1 कुरिन्थियो 5 - मंडयाली नंऊँआं नियमकलीसिया मन्झ अनैतिकता 1 कुछ लोके मुंजो दसिरा कि तुस्सा री कलीसिया मन्झ कुछ लोक व्यभिचार मन्झ पई गईरे, पर एह्ड़ा व्यभिचार जो अन्यजाति लोके मन्झ भी नी हुन्दा। एक माह्णुं आपणी सौतेली माऊआ किन्हें नजायज रिस्ता रख्हा। 2 होर तुस्सा जो ता एस गल्ला ले दुखी हुणा चहिए था, होर जिन्हें माह्णुं एह्ड़ा कितेया से कलीसिया ले काढी देणा चहिए था, एता रे बजाय तुस्से एस गल्ला मन्झ घमंड करहे। 3 भले ही हांऊँ तुस्सा ले दूर आ, पर एह्ड़ा लगेया कि आपणे मना ले हांऊँ तेथी आ, होर मैं एह्ड़े काम करणे वाले रे खलाफ फैसला करी चुकिरा। 4 होर तुस्से एह्ड़ा करणा चहिए कि तुस्से सब विस्वासी लोक हूंणे रे नाते कठ्ठा हो, ये जाणदे हुए की तुस्सा वाले आस्सा रे प्रभु यीसू मसीह रा दितिरा हक हाया। होर एह्ड़ा कि हांऊँ भी आपणे मना ले तेथी आ। होर तेबे यीसू मसीह री सामर्था ले, 5 तेस पाप करणे वाले माह्णुं जो आपणी कलीसिया ले काढी देआ, होर वापस तेस जो सैताना रे हका मन्झ सौंपी देआ, क्या पता से पाप करणा छाडी दे। क्यूंकि अगर से पाप करना छाडी दे ता जेस ध्याड़े प्रभुआ न्याय करणा पक्का तेस ध्याड़े तेस बची जाणा। 6 तुस्से एस तरीके किन्हें घमंड करणा छाडी दो; तुस्से जाणांहे कि, ये पाप थोह्ड़ा जे स्जेड़ा साहीं आ जो पुरे आटे जो स्जेड़ा करी देहां। 7 तुस्सा जो एस पापी माह्णुं जो आपणे मन्झ ले काढी देणा चहिए, जिहां कि यहूदी लोक फसहा रा साजा हूंणे ले पैहले आपणे-आपणे घरा ले स्जेड़ा काढी दे। तेबे तुस्सा अस्जेह्ड़ा रोटी बणी जाणा, यानि तुस्सा विस्वासिया रे एक एह्ड़े झुंडा बणी जाणा, जिन्हारे बीचा मन्झ जाणी बुझी किन्हें पाप करणे वाल़ा कोई माह्णुं नी हुंदा। क्यूंकि जेबे तुस्से मसीह पर विस्वास कितेया था, परमेसरे तुस्से अंदरा ले साफ करी दितिरा था। मसीह आस्सा रे पापा कठे मारी दितेया होर से तेस छेलु साहीं आ जेस जो यहूदी फसहा रे साजे रे टैमा बलि चढ़ाहें थे। 8 इधी कठे आऊआ आस्से आपणे फसहा रा साजा मनाहें। जिहां यहूदी स्जेड़ा बाहर काढेया, तिहां ही आस्से आपणे पुराणे पापा रे स्वभावा जो छाडी दे, होर जिहां यहूदी स्जेड़ी रोटी खाएं थे, आस्सो भी परमेसरा रे लोका साहीं जीणा चहिए, जिन्हा मन्झ कोई बुराई नी हुन्दी, यानि आपणे दिला मन्झ चलाकीया री गल्ला जो काढी किन्हें सच्चाई किन्हें यीसू मसीह साउगी चलना चहिए। अनैतिकता रे कठे न्याय 9 मैं जो चिठ्ठी तुस्सा जो पैहले लिखिरी थी, तेता मन्झ मैं तुस्सा जो बोलिरा था कि व्यभिचारी लोका री संगत नी करणी। 10 मेरा ये बिल्कुल मतलब नी था कि तुस्से एस दुनिया रे व्यभिचारिया, लालची, ठगणे वाले या मूर्ति पूजणे वाले किन्हें कोई रिस्ता नी रखा; अगर तुस्सा जो एह्ड़ा करणा ता तुस्सा जो एस संसारा जो छाडणा पऊणा। 11 पर मेरा बोलणे रा मतलब ये आ; कि एह्ड़े आदमी साउगी कोई नाता नी रखा जो आपणे आपा जो मसीह रा विस्वासी बोल्हा पर व्यभिचारी, लालची, मूर्ति पूजा करणे वाल़ा, गाली देणे वाल़ा, सराबी या ठगणे वाल़ा हो, ता तेस माह्णुं साउगी खाणा भी नी खाणा। 12 क्यूंकि कलीसिया ले बाहरवाले लोका रा फैसला करणा मेरा काम नी आ। पर कलीसिया रे लोका जो डांटणे रा काम सच्चे तुस्सा रा। 13 कलीसिया रे बाहरले लोका रा फैसला ता परमेसरा करणा, पर जिहां पवित्र सास्त्रा मन्झ लिखिरा कि तुस्से केसी भी गंदे काम करणे वाले माह्णुं जो आपणे किन्हें रिस्ता मत रखणा देआ। |
This work is licensed under Creative Commons Attribution-ShareAlike 4.0 License.