1 यहून्ना 5 - मंडयाली नंऊँआं नियमसंसारा पर जय पाणा 1 जेसरा ये विस्वास आ कि यीसू ई मसीह ऐं, से परमेसरा रा बच्चा आ होर जो कोई बापू परमेसरा किन्हें प्यार करहा, से तेस किन्हें भी प्यार करहा ऐं, जो तेस बापू रे बच्चे ऐं। 2 जेबे आस्से परमेसरा किन्हें प्यार करहा ऐं, होर तेसरे हुक्मा जो मन्हां ऐं, ता एता ले ई आस्से जाणी लैहां ऐं कि आस्से परमेसरा रे बच्चेया किन्हें प्यार करहा ऐं। 3 जो आस्सा रा प्यार परमेसरा किन्हें ये आ, होर से एता मन्झ आ कि आस्से तेसरे हुक्म मन्हें; होर तेसरे हुक्म मन्ना कठण नी ऐं। 4 क्यूंकि जो कोई परमेसरा रा बच्चा आ, से संसारा पर जीत हासल करहा। होर जो जीत संसारा जो हराई देई, से आस्सा रा विस्वास ही आ। 5 संसारा जो जितने वाल़ा कुणहां? से ही जे विस्वास करहा कि यीसू ही परमेसरा रा मह्ठा आ। यीसू मसीह रे बारे मन्झ गुआही 6 यीसू मसीह रे बारे मन्झ सोचा, जेस जो परमेसरे भेजीरा ये तेबे जाहिर हुआ जेबे यहून्ना बपतिस्मा देणे वाल़े यीसू जो पाणी मन्झ बपतिस्मा दितेया; होर तेबे भी जाहिर हुआ जेबे यीसू मसीह मरी गया ता तेसरे सरीरा ले खून बैह्या; होर परमेसरा री पवित्र आत्मे ये गुआही दिती कि यीसू मसीह परमेसरा री तरफा ले आईरा था होर पवित्र आत्मा सच्चा री गुआही देआ। 7 होर एस गुआही जो देणे वाले तीन ऐं; 8 आत्मा, जो परमेसरा री आत्मा ई। पाणी, जो मसीहा रा बपतिस्मा। होर खून, जो यीसू मसीह री मौत ई। होर तीन्हो एक ई गला री गुआही देहां ऐं। 9 जेबे आस्से माह्णुंआं री गुआही मनी लैहां ऐं, ता परमेसरा री गुआही जो आस्से की नी मनी सकदे; होर परमेसरा री गुआही येई कि, तिन्हें आपणे मह्ठे रे बारे मन्झ गुआही दितिरी। 10 जो परमेसरा रे मह्ठे पर विस्वास करहा; से आपणे मना मन्झ विस्वास करहा कि जो कुछ परमेसरे बोलिरा से सच्चा आ। जिन्हें जे परमेसरा पर विस्वास नी कितेया; तिन्हें परमेसरा जो झूठा ठैहराया, क्यूंकि तिन्हें तेस गुआही पर विस्वास नी कितेया, जो परमेसरे आपणे मह्ठे रे बारे मन्झ दिती। 11 होर से गुआही सेई कि, परमेसरे आस्सा जो अनंत जिन्दगी दिती; होर ये जिन्दगी तेसरे मह्ठे यीसू रे ज्रीए आस्सो मिलिरा। 12 जेस वाले मह्ठा वास करहा आ, तेस वाले अनंत जिन्दगी ई; होर जेस वाले परमेसरा रा मह्ठा वास नी करदा आ, तेस वाले अनंत जिन्दगी भी नी ई। अनंत जिन्दगी 13 हांऊँ ये चिठ्ठी तिन्हा लोका जो लिख्हा आ, जो परमेसरा रे मह्ठा रे नांऊँआं पर विस्वास करहा ऐं, मै यूँ गल्ला इधी कठे लिखीरी; कि तुस्से जाणी सको कि, अनंत जिन्दगी तुस्सा री ई। 14 जो हिम्मत आस्सा जो परमेसरा रे साम्हणें हुंहाँ ईं, से येई कि, अगर आस्से तेसरी इच्छा रे मताबक कुछ मांगे ता से आस्सा री सुणहां। 15 होर जेबे आस्से जाणहां ऐं कि, जो कुछ आस्से परमेसरा ले मांघ्हा ऐं, से आस्सा री सुणहां, ता ये भी जाणहां ऐं कि, जो कुछ आस्से तेस ले मान्गेया, से आस्से तेस ले पाई लईरा। 16 अगर कोई आपणे विस्वासी भाई होर बैहणा जो एह्ड़ा पाप करदे देखे, जेसरी सजा मौत नी हो, ता तेसरे कठे प्रार्थना करहा, होर परमेसरा तेस प्रार्थना री वजह ले तेस जो जिन्दगी देणी, जिन्हें एह्ड़ा पाप कितिरा हो। एक पाप एह्ड़ा भी आ जेसरी सजा मौत ई होर एसरे बारे मन्झ मै प्रार्थना करणे रे कठे नी बोल्दा। 17 सब तरहा रा बुरे काम ता पाप आ, पाप एह्ड़ा भी हुआ जेसरी सजा मौत नी ई। आखरी गल्ला 18 आस्से जाणहां ऐं कि जो कोई परमेसरा रे बच्चे ऐं, से बार-बार पाप नी करदा, क्यूंकि परमेसरा रे मह्ठे यीसू मसीह तिन्हो बचा होर दुस्ट सैतान तिन्हारा कुछ नी बिगाड़दा। 19 आस्से जाणहां ऐं कि, आस्से परमेसरा रे ऐं, होर सारा संसार तेस दुस्ट सैताना रे कब्जे मन्झ आ। 20 होर ये भी जाणहां ऐं कि, परमेसरा रा मह्ठा प्रभु यीसू मसीह आईरा होर तिन्हें आस्सा जो समझ दितिरी कि, आस्से तेस सच्चे परमेसरा जो जाणें, होर आस्से तेसरे मह्ठे यीसू मसीह मन्झ जो सच्च आ, वास करहा ऐं। सच्चा परमेसर होर अनंत जिन्दगी सेई आ। 21 हे बच्चेयो, आपणे आपा जो तिन्हा मूर्तिया ले बचाई किन्हें रखा जो तुस्सा रे दिला मन्झ परमेसरा री जगहा लेई। |
This work is licensed under Creative Commons Attribution-ShareAlike 4.0 License.