1 कुरिन्थियो 3 - मंडयाली नंऊँआं नियम

माह्णुंआं रा मताबक चलना ठीक नी

¹ हे भाईयो होर बैहणो, जेबे हांऊँ तुस्सा साउगी था तेबे हांऊँ तुस्सा जो गहरी गल्ला नी सखाई सकेया जिहां जे आत्मिक लोका जो सखाई जांहीं। मुंजो तुस्सा लोका किन्हें तिहां गल्ला करणी पई जिहां तुस्से संसारिक लोक ऐं, या एह्ड़ा जिहां तुस्से मसीह जिन्दगी मन्झ ऐबे भी बच्चे ऐं।

² तेस टैम मैं तुस्सा जो परमेसरा री खबरा ले सिर्फ हल्की गल्ला सखाईरी थी, जिहां कि एक बच्चे जो दूध प्याहें। पर परमेसरा री बचना री डुघ्ही गल्ला नी सखाई जेह्ड़ी नाजा साहीं ई, क्यूंकि तेता रे कठे तुस्से हाल्ले त्यार नी थे।

³ क्यूंकि तुस्से हाल्ले भी संसारा रे लोका साहीं ऐं, इधी कठे जेबे तुस्सा मन्झ जल्नी होर झगड़ा हूँआ ता से एस गल्ला जो साबित करहा कि तुस्से हाल्ले भी संसारा रे लोका साहीं ऐं। होर तुस्से तिन्हा लोका साहीं जीहां ऐं जो प्रभु रे लोक नी ऐं?

⁴ इधी कठे कि जेबे एक बोल्हा कि, “हांऊँ पौलुसा रा चेला आ,” होर दूजा बोल्हा कि, “हांऊँ अपुल्लोसा रा चेला आ,” ता एह्ड़ा बोली किन्हें तुस्से संसारा रे लोका साहीं बर्ताव करहा ऐं।

परमेसरा रे सेऊआदारा री सेऊआ

⁵ ता फेरी सोचा कि अपुल्लोस कुणहां? होर हांऊँ पौलुस कुणहां? आस्से ता सिर्फ परमेसरा रे सेऊआदार ऐं जिन्हारे ज्रीए तुस्से मसीह पर विस्वास कितेया, होर आस्सा मन्झा ले सभीए से काम कितेया जो परमेसरे दितेया।

⁶ अगर हांऊँ तुस्सा री तुलना डोरिया साउगी करूं ता हांऊँ तेस साहीं आ जो बेजा बाहां, होर अपुल्लोस तेस माह्णुं साहीं आ जो पाणी देआ, पर एस डाला जो बधाणे वाल़ा परमेसर ई आ।

⁷ इधी कठे डाल लगाणे वाल़ा होर पाणी देणे वाल़ा दुहें कुछ नी ऐ। सिर्फ परमेसर ही बडा जिन्हें एस डाला जो बधाया।

⁸ एक डाल लगाणे वाले साहीं मैं तुस्सा जो खुसी री खबर सुणाई होर परमेसर रा बचन स्खाणा सुर्हू कितेया होर अपुल्लोसे पाणी देणे वाले साहीं तुस्सा जो लगातार सिखांदा रैहया, होर आस्सा दुहीं रा एक ऐं मकसद आ, पर परमेसरा आस्सा दुहीं जो आस्सा री मैहनता रे मताबक इनाम देणा।

⁹ क्यूंकि आस्से परमेसरा रे सहकर्मी ऐं, होर तुस्से सभ विस्वासी लोक परमेसरा री एक खेती साहीं ऐं जो तेसरी ई। होर हांऊँ तुस्सा री तुलना एक घरा साउगी करी सका जेस जो परमेसर बणाया करहा।

¹⁰ परमेसरे जो अनुग्रह मुंजो दितिरा, तेता रे ज्रीए मैं एक खरे राजमिस्त्री साहीं तेस घरा री निउंआं पाई, होर दूजे लोक तेस ही निउंआं पर घर बणाहें। पर हर एक माह्णुं चतन्न रहे कि से तेस निउंआं पर केह्ड़ा घर बणा।

¹¹ ये घर जो बणी करहा तेसरी नींऊँआं पेहले ले ही पाई दितिरी, जो सिर्फ यीसू मसीह आ। कोई दूजी नींऊँ नी पाई सक्दा यानि यीसू मसीह ही एक रस्ता, जेसरे ज्रीए लोक परमेसरा जो जाणी सके।

¹² अगर मसीह सेऊआदार खरी गल्ला जो स्खायें जो परमेसरे तिन्हो दितिरी, से तिन्हा घर बनाने वाले साहीं आ जो तेस निंऊँआं पर बांकी चीजा जिहां सोना या चांदी या कीमती पात्थर किन्हें घर बणाई करहे। पर अगर स्यों झूठी गल्ला स्खायें तेबे स्यों तिन्हा बणाने वाले साहीं आ जो घटिया चीजा जिहां लकड़ी, भूह या घाहा किन्हें घर बणाहें।

¹³ पर न्याय रे ध्याड़े आगिया हर केसी रे काम जाहिर करणे कि केसरे काम खरे थे होर केसरे काम बुरे थे; होर आगिया दसणा कि तेस माह्णुं रे कामा री कोई कीमत हाई की नी।

¹⁴ अगर केसी घर बणाने वाले रा काम जो तिन्हें तेस निंऊँआं पर बणान्दी बारी कितिरा हो, होर अगर से नी फुख्हे ता मसीहा तेस जो इनाम देणा।

¹⁵ पर अगर केसी घर बणाने वाले रा काम फुख्ही जान्घा ता मसीहा तेस जो इनाम नी देणा। पर तेस जो अनंत जिन्दगी मिलणी जो परमेसरे तेसरे कठे रखिरी।

¹⁶ तुस्से सच्चे जाणांहे कि तुस्से सभ परमेसरा रे मन्दरा साहीं ऐं, होर परमेसरा रा दितिरा पवित्र आत्मा तुस्सा रे बीचा मन्झ वास करहा।

¹⁷ अगर कोई परमेसरा रे लोका रा (यानि जो लोक परमेसरा रे मन्दरा साहीं ऐं) तिन्हारी एकता जो नास करघा ता परमेसरा तेस जो सजा देणी, क्यूंकि तुस्से सभ परमेसरा रे पवित्र मन्दरा साहीं ऐं।

संसारा रे ज्ञाना ले बचा

¹⁸ कोई आपणे आपा जो धोखे मन्झ नी रखे; अगर तुस्सा मन्झा ले कोई आपणे आपा जो संसारा रे लोका री नजरा मन्झ ज्ञानी सम्झहा, ता से तिन्हारी नजरा मन्झ नर्क्कले बणी जाए; ताकि तुस्से परमेसरा री नजरा मन्झ ज्ञानी बणी सके।

¹⁹ क्यूंकि एस संसारा रे लोक जिन्हा गल्ला जो ज्ञान समझे, स्यों सभ परमेसरा री नजरा रे साम्हणें नर्क्कली गल्ला ई, ये ठीक तेह्ड़ा ही आ जेह्ड़ा पवित्र सास्त्रा मन्झ लिखिरा कि, “परमेसर ज्ञानी लोका री चलाकी मन्झ तिन्हा जो फसाई देहां।”

²⁰ होर फेरी पवित्र सास्त्रा मन्झ ये भी लिखिरा कि, “प्रभु ज्ञानी लोका रे विचारा जो जाणहां कि स्यों सभ बेकार ऐं।”

^21-22 इधी कठे तुस्से बडयाई मत करा कि तुस्से केसी एक खास माह्णुं रे चेले ऐं, हांऊँ पौलुस, अपुल्लोस, पतरस सब कोई तुस्सा रे ऐं, एथी तक की सब कुछ तुस्सा रा ही आ यानि संसारा री चीजे, अगर तुस्से जिउंदे हो, या मरी गईरे हो, वर्तमान, भविस्य भी। सभ कुछ तुस्सा रा ही आ,

²³ होर तुस्से मसीहा रे ऐं, होर मसीह परमेसरा रा आ।