1 कुरिन्थियो 15 - मंडयाली नंऊँआं नियम

पौलुसा री मसीह री खुसी री खबर होर मसीह रा जी उठणा

¹ हे भाईयो होर बैहणो, हांऊँ तुस्सा जो सेई खुसी री खबर याद कुराहां, जो हांऊँ तुस्सा जो पैहले सुणाई बैठीरा, जेता पर तुस्से पैहले विस्वास भी कितिरा था, होर जेस पर तुस्सा रा विस्वास मजबूत बणीरा।

² अगर तुस्से एस खुसी री खबरा पर जेता रा मैं प्रचार कितिरा, तेता पर तुस्सा रा विस्वास बणी रैहन्गा ता परमेसरा तुस्सा रा उद्धार करणा; अगर तुस्सा रा विस्वास कमजोर हुई जाए ता तेता री कोई कीमत नी, होर से बेकार आ।

³ एस वजहा ले मैं तुस्सा जो सभी ले खास संदेस दसेया जो मैं प्रभु यीसू ले मिलेया। होर से संदेस ये आ: कि पवित्र सास्त्रा रे बचना रे मताबक यीसू मसीह आस्सा रे पापा रे कठे मरी गया।

⁴ होर दफनाया गया; होर पवित्र सास्त्रा रे मताबक से त्रीजे ध्याड़े मरिरे मन्झ ले जिउंदा हुई गया।

⁵ होर फेरी से पतरसा जो सूझेया होर तेता ले बाद से बारा चेलेया जो भी सुझ्या।

⁶ तेता ले बाद से पांज सौ ले भी ज्यादा चेलेया जो सुझ्या, जिन्हा मन्झा ले बौह्त आज तक जीऊन्दे ऐं, जेब्की कुछ लोका री मौत हुई चुकीरी।

⁷ फेरी से याकूबा जो सुझ्या, होर सभ चुणिरे चेलेया जो भी सुझ्या।

⁸ होर सभी ले बाद तिन्हें आपणे आपा जो मेरे पर जाहिर कितेया, जो तेस बच्चे साहीं आ जेसरा जन्म ठीक टैमा पर नी हुईरा हो।

⁹ क्यूंकि हांऊँ चुणिरे चेले मन्झ सभी ले कम खास आ, बल्की चुणिरा चेला बणने रे लायक भी नी आ, क्यूंकि मैं परमेसरा री कलीसिया रे लोक स्ताईरे थे।

¹⁰ पर अगर आज हांऊँ चुणिरा चेला आ ता परमेसरा रे अनुग्रह ले आ, होर तिन्हें जो अनुग्रह मेरे पर कितेया, से बेकार नी हुआ। पर मैं तिन्हा दूजे चुणिरे चेलेया ले बढ़ी किन्हें मैहनत किती; तेबे बी ये मेरी तरफा ले नी हुएया, पर परमेसरा रे अनुग्रहे मेरी बड़ी मदद किती कि हांऊँ तेसरा काम करी सकूं।

¹¹ इधी कठे चाहे हांऊँ आ, या चाहे दूजे चुणिरे चेले हो, आस्से सभ मसीह रे बारे मन्झ ही प्रचार करहा ऐं, होर एता पर ई तुस्से विस्वास कितेया।

मरिरे लोका रा जी उठणा

¹² ऐबे हांऊँ तुस्सा किन्हें ये बोलणा चाहां: इधी कठे कि आस्से सभिये तुस्सा किन्हें ये प्रचार कितेया कि परमेसरे मसीह जो तेसरे मरणे रे बाद मरिरे मन्झा ले जिउंदा कितेया, ता तुस्सा मन्झा ले कोई ये नी बोल्हे कि, परमेसरा विस्वासी लोक मरणे ले बाद जिउंदे नी करणे!

¹³ अगर मरणे ले बाद जी उठणा नी हुन्दा, ता फेरी मसीह भी मरिरे मन्झ ले जिउंदा नी हुआ।

¹⁴ होर अगर मसीह मरिरे मन्झ ले जिउंदा नी हुएया, ता फेरी जेस खबरा रा आस्सा रा प्रचार करहे से भी बेकार आ, होर तुस्सा रा मसीह पर विस्वास करणे रा कोई मतलब नी आ।

¹⁵ अगर मरिरे आदमी रा जी उठणा नी हुन्दा, ता फेरी आस्से भी परमेसरा रे बारे मन्झ तुस्सा किन्हें झूठ बोल्या कि तिन्हें मसीहा जो मरिरे मन्झ ले जिउंदा कितेया, जेबे कि तिन्हें से सच्चे नी कितेया।

¹⁶ हांऊँ तुस्सा किन्हें भी बोल्हा, क्यूंकि अगर कोई भी आदमी आपणे मरणे ले बाद जिउंदा नी हुंदा, ता मसीहा भी आपणे मरणे रे बाद जिउंदा नी हुईरा।

¹⁷ होर अगर मसीह जिउंदा नी हुएया, ता तुस्सा रा मसीह पर विस्वास करणे रा कोई मतलब नी आ; होर तुस्से हली तक भी आपणे पापा मन्झ जीया करहा ऐं।

¹⁸ एता रा मतलब ये भी आ कि मसीह मन्झ विस्वासी लोक जो मरी गईरे, स्यों नास हुई चुकिरे।

¹⁹ अगर आस्से सिर्फ एथी री जिन्दगी रे कठे मसीहा पर आस रख्हा ऐं, ता एस संसारा रे सभ माह्णुंआं ले बढ़ी किन्हें आस्सा री हालत दुःखदाई।

²⁰ पर सच्चाई येई कि परमेसरे मसीह जो मरिरे मन्झा ले जिउंदा कितिरा, होर से एस्सा गल्ला रा सबूत आ कि तेस स्यों सभ भी जिउंदे करणे जो मरी गईरे।

²¹ इधी कठे जिहां एक माह्णुं आदमा रे ज्रीए मौत संसारा मन्झ आई होर ऐबे मरिरे मन्झ ले जिउंदा हूंणा भी एक दूजे माह्णुं ले यानि मसीह ले सुर्हू हुआ।

²² होर जिहां पैहले माह्णुं आदमा री वजहा ले सभी री मौत हुआ कराई, क्यूंकि आस्से तेसरे बंस ऐे; तिहां ईं दूजे माह्णुं यानि मसीह साउगी जितने भी लोक जुड़ीरे, तिन्हा सभीया मरिरे मन्झ ले जिउंदे हुई जाणा।

²³ पर हर एक क्रमा रे मताबक जिउंदे किते जाणे; होर एता रा सबूता ये आ कि मसीह सभी ले पैहले जिउंदा कितेया गया। फेरी जेबे मसीहा वापस आऊंणा, ता तेसरे लोक भी जिउंदे किते जाणे।

²⁴ होर जेबे मसीहा सभ प्रभुता, हक, होर हर किस्मा री सामर्थ रा नास करी देणा, तेबे संसारा रा अंत हुई जाणा। होर तेता ले बाद मसीहा राज बापू परमेसर रे हाथो सौंपी देणा।

²⁵ पर जेबे तक परमेसर आपणे सभ दुस्मणा जो पूरी तरहा हराई नी दे, तेबे तक मसीह रा तेस राजा पर राज करणा जरूरी आ।

²⁶ सभी ले आखरी दुसमण मौत ई, जेस्सा रा सर्वनास करी दितेया जाणा।

²⁷ क्यूंकि पवित्र सास्त्र मन्झ भजन संगीतकारे लिखिरा कि “परमेसरा सभ कुछ तेसरे सामर्था रे हेठ करी देणा,” पर तेता मन्झ परमेसर आपु सामिल नी आ, क्यूंकि परमेसरे ही सभ कुछ मसीह री सामर्था रे अधीन करी दितिरा।

²⁸ होर जेबे सभ कुछ मसीह रे अधीन आ यानि मह्ठे रे अधीन आ, ता मह्ठेया भी आपणे आपा जो परमेसरा रे अधीन करी देणा। ताकि परमेसर जिन्हें आपणे मह्ठे जो सभ चीजा रे गास हक दितिरा, से ही परमेसर हर जगहा होर गल्ला रा बडा हक रखे।

²⁹ अगर मरिरे लोक जिउंदे नी हुन्घे, ता तेस प्रथा रा क्या वजूद आ, जेथी कुछ लोक मरिरे रे कठे बपतिस्मा लैहां ऐं? होर परमेसर अगर मरिरे लोका जो दबारा जिउंदा नी करदा ता लोक ऐबे भी एस प्रथा जो किधियो मन्हा ऐं

³⁰ अगर मरिरे लोका दबारा जिउंदे नी हुन्घे, ता आस्सा रे कठे भी ये नर्कल्ली गल ई कि आस्से आपणे आपा जो बार-बार खतरे मन्झ किधियो पाई करहे।

³¹ हे भाईयो होर बैहणो, जिहां ये गल पक्की कि तुस्सा रे मसीह यीसू किन्हें जुड़ने री वजहा ले हांऊँ बडयाई करहा, ता ये गल भी पक्की हांऊँ हर रोज मरणे रे खतरे मन्झ आ।

³² अगर परमेसर मरिरे जो जिउंदे नी करदा, ता एथी इफिसुस सैहरा मन्झ जिन्हें लोके मेरा जंगली जानवरा साहीं व्रोध कितेया, ता जो कष्ट तिन्हें मुंजो दिते ता तिन्हो सहन करणे रा कोई फायदा नी हुआ। तेबे ता ये खरा हुंदा कि हांऊँ लोका रे बोलणे रे मताबक मनी लैंदा कि “खाहें-पींऐें, अगर काल आस्से मरी जांघे ता सब कुछ खत्म हुई जाणा।”

³³ एह्ड़ी गल्ला करणे वाले ले धोखा देख्या खांदे, “बुरी संगत खरे चरित्रा जो बिगाड़ी देहां ईं।”

³⁴ होसा मन्झ आऊ होर पाप करणा छाडी दे; हांऊँ तुस्सा जो ये गल सर्मिन्दा करणे रे कठे ये बोल्हा, क्यूंकि तुस्सा मन्झ ले कई एह्ड़े ऐं जो परमेसरा जो सही ढंगा किन्हें नी जाणदे।

मरिरे मन्झा ले जिउंदे हूंणे रे बाद केह्ड़ा सरीर मिलणा

³⁵ उदाहरणा रे कठे अगर तुस्सा मन्झ ले कोई पूछे कि, “किहाँ परमेसर मरिरे जो जिउंदे करहा या तिन्हारा सरीर केह्ड़ा हूंणा,”

³⁶ ता मेरा जबाब ये आ कि नर्क्कले नी बणा, क्या तुस्से एह्ड़ा बोल्हे कि जेबे कोई बेजा जमीना पर बाहें ता बगैर मरे ही से बूटा बणी जा, तुस्से एह्ड़ा किहाँ बोली सके?

³⁷ अगर तुस्से कणका रा बेजा या कुछ दूजा बेजा बाईरा हो ता तुस्से सिर्फ एक बेजा ही बाईरा, एक बूटा नी बाईरा।

³⁸ पर परमेसर ही आ, जो एक बेजे जो बूटे मन्झ बढ़ाहां, होर हर किस्मा रा बेजा आपणा-आपणा बूटा बढ़ाहां।

³⁹ संसारा मन्झ सभ प्राणिया रा सरीर एकी साहीं नी हुन्दा, माह्णुंआं रा सरीर जानवरा साहीं नी हुंदा; चिड़ुआ पंखेरू रा सरीर मछिया रे सरीरा साहीं नी हुंदा।

⁴⁰ होर जिहां संसारा रे प्राणिया रे सरीर कई प्रकारा रे हुंहाँ ऐं, तिहां आसमाना मन्झ भी ऐं, जिहां कि सूरज, चांद, होर तारे। पर आसमान री चीजा रा सुन्दरता लग प्रकारा री, होर धरती री चीजा री सुन्दरता होर ही किस्मा री।

⁴¹ सूरजा रा सुन्दरता लग आ, होर चांदा री सुन्दरता लग ई, होर तारे री सुन्दरता लग ई, क्यूंकि एक तारे रे सुन्दरता ले दूजे तारे री सुन्दरता मन्झ फर्क आ।

⁴² इधी कठे जेबे मरिरे लोका दबारा जिऊन्दे हूंणा तेबे तिन्हा किन्हें बी एह्ड़ा ई हूंणां, से सरीर जो तिन्हा दबाणा से सड़ने वाल़ा, पर जेबे तेस जिउंदे हुई जाणा तेबे तेस सरीरा कधी भी सड़ना।

⁴³ जेबे आस्सा रा सरीर दबाया जाहाँ, तेबे से कमजोर होर बदसुरत हुंहाँ, जेबे तिन्हा मरिरे मन्झ ले जिउंदे हुणा, तिन्हा सुंदर होर सामर्थी हूंणा।

⁴⁴ जिहां आस्सा रा मास होर खूना रा सरीर हुंहाँ, तिहां ही एक होर सरीर हूँआ जेस जो परमेसरा री आत्मे जिन्दगी दितिरी; आस्सा रा ये मास होर खूना रा सरीर परमेसरा रे ज्रीए जिन्दगी दितिरे वाले सरीरा मन्झ बधली जाणा।

⁴⁵ पवित्र सास्त्रा मन्झ भी लिखिरा आ कि, “पैहला माह्णुं आदम जिउंदा प्राणी बणेया” होर आखरी आदम यानि मसीह ही अनंत जिन्दगी देणे वाल़ा बणेया।

⁴⁶ सभी ले पैहले मास होर खूना रा सरीर आया, फेरी से सरीर आया जेस जो परमेसरा री आत्मे जिन्दगी दितिरी।

⁴⁷ पैहला माह्णुं धरती ले यानि माटे रा बणिरा था; दूजा माह्णुं यानि मसीह स्वर्गा ले आईरा था।

⁴⁸ संसारा रे लोक पैहला माह्णुं आदमा साहीं ऐं जो माटे रा बणीरा था, पर जो स्वर्गा रे लोक ऐे, स्यों स्वर्गा ले आईरे माह्णुं यानि मसीह साहीं ऐं।

⁴⁹ होर जिहां आस्से तेसरा रूप जो माटे रे था से आस्सो मिलेया, तिहां ईं आस्सा जो से स्वर्गीय रूप भी मिलणा।

⁵⁰ हे भाईयो होर बैहणो, हांऊँ तुस्सा किन्हें बोल्हा, एस संसारा मन्झ आस्सा रा मास होर खूना रा बणीरा सरीर स्वर्गा मन्झ परमेसरा रे राजा मन्झ वास नी करी सक्दा। आस्से आपणे मरणे वाले सरीरा किन्हें स्वर्गा मन्झ नी जी सकदे क्यूंकि तेथी मौत नी।

^51-52 एस भेदा री गल्ला जो सुणहा: आस्सा मन्झा ले कुछ विस्वासिया नी मरणा। ये सारी गल्ला पलक झपक्दे ही हुई जाणी। जेबे आखरी तुरही बजणी ता मरिरे या जुग-जुग जिउंदे रैहणे रे कठे जी उठणा, होर आस्से जो जिउंदे तिन्हारा सरीर भी बधली जाणा।

⁵³ क्यूंकि आस्सा रा सरीरा जो जल्दी ही मरणे वाल़ा होर सड़ने वाल़ा, जरूरी आ कि ये एक एह्ड़े सरीरा मन्झ बधली जाये, जो कधी भी ना मरदा हो ना सड़दा हो।

⁵⁴ होर जेबे एह्ड़ा हूंणा तेबे ये गल पूरी हूणीं जो परमेसरे पवित्र सास्त्रा मन्झ लिखिरी, होर जो ये बोल्या कि, “मौत हराई देणी, होर तेस्सा कधी भी नी रेहणा।” होर एस तरहा पवित्र सास्त्रा रा लिखिरा पूरा हुई जाणा।

⁵⁵ “हे मौत तेरी जीत केथी ई? हे मौत तेरा डंक केथी आ?”

⁵⁶ मौता रा डंक ता पाप आ, होर व्यवस्था जाहिर करही कि आस्से पाप कितिरा।

⁵⁷ पर परमेसरा रा धन्यावाद हो, जो आस्सा जो यीसू मसीह रे मरणे रे ज्रीए पाप होर मौता पर जीत देआ।

⁵⁸ इधी कठे हे मेरे प्यारे भाईयो होर बैहणो, आपणे विस्वासा मन्झ मजबूत रैहया, कोई तुस्सा जो नी भड़काए, होर प्रभु रे कामा मन्झ हमेसा बढ़दे जाऊआ, क्यूंकि तुस्से जाणहां ऐं कि, तुस्से प्रभु रे कठे मैहनत करहे, से बेकार नी ई।