1 थिस्सलुनकियो 1 - मंडयाली नंऊँआं नियम

नमस्कार

¹ हांऊँ पौलुस, सिलास होर तिमिथियुस साउगी ये चिठ्ठी लिखी करहा। आस्से ये चिठ्ठी थिस्सलुनिके सैहरा री कलीसिया रे लोका रे कठे लिख्या करहा ऐं, जो बापू परमेसर होर प्रभु यीसू मसीह रे लोक ऐं। परमेसर तुस्सा जो अनुग्रह होर सांति दे।

थिस्सलुनिके सैहरा रे लोका रा बांका उदाहरण

² आस्से आपणी प्रार्थना मन्झ तुस्सा जो याद करहा ऐं होर हमेसा तुस्सा सभी रे बारे मन्झ परमेसरा रा धन्यावाद करहा ऐं।

³ होर जेबे आस्से आपणे बापू परमेसरा किन्हें प्रार्थना करहा ऐं, तुस्सा रे कामा रे कठे जो विस्वासा री वजहा ले तुस्से करहा ऐं, होर दूजेया किन्हें प्यार करणे रे कठे जो मैहनत करहा ऐं, होर आस्सा रे प्रभु यीसू मसीह मन्झ उम्मीद रखणे रे वजहा ले जो धीरज पैदा हुंहाँ, तिन्हा गल्ला जो आस्से हमेसा याद करहा ऐं।

⁴ होर हे भाईयो होर बैहणो, आस्से जाणहां ऐं कि, परमेसरे तुस्सा किन्हें प्यार करहा होर आपणे लोक बणने रे कठे तुस्से चुणिरे ऐं।

⁵ क्यूंकि आस्सा री खुसी री खबर जो यीसू मसीह रे बारे मन्झ ई तुस्सा वाले ना सिर्फ गल्ला मन्झ बल्की सामर्थ होर पवित्र आत्मा, होर बड़े निस्चय किन्हें पुजीरा। जेह्ड़ा तुस्से जाणहां ऐं कि, आस्से तुस्सा री भलाई रे कठे तुस्सा रे बीचा मन्झ रैहन्दे हुए आस्सा रा व्यवहार केह्ड़ा था।

⁶ होर तुस्से बड़े दुःखा रे बीचा मन्झ भी पवित्र आत्मा रे ज्रीए मिलणे वाली खुसी साउगी खुसी री खबर ग्रैहण कितेया। होर तुस्से आस्सा रा होर आस्सा रे प्रभु यीसू मसीह साहीं जिन्दगी जींदे लगे।

⁷ होर एथी तक कि मकीदुनिया ईलाके होर अखाया ईलाके रे सभ विस्वासिया रे कठे तुस्से उदाहरण बणे।

⁸ क्यूंकि तुस्से ना सिर्फ मकीदुनिया होर अखाया ईलाके मन्झ प्रभु रा बचन सुणाया, पर हर जगहा जेथी भी आस्से जाहें तुस्सा रे परमेसरा पर विस्वास रे बारे मन्झ लोक आस्सो दसाहें, इधी कठे आस्सा जो तुस्सा रे बारे मन्झ बोलणे री ज्रूरत नी ई।

⁹ क्यूंकि स्यों आपु ई दूजेया किन्हें बोल्या ऐं कि, जेबे आस्से तुस्सा वाले आईरे थे ता तुस्से आस्सा रा स्वागत किहाँ कितेया था; होर तुस्से किहाँ मूर्तिया ले दूर हुई किन्हें परमेसरा री वखा जो फिरे ताकि तुस्से सच्चे होर जिउंदे परमेसरा री सेऊआ करो।

¹⁰ होर तेसरे मह्ठे यीसू रा स्वर्गा ले वापस आऊणें रा इंतजार करदे रैहया, जेस जो परमेसरे मरिरे मन्झा ले जिउंदा कितेया, होर जो आस्सा जो आऊणें वाले न्याय रे डरा ले बचाहां।