाहंदे थे, होर ना तुस्सा ले, होर ना केसी होरी ले, जेब्की मसीह रे चुणिरा चेला हूंणे रे नाते तुस्सा ले मदद लैणी आस्सा रा हक था। 7 पर तुस्सा रे बीचा मन्झ आस्से एह्ड़ी नम्रता दसी जिहां एक दूध प्याणे वाली माऊ आपणे बच्चेया रा पालन पोसण करहा ई। 8 तुस्सा रे कठे ममता हूंणे री वजहा ले आस्सा जो खुसी ऐं कि ना सिर्फ परमेसरा रा खुसी री खबर सुणाए, बल्की तुस्सा रे कठे आपणी जान भी देई दे, क्यूंकि तुस्से आस्सा रे कठे बौह्त लाडले हुई गईरे थे। 9 क्यूंकि हे भाईयो होर बैहणो, तुस्से आस्सा री कढ़ी मैहनता जो याद करहा ऐं कि, आस्से रात ध्याड़ काम धंधा करी किन्हें तुस्सा जो परमेसरा री खुसी री खबरा रा प्रचार कितेया, ताकि आस्से तुस्सा मन्झा ले केसी पर बोझ नी बणे। 10 तुस्से आपु ई गुआह ऐं, होर तिहां ईं परमेसर भी गुआह आ कि, तुस्सा सभी विस्वासी लोका साउगी आस्सा रा व्यवहार कितना पवित्र, धार्मिक, होर बेकसूर था। 11 तुस्से जाणहां ऐं कि जिहां एक बाप आपणे बच्चे साउगी व्यवहार करहा, तिहां ईं आस्से भी तुस्सा मन्झा ले हर एकी जो उपदेस देहां ऐं, होर सांति देहां ऐं, होर सम्झाहें थे, 12 कि तुस्सा एह्ड़ी जिन्दगी जिया जो परमेसरा जो खरी लगे, जो तुस्सा जो आपणे राज होर महिमा मन्झ साद्हा। विस्वासी लोका री जिन्दगी बधलणा 13 इधी कठे आस्से भी परमेसरा रा धन्यावाद लगातार करहा ऐं; कि जेबे तुस्से आस्सा रे ज्रीए परमेसरा रा बचन रा प्रचार सुणेया, ता तुस्से तिन्हा बचना जो माह्णुंआं रा नी, पर परमेसरा रा बचन समझी किन्हें ग्रैहण कितेया, होर सच्चे ये परमेसरा रा बचन आ, जो तुस्सा विस्वासी लोका री जिन्दगी मन्झ काम करहा। 14 हे भाईयो होर बैहणो, यहूदिया ईलाके मन्झ परमेसरा री कलीसिया होर तिन्हा विस्वासी लोका जो जिन्हें जे यीसू मसीह ग्रैहण करी लईरा था, स्यों जिहां स्ताईरे थे तिहां ही तुस्से भी सताये, क्यूंकि तुस्से भी आपणे लोका ले जिहां दुःख पाया, तिहां ही तिन्हें भी आपणे यहूदी लोका ले दुःख पाईरा था। 15 जिन्हें जे प्रभु यीसू होर नबिया जो मारी दितेया होर तिन्हें आस्से भी सताये। परमेसर तिन्हा किन्हें खुस नी आ, होर स्यों सभ माह्णुंआं रा व्रोध करहा ऐं। 16 होर स्यों आस्सा जो अन्यजाति लोका मन्झ उद्धारा री खुसी री खबर प्रचार करणे ले रोक्हा ऐं, ताकि स्यों तेबे तक आपणे पापा रा घड़ा भरदे रहे जेबे तक परमेसर तिन्हा जो सजा नी दे। पर ऐबे ता परमेसरा सच्चे तिन्हो सजा देणी। पौलुसा री कलीसिया रे लोका साउगी मिलणे री इच्छा 17 हे भाईयो होर बैहणो, आस्से थोह्ड़े टैमा रे कठे तुस्सा साउगी नी थे, पर आस्से हमेसा तुस्सा रे बारे सोचाहें थे, इधी कठे आस्से तुस्सा किन्हें मिलणे रे कठे होर तुस्सा जो देखणे रे कठे होर भी जतन कितेया। 18 इधी कठे कि आस्से तुस्सा वाले आऊणें री इच्छा रख्हा ऐं थे। हांऊँ पौलुस, कई बार आऊंणा चाहां था, पर तुस्सा वाले आऊणें रे कठे सैतान बिघ्न पांदा रैंहयां। 19 आस्सा री आस, या खुसी, या महिमा रा ताज कुणहां आ? स्यों तुस्से लोक ही हूंणे जेबे आस्सा रा प्रभु यीसू वापस आऊंणा। 20 हां सच्चे आस्सा री महिमा होर खुसी तुस्से ई ऐं। |
This work is licensed under Creative Commons Attribution-ShareAlike 4.0 License.