1 कुरिन्थियो 1 - मंडयाली नंऊँआं नियम

नमस्कार

¹ हांऊँ पौलुस, एस्सा चिठ्ठी जो लिख्या करहा। हांऊँ एथी आस्सा रे विस्वासी भाई सोस्थिनेस साउगी आ जो मेरी मदद करी करहा। हांऊँ परमेसर री इच्छा ले मसीह यीसू रा चुणिरे चेले हूंणे रे कठे नियुक्त कितिरा।

² ये चिठ्ठी कुरिन्थुस सैहरा री परमेसरा री कलीसिया रे लोका रे कठे ईं। आस्से ये चिठ्ठी तुस्सा लोका रे कठे लिखदे लगिरे जिन्हा जो परमेसरे मसीह यीसू साउगी एक करी किन्हें आपणे लोक हूंणे रे कठे लग कितिरा। होर तिन्हें तुस्से सादीरे कि तुस्से तेसरे पवित्र लोक बणो, ठीक तिहां जिहां तिन्हें बाकि सब लोका जो भी चुणी लितिरा जो हर जगहा आस्सा रे प्रभु यीसू मसीह री अराधना करहा ऐं; क्यूंकि से आस्सा सभीरा प्रभु आ।

³ हांऊँ प्रार्थना करहा कि आस्सा रा बापू परमेसर होर प्रभु यीसू मसीह तुस्सा जो अनुग्रह होर सांति देंदा रहे।

पौलुसा रा परमेसरा जो धन्यावाद

⁴ हांऊँ हमेसा तुस्सा रे बारे मन्झ परमेसरा रा धन्यावाद करहा कि तिन्हें आपणे अनुग्रह ले तुस्सा जो बौह्त सारी आसिसा दितिरी, होर ये इधी कठे हुआ कि तुस्से मसीह यीसू साउगी एक कितिरे गईरे।

⁵ यीसू मसीह साउगी एक हूणे रे ज्रीए परमेसरे तुस्सा जो से सारी चीजा दितिरी जिन्हारी जे तुस्सा जो जरूरत ई। खास करी किन्हें परमेसरे तुस्सा जो कई प्रकारा रा आत्मिक बरदान दितिरा ताकि तुस्से परमेसरा री खबरा जो होर तेसरे बचना रे ज्ञान जो दूजेया जो दसी सको।

⁶ होर स्यों वरदान जो परमेसरे तुस्सा जो दितिरे, स्यों एस्सा गल्ला जो पक्का करहे कि जो खबर मसीह रे बारे मन्झ ई से सच्ची।

⁷ होर इधी कठे कि जेबे तुस्से यीसू मसीह रे दबारा वापस आऊणें रा इंतजार करदे लगिरे, परमेसरे से सब आत्मिक बरदान तुस्सा जो देई दितिरे, जेह्ड़ा पवित्र आत्मा सब विस्वासी लोका जो देआ।

⁸ परमेसरा तुस्से आखरी तक तुस्सा रे विस्वास मन्झ मजबूत बणाई रखणे, ताकि तुस्से आस्सा रे प्रभु यीसू मसीह रे वापस आऊणें रे ध्याड़े मन्झ बेकसूर रही सको।

⁹ होर तुस्से पक्का जाणी लो कि परमेसरा एह्ड़ा ही करणा, क्यूंकि परमेसर आपणे वादे जो पूरा करणे रे कठे सच्चा आ; होर तिन्हें तुस्से आपणे मह्ठे आस्सा रे प्रभु यीसू मसीह साउगी एक हूणे रे कठे चुणी लितिरा।

कुरिन्थुस सैहरा री कलीसिया मन्झ फूट होर बंटवारा

¹⁰ हे भाईयो होर बैहणो, आस्सा रे प्रभु यीसू मसीह रे हका ले हांऊँ आपणे दिला ले अर्ज करहा कि तुस्से सभ एक दूजे किन्हें राजी हुई किन्हें एक ई गल बोला; होर तुस्से झगड़ा करी किन्हें लग नी हो। पर एता रे बजाय हांऊँ तुस्सा किन्हें विनती करहा कि एक दूजे किन्हें मिली जुली कर एक ही प्रकारा रा सोच-विचार होर एक ऐं मकसद रखो।

¹¹ क्यूंकि हे मेरे भाईयो होर बैहणो, खलोए रे परिवारा रे लोके मुंजो तुस्सा रे बारे मन्झ दसेया कि, तुस्सा मन्झ झगड़े हुएया करहा ऐं।

¹² मेरे बोलणे रा मतलब ये आ कि तुस्सा मन्झा ले कुछ लोक ता आपणे आपा जो पौलुसा रा चेला बोले, ता कुछ लोक आपणे आपा जो अपुल्लोसा रा चेला, होर कुछ लोक आपणे आपा जो कैफा रा चेला बोले, ता कुछ लोक आपणे आपा जो मसीहा रा चेला बोल्हा ऐं।

¹³ एह्ड़ा बोली किन्हें तुस्से जो करहे से ठीक नी आ, क्यूंकि मसीह लग-लग टोलिया मन्झ नी बंढीरा। क्या हांऊँ पौलुस तुस्सा रे पापा री माफी रे कठे क्रूसा प्रयाल्हे मरेया? नी! क्या तुस्से इधी कठे बपतिस्मा लितेया की तुस्से सब मेरे चेले बणो? नी एह्ड़ा नी आ।

¹⁴ हांऊँ परमेसरा रा धन्यावाद करहा कि, तुस्सा लोका मन्झा ले क्रिस्पुस होर गयुसा विस्वासी भाईया जो छाडी किन्हें, मै केसी जो भी बपतिस्मा नी दितेया।

¹⁵ इधी कठे कोई भी एह्ड़ा नी बोली सकदा कि तिन्हें मेरे चेले बणने रे कठे बपतिस्मा लितिरा।

¹⁶ होर मैं स्तिफनासा रे परिवारा जो भी बपतिस्मा दितेया; होर मुंजो याद नी आ कि इन्हा जो छाडी किन्हें, मैं केसी होरी जो भी बपतिस्मा दितिरा हो।

¹⁷ क्यूंकि मसीहे हांऊँ, बपतिस्मा देणे रे कठे नी, पर खुसी री खबर सुनाणे रे कठे भेजिरा। होर जेबे हांऊँ एह्ड़ा करहा तेबे से मेरे बोलणे रे ज्ञाना रे मताबक नी करदा। नही ता लोका मेरे ज्ञाना री वजहा ले मेरे पर विस्वास करणा, होर तिन्हा क्रूस पर मसीह रे मरणे री सामर्था जो नी समझणा।

मसीह री सामर्थ होर परमेसरा रा ज्ञान

¹⁸ जेबे लोक मसीह रे क्रूसा प्रयाल्हे मरणे री खबरा जो सुणे ता कुछ लोका जो ये खबर नर्क्कल्या री गल लगा ई। जो एह्ड़ा सोचे स्यों नरका मन्झ नास हूंणे रे कठे बढ़दे लगिरे, पर आस्से लोके जिन्हें एस खबरा पर विस्वास कितिरा आस्सा रे कठे ये परमेसरा री से सामर्थ ई जेसरे ज्रीए से लोका जो बचाहां।

¹⁹ क्यूंकि पवित्र सास्त्रा मन्झ लिखिरा, “मां ज्ञानिया रा ज्ञान नास करणा, होर समझदारा री समझ बेकार करी देणी।”

²⁰ होर तेबे, आस्से ज्ञानी लोका रे बारे क्या बोली सके? होर यहूदी व्यवस्था स्खाणे वाल़े रे बारे मन्झ क्या बोली सके? या संसारा रे लोक जो चलाकी किन्हें गल्ला करहे तिन्हारे बारे मन्झ क्या बोली सके? परमेसरे तिन्हा सभी जो नर्क्कला बणाई दितिरा होर तिन्हारे ज्ञान जो बेकार साबित करी दितिरा।

²¹ क्यूंकि जेबे परमेसरे आपणे ज्ञाना रे मताबक देखेया कि संसारा रे लोक आपणे ज्ञाना रे ज्रीए तेस जो कधी नी जाणी सकदे, ता परमेसरा जो ये ठीक लग्या कि आस्सा री खुसी री खबरा जो प्रचार करणे रे ज्रीए विस्वास करणे वाले लोका रा उद्धार करहे, भले ही कुछ लोका जो ये गल नर्क्कली लगाई।

²² ये गल यहूदी लोका जो नर्क्कली लगी, क्यूंकि स्यों एस गल्ला जो सच्च साबित करणे रे कठे स्वर्गा ले चिन्ह चाहें, होर ये यूनान देसा रे लोका रे कठे भी नर्क्कली गल ई, क्यूंकि स्यों संसारा रे ज्ञाना री तोपा मन्झ रैंहयां ऐं।

²³ पर आस्से ता क्रूसा प्रयाल्हे आस्सा रे पापा री माफी रे कठे मरिरे मसीहा रा प्रचार करहा ऐं जो यहूदी लोका रे कठे ठोकरा रा कारण आ, होर अन्यजाति लोका रे कठे भी नर्क्कली गल ई।

²⁴ पर तिन्हो जिन्हों परमेसरे आपणे लोक हूंणे रे कठे सादीरे, चाहें यहूदी लोक हो, या यूनान देसा रे लोक हो, इन्हा दुहीं रे कठे येह मसीह ही परमेसरा री सामर्थ, होर परमेसरा रा ज्ञान आ।

²⁵ क्यूंकि जो गल परमेसरा री नर्क्कली लगी से माह्णुंआं रे ज्ञाना ले ज्ञानवान ईं; होर जो गल परमेसरा री कमजोरी लगी से माह्णुंआं री ताकता ले बौह्त सामर्थी ई।

सिर्फ प्रभु मन्झ बडयाई

²⁶ हे भाईयो होर बैहणो, तुस्से आपणे बारे मन्झ सोचा कि जेबे परमेसरे तुस्से आपणे लोक हूंणे रे कठे सादिरे थे ता तुस्सा री जिन्दगी केह्ड़ी थी कि, तुस्सा मन्झा ले कई लोक माह्णुंआं रे देखणे रे नजरिये रे मताबक बौह्त ज्ञानी, या बौह्त सामर्थी, होर बौह्त इज्जतदार नी थे।

²⁷ पर परमेसरे स्यों लोक चुणे जो संसारा री नजरा मन्झ मूर्ख ऐं कि स्यों ज्ञानी लोका जो सर्मिन्दा करहे; होर परमेसरे स्यों लोक चुणे जो संसारा री नजरा मन्झ कमजोर ऐं, ताकि स्यों ताकतवर लोका जो सर्मिन्दा करहे।

²⁸ होर परमेसरे स्यों लोक चुणे जो संसारा री नजरा मन्झ नीच होर बेकार ऐं होर जो कुछ भी नी ऐं, ताकि इन्हारे ज्रीए संसार जेस जो खास लोक समझा तिन्हा जो नास करी दे।

²⁹ परमेसरे एह्ड़ा इधी कठे कितेया ताकि कोई माह्णुं परमेसरा रे साम्हणें बडयाई नी करी सके।

³⁰ पर परमेसरे तुस्सा जो मसीह यीसू साउगी एक कितिरा होर मसीह रे ज्रीए से आस्सो आपणा ज्ञान देआ। होर परमेसर आस्सा जो आपणी नजरा मन्झ धर्मी भी बणा। मसीह रे ज्रीए आस्से पवित्र कितिरे होर से आस्सो आस्सा रे पापा ले अजाद करहा।

³¹ इधी कठे कि मसीह आस्सा रा सब कुछ आ, आस्से तेह्ड़ा ही करहे जिहां पवित्र सास्त्रा मन्झ लिखिरा कि, “जो बडयाई करहे से तिन्हा गल्ला पर बडयाई करहे जो प्रभुए आस्सा रे कठे कितिरी।”