1 कुरिन्थियो 2 - मंडयाली नंऊँआं नियमपौलुसा री मजबूत गल्ला 1 हे भाईयो होर बैहणो, जेबे हांऊँ तुस्सा वाले आया होर मैं तुस्सा जो परमेसरा री खबरा रे बारे मन्झ दसेया, ता मैं बडी-बडी गल्ला नी बोली होर ना ही मैं आपणे आपा जो बडा ज्ञानवान दसेया। 2 क्यूंकि मैं ये फैसला करी लईरा था कि, मैं सिर्फ यीसू मसीह रे बारे मन्झ होर क्रूसा प्रयाल्हे तेसरी मौता रे बारे मन्झ ही गल करणी। 3 जेबे हांऊँ तुस्सा रे बीच रैंहयां था हांऊँ कमजोर था होर डरा साउगी काम्दा रैंहयां था। 4 मेरा सिखाणा होर मेरा प्रचार करणा माह्णुंआं रे ज्ञाना रे मताबक लुभाणे वाली गल्ला रे ज्रीए नी था, पर पवित्र आत्मे सामर्थी रूपा किन्हें जाहिर कितेया कि जो खबर मैं तुस्सा जो दसी से सच्च थी। 5 ताकि तुस्सा रा विस्वास माह्णुंआं रे ज्ञाना पर नी, पर परमेसरा री सामर्था पर निर्भर हो। आत्मिक ज्ञान 6 फेरी भी हांऊँ तिन्हा लोका जो जेह्ड़े आत्मिक रूपा ले स्याणे तिन्हारे बीचा मन्झ ज्ञाना री गल्ला रा प्रचार करहा; पर ये ज्ञान माह्णुंआं रा ज्ञान नी आ, होर एस संसारा रे हाकमा रा भी ज्ञान नी आ जिन्हारा नास हूंणे वाल़ा आ। 7 पर आस्से परमेसरा रे तेस ज्ञाना रे बारे मन्झ दस्हा ऐं जो लुख्ही रा था, जेस जो ऐबे तक हाल्ले केसिए नी समझ्या। पर आस्सा पर ये गल जाहिर हुईरी कि परमेसरे सृस्टी जो रचणे ले पेहले ही आपणे ज्ञाना मन्झ ये तय कितेया कि आस्सा जो तेसरी महिमा मिलणी। 8 परमेसरा री गल्ला जो एस संसारा रे हाकमा मन्झा ले केसिए नी समझ्या, क्यूंकि अगर स्यों समझ्दे, ता स्यों तेस महिमामय प्रभु जो क्रूसा प्रयाल्हे नी चढ़ान्दे। 9 पर ये ही गल जो पवित्र सास्त्रा मन्झ लिखिरी; “जो कधी हाखिये ले नी सुझ्या, होर जो कधी काना ले नी सुणेया, होर जो गल माह्णुंआं रे दिला मन्झ नी आई, एह्ड़ी गल्ला परमेसरे आपणे प्यार रखणे वाले रे कठे त्यार कितरी।” 10 पर परमेसरे यूँ गल्ला पवित्र आत्मा रे ज्रीए आस्सा चुणिरे चेले पर जाहिर किती; क्यूंकि पवित्र आत्मा सभ गल्ला जो तोप्हा ई, बल्की परमेसरा री गुप्त गल्ला जो भी। 11 तुस्से ही से माह्णुंऐ जो जाणी सके कि तुस्सा रे मना मन्झ क्या विचार आ, ठीक तिहां ईं परमेसरा री आत्मा ही परमेसरा रे मना रे विचारा जो जाणी सक्हा ई। 12 पर आस्सा रा सोच विचार संसारा रे माह्णुंआं साहीं नी आ, पर परमेसरे आस्सो आपणी आत्मा दितिरी, ताकि आस्से तिन्हा गल्ला जो जाणें, जो परमेसरे आस्सा जो आपणे अनुग्रह ले दितिरी। 13 होर इधी कठे आस्से इन्हा गल्ला जो दूजेया जो भी दसाहें, आस्से आत्मिक लोका रे कठे आत्मिक सच्चाईया रा बखान माह्णुंआं रे स्खाईरे ज्ञाना रे सब्दा किन्हें नी करदे, पर पवित्र आत्मा रे स्खाईरे सब्दा किन्हें करहा ऐ। 14 पर सांसारिक माह्णुं परमेसरा री आत्मा री सच्चाई जो नी मन्नदा, होर स्यों गल्ला तेसरी नजरा मन्झ नर्क्कले री गल्ला ई। क्यूंकि पवित्र आत्मा जेस मन्झ वास करहा, से ही माह्णुं इन्हा गल्ला री कीमता जो परखी सक्हा। 15 जिन्हें पवित्र आत्मा पाईरी से ही पवित्र आत्मा री सखाईरी सभ गल्ला जो परखी सक्हा, पर जिन्हा वाले पवित्र आत्मा नी, स्यों तिन्हा लोका रे विचारा जो नी परखी सकदे जिन्हा वाले पवित्र आत्मा ई। 16 ये गल सच्ची क्यूंकि पवित्र सास्त्रा मन्झ लिखिरा कि, “प्रभु रे मना री गल्ला जो कोई नी जाणी सकदा। होर कोई भी परमेसरा जो स्खाई नी सक्दा।” पर आस्से विस्वासी लोक मसीह रे मना री गल्ला जो समझी सक्हा ऐं। |
This work is licensed under Creative Commons Attribution-ShareAlike 4.0 License.