1 कुरिन्थियो 11 - मंडयाली नंऊँआं नियमअराधना मन्झ मूंड ढखणा 1 जिहां हांऊँ मसीह साहीं जिन्दगी जीहां, तिहां ईं तुस्से भी मेरे साहीं जिन्दगी जिया। 2 हांऊँ तुस्सा जो सराहां, क्यूंकि तुस्से मुंजो सभ गल्ला मन्झ याद करहा ऐं; होर जो भी गल्ला मैं तुस्सा जो सखाईरी, तिन्हारा पालण बड़े चतन्न हुई किन्हें करेया करहा ऐं। 3 पर एक गल ई जो हांऊँ चाहां कि तुस्से ये जाणी लो: कि हर एक मर्धा रा मूंड मसीह आ, होर एक लाड़ीया रा मूंड लाड़ा, होर मसीह रा मूंड परमेसर आ। 4 इधी कठे कि माह्णुं मसीह री महिमा जो जाहिर करहा अगर से, लोका रे बीच मन्झ मूंड ढख्ही किन्हें प्रार्थना या भविस्यवाणी करहा, से मसीह री बेज्जती करहा, जो तेस्सा रा मूंड आ। 5 पर जो ज्नाने लोका रे बीच मन्झ प्रार्थना या भविस्यवाणी करदे टैम बगैर मूंड ढख्ही किन्हें प्रार्थना या भविस्यवाणी करहा ई, ता से आपणे लाड़े री बेज्जती करहा ईं जो तेस्सा रा मूंड आ। ता एह्ड़ी जनाने होर तेस्सा जन्नानी मन्झ कोई फर्क नी आ कि जेस्सा जो बेज्जती कुराणे रे कठे मूंड मूंडाईं दे। 6 अगर से ज्नानी मूंड नी ढखणा चाहीं, ता से आपणे बाल भी काटी दे; पर अगर ज्नाने रे कठे बाल कटाणा या मूंडाणां सरमा री गल ई, ता फेरी से प्रार्थना या भविस्यवाणी करदे टैम आपणा मूंड ढख्ही ले। 7 मर्धा रे कठे आपणा मूंड ढक्णा ठीक नी आ, क्यूंकि से परमेसरा रे रूपा मन्झ बणाईरा होर तेसरी महिमा जो दसां, पर ज्नाने मर्धा री महिमा जो जाहिर करी। 8 क्यूंकि पैहला-मर्ध आदम ज्नाने ले नी आईरा, पर ज्नाने मर्धा ले आईरी। 9 क्यूंकि परमेसरे पैहले-मर्धा जो ज्नाने री मददा रे कठे नी बणाईरा, पर ज्नाने जो मर्धा री मददा रे कठे बणाईरी। 10 इधी कठे कि स्वर्गदूता देखी करहे, ज्नाने जो ये करणा ठीक आ कि, से आपणी अधीनता जो दस्दे हुए, आपणे मूंडा जो ढ्खही किन्हें रखे। 11 फेरी भी अगर आस्से विस्वासी लोका री गल करहे ता ज्नाने जो मर्धा री मदद चहिए, होर मर्धा जो ज्नाने री मदद चहिए। 12 हालांकि परमेसरे पैहली-जन्नानी जो पैहले-मर्धा किन्हें रच्या, पर ऐबे ज्नाने ई जो मर्धा जो जणा ई; पर परमेसर ही आ जिन्हें सारी चीजा री रचना किती। 13 हांऊँ चाहां कि तुस्से आप्हुए एस गल्ला रा फैसला करा, क्या ये ठीक आ की नी कि एक ज्नाने कलीसिया मन्झ लोका रे बीच मन्झ बगैर मूंड ढखी किन्हें परमेसरा ले प्रार्थना करही। 14 प्रकृति आप्हुए तुस्सा जो सिखाहीं कि अगर कोई मर्ध आपणे बाल लम्बे रखे; ता तेसरे कठे ये सरमा री गल ई। 15 पर प्रकृतिए ज्नाने जो लम्बे बाल ढकणे रे कठे दितिरे; ठीक तिहां ही ज्नानिया जो लोका रे बीचा मन्झ प्रार्थना करदी बारी तिन्हो आपणा सिर ढकणा चहिए। 16 पर अगर केसी जो लगहा कि हांऊँ गलत बोली करहा, ता तुस्से ये जाणी ले कि ये गल्ला आस्सा री कलीसिया मन्झ होर बाकि परमेसरा री कलीसिया मन्झ एह्ड़ी ही मन्हां ईं जाहीं। प्रभु-भोजा रे बारे मन्झ 17 जिन्हारे बारे मन्झ ऐबे हांऊँ तुस्सा किन्हें गल करदा लगिरा तिन्हारे बारे मन्झ हांऊँ तारीफ नी करी सकदा, क्यूंकि कलीसिया मन्झ कठ्ठा हूंणे ले तुस्सा री भलाई नी पर बुराई ही हुई। 18 क्यूंकि सभी ले पैहली गल ता ये कि मैं ये सुणीरा कि, जेबे तुस्से कलीसिया मन्झ अराधना रे कठे कठ्ठा हुंहाँ ऐं, ता तुस्सा मन्झ फूट पईरी हुंहाँ ईं, होर हांऊँ विस्वास करहा जो गल्ला स्यों बोली करहे तिन्हा मन्झ ले कुछ-कुछ सही। 19 तुस्सा जो क्या लगहा कि तुस्सा रे बीचा मन्झ जेबे बंटवारा हूणा, तेबे ही दूजे लोका जो पता लगणा कि कुण परमेसरा रे चुणिरे लोक ऐं? नी एह्ड़ा बिलकुल भी नी आ। 20 इधी कठे जेस तरीके किन्हें तुस्से प्रभु यीसू री मौता जो याद करणे रे कठे एक जगहा कठे हुंहाँ ऐं, ता तेस जो प्रभु भोज नी बोली सकदे। 21 क्यूंकि मुंजो पता लगिरा की तुस्सा मन्झ ले कई लोक दूजे साउगी बांडणे ले पैहले आपणा खाणा झटपट खाई लैहां ऐं, जेस वजहा ले कुछ लोक भूखे ही चली जाहें, होर कुछ मुताली जाहें। 22 क्या खाणे-पीणे रे कठे तुस्सा रे घर-बार नी हाए? तुस्से परमेसरा री कलीसिया रा अनादर करेया करहा ऐं, होर गरीबा जो बेज्जत करी करहा ऐं। हांऊँ तुस्सा जो क्या दसुं? क्या हांऊँ तुस्सा री तारीफ करूं? एह्ड़ा करणे रे कठे मां तुस्सा री तारीफ नी करणी। 23 क्यूंकि जो गल्ला हांऊँ तुस्सा जो सखाई करहा, ये स्यों गल्ला ई जो प्रभुए ले मुंजो मिलिरी; कि प्रभु यीसू जेस राती से पकड़या गया तिन्हें रोटी लिती, 24 होर परमेसरा रा धन्यावाद करी किन्हें तोड़ी होर बोल्या कि, “ये मेरा सरीर आ; जो तुस्सा रे कठे देई दितिरा, होर मेरी यादगारा रे कठे एह्ड़ा ही करदे रैहया।” 25 होर जेबे स्यों रोटी खाई बैठे ता यीसूए अंगूरा रे रसा रा भरिरा डोंगा लितेया होर बोल्या, “ये डोंगा मेरे खूना मन्झ नौंईं वाचा ई, जेबे केभे पीओ, ता मेरी यादगारा रे कठे एह्ड़ा ही करदे रैहया।” 26 क्यूंकि जेबे भी तुस्से एस रोटीया मन्झ ले खाहें, होर एस डोंगें मन्झा ले पीहां ऐं, ता प्रभु री मौता जो जेबे तक से वापस नी आये, प्रचार करहा ऐं। 27 इधी कठे जो कोई मसीह जो बेज्जत करणे ले तरीके ले प्रभु री रोटी खाए, या तेसरे डोंगें मन्झा ले पीए, ता से प्रभु रे सरीर होर खूना रे खलाफ पाप करहा। 28 इधी कठे हर एक माह्णुं एस रोटी जो खाणे ले होर एस डोंगें मन्झ ले पीणे ले पैहले आपणे आपा जो परखी ले। 29 क्यूंकि जो रोटी जो खाणे होर डोंगें मन्झ ले पीणे रे टैम मसीह रे सरीरा री इज्जत नी करहे, से एस तरहा खाई पी किन्हें आपणे गास सजा जो बुलावा देहां। 30 एस वजहा ले तुस्सा मन्झा ले बौह्त सारे लोक आपणे सरीरा मन्झ कमजोर ऐं होर ब्मार ऐं, होर कई ता मरी भी गये क्यूंकि ये परमेसरा री सजा ई। 31 अगर सभी ले पैहले आस्से आपणे आपा जो परखी लैंघे, ता परमेसरा आस्सो सजा नी देणी। 32 पर अगर प्रभु आस्सा जो एस तरहा सजा देई करहा, ता से सिर्फ आस्सा जो सुधारी करहा; ताकि आस्सा जो संसारा रे लोका साउगी न्याय रे ध्याड़े सजा नी मिले। 33 इधी कठे, हे मेरे भाईयो होर बैहणो, जेबे तुस्से प्रभु भोज खाणे रे कठे कठ्ठा हुंहाँ ऐं, ता एक दूजे रे कठे रुकेया करा कि एक साउगी खाणा खाई सके। 34 अगर कोई भूखा हो, ता से आपणे घरा ई खाई ले, ताकि जेबे तुस्से कठे हो ता तुस्से सब कुछ खरे ढंगा किन्हें करहा, ताकि परमेसर तुस्सा जो सजा नी दे। होर बाकि गल्ला रे बारे मन्झ जो तुस्से लिखिरा था, स्यों मां तेथी आई किन्हें समझाई देणी। |
This work is licensed under Creative Commons Attribution-ShareAlike 4.0 License.