1 पतरस 5 - मंडयाली नंऊँआं नियमझुंडा रा पुहाल 1 एक होर गल ई जो हांऊँ तुस्सा लोका किन्हें यानि कलीसिया रे अगुवे किन्हें बोलणा चाहां, क्यूंकि हांऊँ भी तिन्हा साहीं एक कलीसिया रा अगुवा। मैं आपु स्यों दुःख देखिरे जो मसीहे बौह्त पैहले काटीरे। जेबे तेस दबारा वापस आऊंणा मां तेसरी महिमा रा भी साझीदार बणना। तुस्सा साहीं अगुवा हूंणे रे नाते हांऊँ तुस्सा किन्हें अर्ज करहा, 2 कि विस्वासी लोका रे झुंडा री देखभाल करा; जो परमेसरा री, होर जो तुस्सा जो दितिरी की तुस्से तिन्हारी देखभाल करी सको। होर तिन्हारी देखभाल खुसी किन्हें करहा, कोई जोर जबरदस्ती किन्हें नी, क्यूंकि ये ही परमेसरा री इच्छा ई। एह्ड़ा तुस्से नीच कमाई रे कठे नी, पर सच्चे तिन्हारी मदद करणे रे कठे करा। 3 होर जो लोक तुस्सा जो सौंपे गईरे, तिन्हा पर हक नी जताऊआ, जिहां एक अधिकारी लोका पर आपणा हक जता पर झुंडा रे कठे एक खरा उदाहरण बणां। 4 होर जेबे प्रधान रखवाला यानि यीसू मसीह दबारा वापस आऊंणा, ता तुस्सा जो एक बांका ताज देणा, जेसरी तेज महिमा कधी भी खत्म नी हूणीं। परमेसरा रे अधीन हूंणा होर सैताना रा विरोध 5 एस तरीके किन्हें हे नौजुआनो, तुस्से भी कलीसिया रे स्याणे विस्वासी लोका री गल्ला जो मन्नेया करेया, बल्की बड़ी दीनता किन्हें एक दूजे री मदद करेया करणा। क्यूंकि पवित्र सास्त्रा मन्झ लिखिरे एक बचना जो आस्से पढ़े कि, “परमेसर बडयाई करणे वाल़ेया रा ता विरोध करहा, पर नम्र दीना पर अनुग्रह करहा।” 6 इधी कठे आपणे आपा जो तेस परमेसरा रे साम्हणें दीन बणाऊआ, जो तुस्सा जो बचाणे रे कठे सामर्थी आ, ताकि से तुस्सा जो ठीक टैमा पर बड़ी इज्जत दे। 7 होर आपणी सारी चिंता तेस पर पाई देआ, क्यूंकि परमेसरा जो तुस्सा री परवाह ई। 8 चतन्न रैहया, होर त्यार रैहया, क्यूंकि सैतान तुस्सा रा व्रोधी आ, जो तुस्सा पर वार करणा चाहां ताकि तुस्से परमेसरा रे हुकमा जो नी मान्नो। से गुर्राणे वाले सेरा साहीं एस ताका मन्झ रैंहयां कि, केस जो फाड़ी किन्हें खाई दे। 9 विस्वासा मन्झ पक्के हुई किन्हें तेसरा विरोध करहा। याद रखा कि संसारा मन्झ रैहणे वाले सारे विस्वासी भाई बैहण एह्ड़ा ही दुःख भोगी करहे, जो तुस्से भूग्तेया करहे। 10 होर ऐबे परमेसर जो अनुग्रहा ले भरिरा आ, होर जिन्हें यीसू मसीह साउगी जुड़े रैहणे री वजहा ले आस्सा जो स्वर्गा मन्झ आपणी अनंत महिमा मन्झ साझी हूंणे रे कठे सादीरा, तुस्सा रे थोह्ड़ी देरा तक दुःख उठाणे ले बाद तेस आपु ई तुस्से खरे बनाणे, ताकि तुस्सा मन्झ कोई गलती नी हो होर तेस तुस्सा रे दिल मजबूत करणे, होर तेस तुस्से सामर्थी बणाई देणे ताकि तुस्सा रा विस्वास कमजोर नी हो। 11 तेस सामर्था किन्हें जुग-जुग राज करदा रेहणा। आमीन। आखरी नमस्कार 12 मैं सिलासा री मददा किन्हें ये छोटी जे चिठ्ठी लिखी किन्हें तुस्सा वाले भेजिरी, हांऊँ तेस जो एक भरोसे रे लायक विस्वासी भाई समझ्हा। एता जो लिखणे रा मेरा मकसद ये आ कि हांऊँ तुस्सा जो हिम्मत होर होंसला देई सकूं कि, ये सच्चे तुस्सा रे कठे परमेसरा रा अनुग्रह ही आ, जेता रा तुस्से मैहसूस करी करहे। एस अनुग्रहा मन्झ ही मजबूत बणी किन्हें रहा। 13 बाबेल सैहरा (जो रोम देसा मन्झ आ) मन्झ रैहणे वाले विस्वासी लोका री तरफा ले तुस्सा जो नमस्कार, जो तुस्सा साहीं परमेसरा रे चुणिरे लोक ऐं। मरकुस तुस्सा जो नमस्कार बोली करहा जो मेरे मह्ठे साहीं आ। 14 प्यारा किन्हें गले मिली किन्हें एक दूजे जो नमस्कार करा। हांऊँ प्रार्थना करहा की परमेसर तुस्सा सभी जो सांति दे, जो मसीह साउगी जुड़ीरे। आमीन। |
This work is licensed under Creative Commons Attribution-ShareAlike 4.0 License.