1 पतरस 1 - मंडयाली नंऊँआं नियम

नमस्कार

¹ हांऊँ पतरस, एस्सा चिठ्ठी जो लिखी करहा। हांऊँ यीसू मसीह रा चुणिरा चेला आ। हांऊँ ये चिठ्ठी परमेसरा रे चुणिरे तिन्हा लोका रे कठे लिखी करहा, जो परदेसिया साहीं पुन्तुस, गलातिया, होर कप्पुदुकीया, आसिया होर बितूनिया ईलाके रे कई सैहरा मन्झ रैंहयां ऐं।

² होर परमेसर बापूए बौह्त पैहले ले ही तुस्सा जो आपणे लोक हूंणे रे कठे, होर पवित्र आत्मा रे कामा रे ज्रीए पवित्र हूंणे रे कठे चुणी लईरा था। एह्ड़ा तिन्हें इधी कठे कितेया की तुस्से यीसू मसीह रा हुक्म मान्नो, होर तेसरे खूना रे छिड़कणे ले साफ हुई जाओ। हांऊँ प्रार्थना करहा कि परमेसर तुस्सा जो बौह्त अनुग्रह होर सांति देंदा रहे।

स्वर्गा री विरासत

³ आस्सा रे प्रभु मसीह यीसू रे बापू होर परमेसर धन्यावाद हो, जिन्हें आपणी बड़ी दया ले आस्सा जो नौंईं जिन्दगी दिती। क्यूंकि परमेसरे यीसू मसीह जो मरिरे मन्झा ले जिउंदा कितिरा, आस्से आपणी जिन्दगी बड़ी आसा किन्हें जी सके यानि आस्से पूरी उम्मीद रखी सके की जो वादा तिन्हें आस्सा किन्हें कितिरा से तेस पूरा करणा।

⁴ आस्से तेस विरासता जो पाणे रे कठे देखी करहे, जो परमेसर आपणे लोका रे सम्भाली किन्हें रखिरी। परमेसरे युयां आसिसा स्वर्गा मन्झ रखिरी, जेथी स्यों ना सड़दी ना खराब हुन्दी होर ना ही लुप्त हुन्दी।

⁵ परमेसरा आपणी सामर्था ले तुस्सा री हिफाजत करहा, क्यूंकि तुस्से मसीह यीसू पर भरोसा रखे, होर मसीह रे वापस आऊणें रे आखरी ध्याड़े तक तेस तुस्सा री हिफाजत करदे रैहणा। तेबे तुस्सा जाणी लेणा कि परमेसरे तुस्से पाप होर मौता दुहीं ले पूरी तरहा बचाई लितिरे।

⁶ इन्हा सारी होर एस वजहा ले तुस्से खुस हुंहाँ ऐं, जेब्की ऐबे तुस्सा जो थोह्ड़े टैमा रे कठे कई किस्मा री परेसानिया मन्झ पई किन्हें दुःख उठाणा जरूरी आ।

⁷ होर ये परेसानिया इधी कठे हुंहाँ ताकि ये जाहिर हो की तुस्सा रा विस्वास परमेसरा पर हाया की नी। मसीह पर तुस्सा रा विस्वास आगा मन्झ परखिरे सुद्ध कितिरे सोने ले भी ज्यादा कीमती आ। जिहां नास हूंणे वाल़ा सोना भी आगी किन्हें परखी जाहाँ, होर इंहां ही अगर तुस्सा रा विस्वास भी परेसानिया रे बीचा मन्झ मजबूत निकले, ता जेबे यीसू मसीहा दबारा वापस आऊंणा, तेस ध्याड़े तुस्सा जो भी बड़ाई, होर महिमा होर आदर मिलणा।

⁸ तुस्से कधी भी यीसू नी देखेया पर फेरी भी तुस्से तेस किन्हें प्यार करहे, होर तुस्से तेस जो नी देखदे पर फेरी भी विस्वास करहे। एह्ड़े करी किन्हें बड़े खुस हुंहाँ ऐं, एह्ड़ी खुसी जो ब्खान करणे ले बाहर होर महिमा किन्हें भ्हरीरा आ।

⁹ तुस्से इधी कठे खुस हुंहाँ ऐं क्यूंकि परमेसर तुस्सा री आत्मा जो पापा री सजा ले पूरा उद्धार करी करहा। ये यीसू मसीह पर तुस्सा रे विस्वासा री वजहा ले हुईरा।

नबिया री गुआही

¹⁰ एस ही उद्धारा रे बारे मन्झ नबिये होर जाणना चाहें थे। तिन्हें भविस्यवाणी किती कि परमेसरे कियां तुस्सा पर अनुग्रह करी किन्हें तुस्से बचाई लेणे, जेसरे तुस्से लायक नी ऐं। एस गल्ला जो जाणने रे कठे तिन्हें बौह्त जांच-पड़ताल किती।

¹¹ मसीह री आत्मा नबिया मन्झ थी, जो पैहले ले ही तिन्हो दसी थी कि मसीहा कियां दुःख सहन करना, होर तेता ले बाद तेस जो बड़ी इज्जत मिलणी। ता स्यों इन्हा गल्ला जो तोपे थे कि ये गल्ला संसारा मन्झ केबे हूणीं, होर तेस टैमा रा संसार केह्ड़ा हूंणां।

¹² पर परमेसरे नबिया पर ये गल जाहिर किती कि, स्यों जो गल्ला बोल्या करहा ऐं थे, स्यों तिन्हारे कठे नी पर तुस्सा रे कठे ई। से गल मसीह रे बारे मन्झ खुसी री खबर ई जो तुस्से ऐबे सुणी लईरी, परमेसरे पवित्र आत्मा जो स्वर्गा ले भेजी किन्हें लोका री मदद किती कि स्यों तुस्सा जो खुसी री खबर सुणाहें, होर ये बड़ी हरानी गल्ला ई कि स्वर्गदूत भी बड़े गौरा किन्हें इन्हा गल्ला जो हुंदे हुए देखी करहा ऐं।

पवित्र जिन्दगी रे कठे सादणा

¹³ एस वजहा ले आपणा-आपणा मन त्यार करा, जिहां लोक आपणी कमर कस्सी किन्हें काम करणे रे कठे त्यार हुंहाँ ऐं। चतन्न रहूआ की तुस्से क्या सोच्हे होर एह्ड़ा करणे ले तुस्से आपणे जिन्दगी एस आसा किन्हें जीये कि जेस ध्याड़े प्रभु यीसू मसीहा स्वर्गा ले वापस आऊंणा, तेस ध्याड़े परमेसरा तुस्सा जो आपणे अनुग्रहा रे ज्रीए उद्धारा रा दान देणा।

¹⁴ होर हुक्म मनणे वाले बच्चे साहीं परमेसरा रा हुक्म मन्हा। बुरे काम नी करहा, जेस जो करणे री इच्छा तुस्से पैहले रखे थे जेबे परमेसरा री सच्चाई जो नी जाणदे थे।

¹⁵ पर से पवित्र आ, जिन्हें तुस्से आपणे लोक हूंणे रे कठे सादिरे, तिहां ईं तुस्से भी जो कुछ करहे तेता मन्झ पवित्र बणां।

¹⁶ क्यूंकि पवित्र सास्त्रा मन्झ लिखिरा की परमेसर बोल्हा कि, “पवित्र बणां, क्यूंकि हांऊँ पवित्र आ।”

¹⁷ होर जेबे तुस्से प्रार्थना करहा ऐं ता परमेसरा जो बापू बोल्हे। ता याद रखा कि से भेदभाव नी करदा, होर हर एकी जो तेसरे कामा रे मताबक फैसला करहा। ता इधी कठे जेबे तुस्से एस्सा धरती पर परदेसी हुई किन्हें रहें ता परमेसरा री बड़ी इज्जत करहा।

¹⁸ क्यूंकि तुस्से जाणहां ऐं कि, तुस्से पैहले एक निकम्मी जिन्दगी जीये थे, जेस जिन्दगी जो जीणा तुस्सा रे बापदादे सखाया। एस्सा निकम्मी जिन्दगी ले तुस्सा रा छुटकारा नास्मान चांदी सोने री चीजा रे ज्रीए नी हुआ।

¹⁹ पर तुस्सा रा छुटकारा यीसू मसीह रे कीमती खूना रे ज्रीए हुआ, जो बेकसूर होर बेदाग छेलू साहीं था।

²⁰ संसारा जो रचणे ले बौह्त पैहले ले ही परमेसरे फैसला करी लितिरा था कि यीसू मसीह ही उद्धारकर्ता हूंणा, पर ऐबे से आखरी ध्याड़े मन्झ एस संसारा मन्झ आया ताकि तुस्सा री मदद करी सके।

²¹ तिन्हें मसीहे जो कितिरा तेता री वजहा ले ई तुस्से परमेसरा पर विस्वास करहे। तिन्हें ही यीसू जो मरिरे मन्झा ले जिउंदा कितेया, होर तेस जो महिमा दिती। इधी कठे परमेसरा पर तुस्सा रा विस्वास होर आस दुहें मजबूत ऐं।

²² सच्चा जो मनणे री वजहा ले ही तुस्से आपणे पापा ले सुद्ध किती गईरे। इधी कठे ऐबे आपणे विस्वासी भाई बैहणा किन्हें गहरा होर पुरे दिला किन्हें प्यार करदे रैहया।

²³ क्यूंकि तुस्से परमेसरा ले नौंईं जिन्दगी पाईरी, तुस्से ये जिन्दगी नास हूंणे वाली चीजा ले नी पाईरी, पर हमेसा बणी रैहणे वाली चीजा ले पाईरी। यानि आस्से परमेसरा रे जिउंदे होर अनंत बचना रे ज्रीए ये जिन्दगी पाईरी।

²⁴ क्यूंकि पवित्र सास्त्रा मन्झ लिखिरा कि, “हर एक माह्णुं घाहा साहीं आं, होर तेसरी सुन्दरता जंगला रे फूला साहीं ईं, घाह सुक्की जाहाँ, होर फूल झड़ी जाहें।

²⁵ पर प्रभु रे बचना जुग-जुग मजबूत बणी रैहणां।” होर ये बचन मसीह रे बारे मन्झ खुसी री खबर ई, जेसरा प्रचार आस्से तुस्सा जो सुणाईरा था।