1 पतरस 4 - मंडयाली नंऊँआं नियम

बदली हुई जिन्दगी

¹ इधी कठे मसीहे सरीरा मन्झ रैहन्दे हुए दुःख सहन कितेया, ता तुस्सा जो भी तेस साहीं दुःख सहन करणे रे कठे त्यार रेहणा चहिए। क्यूंकि अगर तुस्से मसीह रे कठे दुःख सहन करणे री इच्छा रखायें, ता तुस्से पाप नी करणे रा फैसला लेई लितिरा।

² होर एस वजहा ले एह्ड़ा माह्णुं एस संसारा मन्झ रैहन्दे हुए आगे जो कधी भी आपणी जिन्दगी मन्झ माह्णुंआं री पापा री इच्छा जो पूरी नी करदा, पर से तेहड़ा ही करहा जेहड़ी परमेसरा री इच्छा ई।

³ क्यूंकि परमेसरा पर विस्वास नी करणे वाले जिन्हा गल्ला ले खुस हुए, तिन्हा गल्ला जो करणे मन्झ तुस्से पैहले ई टैम गुआई दितेया, होर ऐबे भतेरा हुआ। होर स्यों गल्ला येई कि-लुचपन करणे री बुरी इच्छा, पी किन्हें मुताली जाणा, रंगरलिया, दारू-बाजी, होर घृणित मूर्ति री पूजा करणा।

⁴ एता ले तुस्सा रे पुराणे दोस्त हरान हुयें कि, ऐबे तुस्से एह्ड़े गल्ला जो करणे मन्झ तिन्हारा साथ नी देंदे, होर इधी कठे स्यों तुस्सा जो बुरा भला बोल्हा ऐं।

⁵ पर एक ध्याड़े तिन्हा परमेसरा रे साम्हणें न्याय रे कठे खड़ीरे हूंणा। होर तिन्हा जो तिन्हारे कामा रा लेखा परमेसरा जो देणा पऊणा। होर परमेसरा मरिरे होर जिउंदे लोका रा न्याय करणा।

⁶ येई वजहा ई कि मरिरे लोके भी मसीह रे बारे मन्झ खुसी री खबर सुणी, हालांकि तिन्हारे सरीरा जो भी सजा मिली होर स्यों दूजे लोका साहीं मरी गये, पर ऐबे स्यों आत्मा मन्झ परमेसरा साउगी जुग-जुग जिउंदे।

परमेसरा री महिमा रे कठे सेऊआ

⁷ सभ गल्ला रा अंत जल्दी हूंणे वाल़ा आ; इधी कठे चतन्न रही किन्हें आपु पर काबू रखा होर प्रार्थना रे कठे त्यार रहा।

⁸ होर सभी ले जरूरी गल येई कि एक दूजे किन्हें गहरा प्यार रखा; क्यूंकि अगर तुस्से एक दूजे किन्हें प्यार करहे, ता तुस्से तिन्हारी हमेसा केसी भी गलती जो माफ करणे रे कठे त्यार रहे।

⁹ बगैर केसी सिकायत किन्हें तुस्सा रे घरा मन्झ आईरे मैहमाना री आदर-खातर करहा।

¹⁰ जेस जो भी परमेसरे वरदान दितिरा हो, एक दूजे री सेऊआ करणे रे कठे तेता रा इस्तेमाल करहा। एक खरे भंडारीया साहीं तिन्हा सारे वरदाना रा इस्तेमाल करहा, जो परमेसरे तिन्हो बड़े अनुग्रहा ले दितिरा।

¹¹ उदाहरणा रे कठे अगर तुस्सा वाले प्रचार करणे रा बरदान हो ता तुस्सा जो परमेसरा रे बचना रा प्रचार करणा चहिए। अगर दूजेया री मदद करणे रा वरदान आ ता परमेसरे तुस्सा जो, जो ताकत दितिरी, तेस ताकता ले दूजेया री मदद करहा। तेबे जो कुछ तुस्सा करणा तेता ले यीसू मसीह रे ज्रीए परमेसरा जो महिमा मिलणी। सारी महिमा होर सामर्थ जुग-जुग तेसरी ई! आमीन।

परमेसरा री महिमा रे कठे दुःख सैहणा

¹² हे लाडले भाईयो होर बैहणो, तुस्से इन्हा दुःख भरी गल्ला ले हरान नी हो जो तुस्से मसीह रे। पर ये इधी कठे हुई ताकि ये जाहिर हो कि तुस्से परमेसरा पर सच्चे विस्वास करहे की नी, इधी कठे एह्ड़ा मत सोच्हा कि कोई नौखी गल तुस्सा पर हुएया करहा ई।

¹³ पर जिहां-जिहां तुस्से मसीह रे दुःखा मन्झ साझी हुंहाँ ऐं, खुसी मनाऊआ। एस वजहा ले जेबे मसीहा लोका पर आपणी महिमा जाहिर करदे आऊंणा, तेबे तुस्सा बौह्त ज्यादा खुस हूंणा।

¹⁴ फेरी अगर मसीह रे नांऊँआं रे कठे तुस्सा री निंदा हुंहाँ ईं, ता तुस्से धन्य ऐं; क्यूंकि परमेसरा री महिमामय आत्मा तुस्सा मन्झ वास करहा।

¹⁵ तुस्सा मन्झा ले कोई आदमी हत्यारा या चोर, या बुरे काम करणे वाल़ा, या दूजे रे कामा मन्झ हाथ पाणे री वजहा ले दुःख नी सहे।

¹⁶ पर अगर मसीहा रे लोक हूंणे री वजहा ले दुःख सहे, ता सर्मिन्दे नी हो, पर एस गल्ला रे कठे परमेसरा री बड़ाई करहा की तुस्से एक विस्वासी ऐं।

¹⁷ परमेसरा रा न्याय करणे रा टैम आई गईरा, पैहले आस्सा विस्वासी लोका रा न्याय हूंणा। जेब्की परमेसरा पैहले आस्सा विस्वासी लोका रा न्याय करणा ता तिन्हा लोका पर आऊणें वाली खरतनाक गल्ला रे बारे मन्झ सोचा, जो परमेसरा री दितिरी खुसी री खबरा जो नी मन्नदे।

¹⁸ होर जिहां पवित्र सास्त्रा मन्झ लिखिरा, “अगर धर्मी माह्णुंआं बौह्त मुस्किला किन्हें उद्धार पाणा, ता बुरे होर पापी लोका साउगी क्या हूंणां?”

¹⁹ इधी कठे जो परमेसरा री इच्छा रे मताबक दुःख सहन करहे, स्यों भलाई करदे हुए, आपणे आपा जो भरोसे रे लायक परमेसरा रे हाथा मन्झ सौंपी दे जिन्हें जे स्यों रचिरे।