1 यहून्ना 1 - मंडयाली नंऊँआं नियमजिन्दगी देणे वाल्आ बचन 1 आस्से तेसरे बारे मन्झ लिखदे लगिरे जो जिन्दगी देणे वाल़ा बचन आ, जो पुरे संसारा जो रचणे ले पैहले से था, जेसरे बारे मन्झ आस्से सुणेयां, होर जेस जो आस्से आपणी हाखिया ले देख्या, बल्की से आस्से ध्याना किन्हें देख्या; होर से आपणे हाथा किन्हें छुहेया। 2 (होर से जिन्दगी एस संसारा मन्झ आई, होर आस्से से देख्या, होर आस्से तेसरी गुआही ऐं। होर आस्से तुस्सा जो तेसरे बारे मन्झ दसा ऐं जो अनंत जिन्दगी ई, जो बापू साउगी था होर एस संसारा मन्झ आया।) 3 जो कुछ आस्से यीसू रे बारे देख्या होर सुणेयां तेता री खबर आस्से तुस्सा जो भी देहां ऐं, इधी कठे कि तुस्से भी आस्सा साउगी सैहभागी ऐं; होर आस्सा रा ये साथ बापू परमेसरा साउगी होर तेसरे मह्ठा यीसू मसीह साउगी आ। 4 होर ये गल्ला आस्से इधी कठे लिख्हा ऐं कि, तुस्सा री खुसी पूरी हुई जाए। परमेसरा साउगी साझेदारी 5 जो खबर आस्से यीसू ले सुणेयां, होर तुस्सा जो सुणाया करहा ऐं, से ये आ; कि परमेसर प्रयासा आ: होर तेता मन्झ कुछ भी न्हयारा नी आ। 6 अगर आस्से बोलिए कि, परमेसरा साउगी आस्सा रा साथ हाया, पर फेरी भी नह्यारे मन्झ चले, ता आस्से झूठे ऐ: होर सच्चाई पर नी चल्दे। 7 पर जिहां परमेसर प्रयासे मन्झ आ, तिहां ईं आस्सा जो भी प्रयासे मन्झ चलणा चहिए, ता आस्से एक दूजे किन्हें साथ रख्हा ऐं; होर तेसरे मह्ठा यीसू मसीहा रा खून आस्सा जो सभ पापा ले पवित्र करहा। 8 अगर आस्से बोलीए कि, आस्सा मन्झ कुछ भी पाप नी आ, ता आस्से आपणे आपा जो धोखा देहां ऐं: होर आस्सा मन्झ सच्चाई नी ई। 9 अगर आस्से आपणे पापा जो परमेसरा साम्हणें मनी ले, ता से आस्सा रे पापा जो माफ करणे, होर आस्सा रे सभ गुनाह पवित्र करणे, क्यूंकि से वफादार होर धर्मी आ। 10 अगर आस्से बोलिए कि आस्से पाप नी कितेया, ता आस्से परमेसरा जो झूठा बणाहें, होर तेसरा बचना जो आस्से ग्रहण नी कितिरा। |
This work is licensed under Creative Commons Attribution-ShareAlike 4.0 License.