Yunusu 4 - Ma Jou ai Demo-demo o Totobelohoka

O Yunusu wongamo angamoi Ma Jou wadora o Niniwe ma nyawa

¹ De o Yunusu duru ko wosanangiua angamoi Ma Jou ko wahibinaahaua o Niniwe ma nyawa ho hiadono wongamo.

² De womaniata womahingahu Ma Jou o Yaweika wato, “Gea! Ngona Ma Jou o Yawe de ma dihirahi ngohi ahi tonakokahi de tato marai hokonaa idadi. De angamoi ngohi tonihioriki abe to Ngona dika ani dora ko iwa ma batingi de duru noigo o nyawa naduhunu. De ani hininga itongohono de ko itai-taitua o nyawa nahohowono ho hiadono ngaro nato nahohowono ma nako yomatoduba hiadono manga dorou yanoaka de gea ko nahohowonokaua. Gea mata-mata ngohi tohioriki de gea ma titi hiadono toara o Tarasiisi ma kotaika.”

³ Ho o Yunusu wohidungonoka de wato, “Ho naa, Ma Jou o Yawe, nako hokogea naduhunu nanga musu, koaho ngohi tohonengoka la ibooto tohohininga abe naa naduhunoka onangika. Ngohi towango ko toigokaua, ho koaho tohonenge dika toigo.”

⁴ De ahao Ma Jou o Yawe wotemo o Yunusika wato, “Ahi ngofaka, sarakia, gea itiai nongamo ma titi gea Ngohi todiaioka?”

⁵ De Ma Jou wileha ipaha de o Yunusu ka wohidungonohi ho o kota gea wosoboka, woiki o wange ma hiwaroko, o Niniwe ma honongaika woiki de womagoo-gogere genangoka. De womadiai ai fofofongo abe o hijai-jai ma tau womataduhuku ho ma timioka womafoo-fofongika wododamaa wato, “Abeika, nako ma kota gea Ma Jou wohibinaaha eko koua.”

⁶ De Ma Jou o Yawe wohiwangoiye moi o gumi-gumini o Yunusu ai datekoka ho iwifofongo de gea o Yunusu ai hininga duru igaragoka angamoi o gumi-gumini gea iwangoiye hokogea.

⁷ Masara ma dawangeino, duru o ngoru-ngoruminohi de Ma Jou wohidadi o habeta moi de ena gea o gumi-gumini ma roehe aolomo ho ma hoka imaaioka.

⁸ De ahao o wange ma gurutiyeoka de Ma Jou wohiboaino o hidaloko abe o wange ma hiwariha italoko ho o wange duru kohahauku. De o Yunusu iwidahauku hiadono ai hininga ihihihanga ho duru woigo la wohonenge dika hiadono womatemo wato, “Nako ka towango-wangohi eko tohonenge, ngohi tato koaho tohonenge dika.”

⁹ De Ma Jou wileha o Yunusika wato, “Ahi ngofaka mode itiai nongamo hokonaa ma titi ma gumi-guminika abe ihonenge gea?” De o Yunusu wopaluhu wato, “Nako ngohi, marai tato itiai tongamo dika, ngaro hiadono ka todohonengika.”

¹⁰ De Ma Jou o Yawe wihitararono o Yunusika wato, “Ahi ngofaka, o gumi-guminika gea duru nohininga, ngaro ko ngonaua nohiwangoiye de ko iwa ani kangela enangika abe napaliara, ma duru nodora. Gea Ngohi abe tohiwangoiye, de o futu moi dika ma dekana iwango de ahao ma hoka imoraaka.

¹¹ Ahi ngofaka, abeika gea o gumi-gumini dika de duru nodora masara naa kiani nohikohowono de o Niniwe ma kota abe ma nyawa de ma aewani duru kohangoe de nato ko itiaiua Ngohi tadora onangika. De gea ngaro o ngofa-ngofaka abe manga howono ko iwahi de manga ngoe yasana o ratuhu moi de yasana monaoko. De sarakia, ngona nato bote ona ko tadoraua?” Hokogea Ma Jou wihitararono itiai o Yunusika.