1 कुरिन्थियो 4 - मंडयाली नंऊँआं नियममसीह मन्झ विस्वास लायक चुणिरे चेले 1 तुस्से आस्सा जो मसीह रे सेऊआदार समझा जिन्हा जो परमेसरा रे लुख्ही रे ज्ञाना जो लोका जो समझाणे रा काम सौंपी दितिरा। 2 एता ले बढ़ी किन्हें, परमेसरे जेस जो ये काम करणे जो दितिरा जरूरी आ कि से भरोसे रे लायक हो ताकि से एस दितिरे कामा जो पूरा करी सके। 3 पर हांऊँ एस गल्ला री फिकर नी करदा कि, तुस्से या कोई होर लोक मेरे बारे मन्झ ये बोल्हे कि ये भरोसे रे लायक हाया की नी आ, सच्च ता ऐं आ कि हांऊँ आपणे बारे मन्झ भी ये नी बोलदा कि हांऊँ भरोसे रे लायक हाया की नी। 4 मेरी अंतरात्मा मुंजो केसी गल्ला मन्झ दोसी नी बणान्दी, फेरी भी एता ले हांऊँ बेकसूर नी बणदा, क्यूंकि परमेसर मेरा परखणे वाल़ा होर से ही मुंजो बेकसूर साबित करहा। 5 इधी कठे आस्सा रे प्रभु रे वापस आऊणें रे ध्याड़े तक कोई केसी रा न्याय नी करहे; क्यूंकि परमेसरा ही लोका रे मना रे मन्झ लुख्ही रे सारे विचार जाहिर करणे जिन्हों कोई नी जाणदा। होर माह्णुंआं रे मना रे विचार जाहिर करणे, होर तेबे परमेसरा हर एक माह्णुं री बड़ाई करणी। मसीह रे कठे नर्क्कले 6 हे भाईयो होर बैहणो, मैं अपुल्लोस होर आपणे बारे मन्झ तुस्सा जो इधी कठे दसेया कि तुस्से आस्सा जो एक उदाहरणा साहीं लेई सको, होर तुस्से एस कहाबता रा मतलब सीखी सको, “पवित्र सास्त्रा मन्झ जो लिखिरा तिन्हा गल्ला ले अगे मत बढ़ा।” ये खरा नी आ कि तुस्से केसी एकी जो इज्जत देई किन्हें बडा बणाओ, होर दूजे जो बेज्जत करी किन्हें नीचा दसा। 7 कुण बोल्हा कि तू केसी दूजे ले खरा आ? होर जो सभ कुछ तेरे वाले आ से परमेसरे तुजो दितिरा। होर जेबे परमेसरे ही तुजो सभ कुछ दितिरा, ता तुजो कोई हक नी आ तू केसी भी गल्ला मन्झ बडयाई करहे। 8 तुस्सा जो एह्ड़ा लगा कि तुस्सा री सारी आत्मिक जरूरता पैहले ले पूरी हुई गईरी, होर तुस्सा जो लगा कि तुस्से पैहले ले ही स्यों सारे बरदान मिली गईरे, जो पवित्र आत्मा आपणे लोका जो देआ; होर तुस्से लगा कि तुस्से आस्सा बगैर ही परमेसरा रे राजेया मन्झ राज करदे लगिरे। हांऊँ खुस हुई जांदा अगर तुस्से सच्चे राज करदे, ताकि आस्से भी तुस्सा साउगी राज करदे। 9 मुंजो एह्ड़ा लगी करहा कि परमेसरे आस्से चुणिरे चेलेया जो सभी ले पिछली जगहा मन्झ रखिरा, यानि तिन्हा कैदिया साहीं जिन्हों राजा रे लड़ाई रे बादा मन्झ हूंणे वाली, जितिरी यात्रा मन्झ सभी री पिछली जगहा मन्झ रखायें। जिन्हारा जंगली जानवरा रा मारणा सभ लोक देख्हे; एथी तक लोक ही नी पर स्वर्गदूता होर सारे माह्णुं आस्सो देख्हे, जिहां कि स्यों तमासा देखी करहे। 10 आस्से चुणिरे चेले आपणे आप जो नर्क्कले समझे, क्यूंकि आस्से मसीह रे बारे मन्झ प्रचार करहे; पर तुस्से कुरुन्थी सैहरा रे विस्वासी लोके गलती किन्हें आपणे आपा जो बुद्धिमान मसीह लोक समझी लईरा! बहुत लोक आस्सा चुणिरे चेलेया रे बारे मन्झ समझे कि आस्सा चुणिरे चेले वाले कोई हक नी आ; पर तुस्से बड़े बडयाई किन्हें बोले कि तुस्सा वाले परमेसरा री दितिरी सामर्थ ई, लोक आस्सा री इज्जत नी करदे पर स्यों तुस्सा री इज्जत करहे। 11 आजके ध्याड़े तक आस्से भूखे-सोखे होर पुराणे फटीरे-फुटीरे कपड़े पैहने ऐं, होर लोके आस्से मारिरे होर कुटीरे, होर आस्सा वाले रैहणे कठे घर नी ऐं। 12 होर आस्से आपणे हाथा ले मैहनत करहा ऐं। जेबे लोक आस्सा जो बुरा बोल्हा ऐं, ता आस्से तिन्हो आसरीवाद देहां ऐं; जेबे लोक आस्सो स्ताहें, ता आस्से सबरा किन्हें सैहन करहा ऐं। 13 जेबे लोक आस्सा जो बदनाम करहा ऐं, तेबे भी आस्से बड़ी दया किन्हें जबाब दें। आज भी लोक आस्सा री इज्जत नी करदे होर ना आस्सा री कोई कीमत ई, क्यूंकि लोक आस्सो संसारा रा गंद होर कूड़ा-करकट समझे। पौलुसा रे उदाहरणा जो मनणे री सलाह 14 हांऊँ तुस्सा जो ये गल्ला सर्मिन्दा करणे रे कठे नी पर सुधारणे रे कठे लिखी करहा, क्यूंकि तुस्से सभ मेरे बच्चे साहीं ऐं जिन्हा किन्हें हांऊँ बौह्त प्यार करहा। 15 हालांकि मसीह हूंणे रे नाते तुस्सा रे स्खाणे वाले बौह्त सारे गुरु भी हुंगे, पर तुस्सा रा बापू एक ऐ आ। होर तुस्सा जो सभी ले पैहले खुसी री खबर सुणाणे री वजहा ले हांऊँ तुस्सा रा आत्मिक बापू बणेया। 16 इधी कठे हांऊँ तुस्सा ले अर्ज करहा कि, जिहां हांऊँ मसीह साहीं जिन्दगी जीहां, तिहां ईं तुस्से भी मेरे साहीं जिन्दगी जिया। 17 इधी कठे मैं तिमिथियुस तुस्सा वाले भेजिरा। हांऊँ तेजो एक मह्ठे साहीं प्यार करहा, होर से प्रभु रा भरोसे लायक सेऊआदार आ तेस तुस्सा जो दसणा कि हांऊँ क्या करहा होर कियां मसीह यीसू रा चेला बणी किन्हें जियां, ठीक स्यों गल्ला जो हांऊँ हर जगहा री सभ कलीसिया रे लोका जो सखा। 18 तुस्सा मन्झा ले कुछ लोक ता एह्ड़ा सोचे कि मां तुस्सा वाले आई किन्हें नी मिलणा, इधी कठे तुस्से घमंडी बणी गईरे। 19 पर प्रभु चाहे ता मां तुस्सा वाले जल्दी जे आई जाणा, होर मां इन्हा घमंडी लोका री गल्ला जाणी लैणी, होर तिन्हारी सामर्था रा पता भी ल्गाई लैणा। 20 क्यूंकि परमेसरा रा राज बौह्त सारी गल्ला रा नी, बल्कि परमेसरा री सामर्था किन्हें जिन्दगी जीणा। 21 जेबे हांऊँ तुस्सा वाले आऊँ ता तुस्से क्या चाहें कि हांऊँ करूं? अगर तुस्से आपणी बुरी गला ले नी सुधरी रे हुंगे ता मां आपणे तरीके ले तुस्से सुधारणे, पर अगर तुस्से सुधरी गईरे हुंगे ता मां तुस्सा पर नम्रता दसणी, होर दसणा कि हांऊँ तुस्सा किन्हें कितना प्यार करहा। |
This work is licensed under Creative Commons Attribution-ShareAlike 4.0 License.