1 कुरिन्थियो 6 - मंडयाली नंऊँआं नियमआपु मन्झ लड़ाई-झगड़े रा फैसला करणा 1 अगर तुस्सा रा केसी दूजे विस्वासी साउगी झगड़ा हुंहाँ, ता तुस्से अविस्वासी न्यायधीस वाले देख्या जांदे। तुस्सा जो तुस्सा री कलीसिया रे केसी लोका जो बोलणा चहिए कि, से तुस्सा री लड़ाई रा फैसला करहे कि कुण सही आ कुण गलत। 2 तुस्से जाणांहे कि, आऊणें वाले ध्याड़े मन्झ परमेसरा रे पवित्र लोका संसारा रे लोका रा न्याय करणा। इधी कठे जेबे तुस्सा मन्झ छोटी-मोटी लड़ाईया हुई ता तुस्से जरुर फैसला करी सके कि कुण सही आ होर कुण गलत। 3 तुस्से जाणांहे कि आस्सा ही आऊणें वाले ध्याड़े मन्झ स्वर्गा ले सटीरे स्वर्गदूता रा न्याय करणा, ता सच्चे आस्से एस जिन्दगी मन्झ हूंणे वाली छोटी-छोटी गल्ला रा फैसला करी सके। 4 होर अगर एह्ड़ी गल्ला आई ता तिन्हारे फैसला करणे रे कठे एह्ड़े लोका वाले नी लेई जाणा चहिए, जिन्हारा कलीसिया रे लोक आदर नी करदे। 5 हांऊँ ये गल तुस्सा जो सर्मिन्दा करणे रे कठे बोली करहा; क्या सच्चे तुस्सा मन्झा ले एक भी समझदार नी आ, जो आपणे विस्वासी भाईया होर बैहणा रे झगड़े रा फैसला करी सका? 6 बल्कि एक विस्वासी दूजे विस्वासी रे खलाफ मुकद्दमे जो लेई किन्हें अविस्वासी न्यायधिसा वाले जा। होर स्यों एस कामा जो अविस्वासी लोका रे साम्हणें करहे। 7 पर सच्च गल ता येई कि तुस्सा रे बीचा मन्झ कानूनी मुकद्दमे चलणे रा मतलब ये हुआ कि तुस्से एक मसीही जिन्दगी जीणे मन्झ हारी गईरे। इधी कठे कोई होर मसीही भाई या बैहण तुस्सा किन्हें गलत करहे, या धोखे किन्हें तुस्सा रा कुछ लेई ले ता तेता रे बदले मन्झ तुस्से कुछ मत करहा। 8 पर तुस्से ता आपु अन्याय होर नुकसान करहा ऐं, होर आपणे ई विस्वासी भाई बैहणा जो लुट्हा ऐं। 9 तुस्से पक्का जाणांहे कि, अन्याय करणे वाले लोक परमेसरा रे राजा रे वारस नी हूंणे। कोई तुस्सा जो ये गल बोली किन्हें धोखा नी दे कि, तुस्से बुरे काम करी किन्हें भी परमेसरा रे लोक बणी सके। वेस्यागामी, मूर्तिपूजक, व्यभिचारी, लुच्चे ल्फंगे होर समलैंगिक, 10 चोर, लोभी, सराबी, गाली देणे वाले, होर अंधेर करणे वाले लोका परमेसरा रे राजा रे वारस नी हुणा। 11 होर तुस्सा मन्झा ले कुछ लोक पैहले एह्ड़े ई थे, पर प्रभु यीसू मसीह रे नांऊँआं ले होर परमेसरा री दितिरी आत्मा ले तुस्सा रे पाप धोई दितिरे, ताकि तुस्से पवित्र होर परमेसरा री नजरा मन्झ धर्मी बणी सको। सरीर होर आत्मा मन्झ परमेसरा री महिमा 12 तुस्से बोली सके कि, हांऊँ सभ चीजा करी सक्हा क्यूंकि हांऊँ एक विस्वासी आ; पर सभ चीजा मेरे फायदे रे कठे नी ई। हांऊँ सभ चीजा करी सक्हा, क्यूंकि हांऊँ एक विस्वासी आ, पर मां केसी भी गल्ला जो आपणे गास हावी नी हूंणे देणा। 13 तुस्से ये भी बोली सके कि, खाणा पेटा रे कठे, होर पेट खाणे रे कठे आ, ये ता सच्च आ, पर परमेसरा यूँ दुहें नास करी देणे। आस्सा रे सरीर भी व्यभिचारा रे कठे नी ऐं, पर आस्सा रा सरीर प्रभु रा होर एता ले प्रभु री सेऊआ करणी चहिए। 14 पर आस्सा रा सरीर इधी कठे भी खास आ क्यूंकि जिहां परमेसरे आपणी सामर्था ले प्रभु यीसू मसीह जो मरिरे मन्झ ले जिउंदा कितेया, तिहां ही तेस आपणी सामर्थ किन्हें आस्से मरिरे मन्झ ले जिउंदे करणे। 15 तुस्से सच्चे जाणांहे कि तुस्सा रे सरीर मसीहा रे अंग ऐं। ता क्या आस्सो मसीहा रे एस अंगा जो लेई किन्हें वेस्या रे अंगा किन्हें जोड़ना चहिए? नी कधी नी। 16 तुस्से पक्का जाणांहे कि, पवित्र सास्त्रा मन्झ लिखिरा कि, “तिन्हा दुहींया एक बणी जाणा।” इधी कठे तुस्सा जो पता हूंणा चहिए कि जो एक वेस्या किन्हें जुड़ी जाहाँ से तेस्सा वेस्या किन्हें एक बणी जाहाँ। 17 होर जो प्रभु साउगी जुड़ी जाहाँ, तेसरी आत्मा होर प्रभु री आत्मा एक बणी गईरी। 18 पूरी तरहा व्यभिचारा ले बची किन्हें रहा; एसरे अलावा माह्णुं रे ज्रीए कितिरा कोई भी पाप तेसरे सरीरा जो प्रभाव नी करदा, पर व्यभिचार करणे वाल़ा आपणे ई सरीरा रे बरखलाफ पाप करहा। 19 तुस्से सच्चे जाणांहे कि, तुस्सा रा सरीर से मन्दर आ जेस मन्झ पवित्र आत्मा वास करहा; जो ये पवित्र आत्मा परमेसरे तुस्सा जो दितिरी, होर तुस्से आपु आपणे नी ऐं पर परमेसरा रे। 20 क्यूंकि परमेसरे तुस्सा रे कठे बौह्त बडी कीमत चुकाईरी, जेबे तिन्हें यीसू मसीह जो क्रूसा प्रयाल्हे बलिदान कितेया, इधी कठे आपणे सरीरा ले परमेसरा री महिमा करा। |
This work is licensed under Creative Commons Attribution-ShareAlike 4.0 License.