Yunusu 3 - Ma Jou ai Demo-demo o Totobelohoka

O Yunusu wihingounu Ma Jou ai behehongo unangika

¹ Ho ma nawoko gea o Yunusu iwihingunangoka de naangoli ma hinooto Ma Jou witemo unangika wato,

² “Yunusu, ngona nomaoko de noiki o Niniwe ma kotaika, o kota ma amoko gea abe ona duru de manga buturungoka, de onangika noiki la duru nahikokingahu onangika gea Ngohi ko tahigunoakaua abe yogila-gila de manga datoro hokogea ma dorouholi.” Hokogea Ma Jou wihulokoli o Yunusika.

³ De naa o Yunusu wihingounu Ma Jou o Yawe ai behehongika gea ho woiki o Niniwe ma kotaika. De o Niniwe ma kota gea duru ma amokika, abe nako horekata mata-mataika kiani o wange hangeino de ahao ka idadi homahiadono ma dobikika.

⁴ De o Yunusu o Niniwe ma kotaika womahiadonoka de ka de o wange gea wowohama o kota ma goronaika de wotagi-tagi waika waino wabobanarata onangika wato, “O Niniwe ma nyawa, ma hou o wange moruatohi de Ma Jou ahao ngini de nia kota ka ma moi winihikokibinaaha.”

⁵ Ka de yoihene Ma Jou ai behehongo onangika gea de o Niniwe ma nyawa mata-mata iwingakuoka Ma Jouika. Ho yomahikagaro mata-mataika la ona mata-mata yopuaha, ho manga hohidimono ka hiadono manga gogilaongo ka ma moi yopuaha ho ko yolomokauahi. De ona yomahinoa-noauku o ngoere ma kokekekere abe hoka o karongino yodiai, abe ihitunguu manga toduba.

⁶ De Ma Jou ai behehongo gea adonoka o Niniwe manga koanoikaoo. Ho ka de una woihene de wouti ai kaderauku de ai baju ma guru-gurutu duru ma rorahai gea womahuputoka. De ahao unangoo womaturuuru de o ngoere abe hoka o karongo de wogogeruku o uku ma kafoka la gea womahitunguu ai hininga ma huha o koano gea.

^7-9 De ahao manga koano gea wohihupu o hiaturu moi ai kokawaaha mata-mataika wato, “O Niniwe ma nyawa, ngone mata-mata kiani hohigihene o huhuloko naa. Abe ngohi, ti ngini nia koano, de nia hohidimono mata-mata abe ihiduhunu la minihipareta, ngomi mimahininga moi mimaputuhu miato, ngone mata-mata kiani homahitunguu hotoba nanga dorouino. Ho gea hokokipuaha ngone o nyawa de hiadono nanga aewani mata-mata ngaro o dofo de ngaro ma duduono hoka o hapi, de o kabingi, de o domba, ma enangoo ko idadiuahi iolomo. Ho ma inomo o kia-kia dika ngaro o ruruubu ma ko idadiua. De ko idadiuahi hohiokere o akere enangika. De ngone kiani ka hokogea dika hiadono o pareta ihupuoli abe adonokali ma oraha ka idadi holomohi de hokeroli. De kiani ngone mata-mata homahinoa-noauku de o karongo, de nanga aewani o dofo enangoo hatamunu de o karongo. De ibooto nanga dualono ma datoro itotorou haniikohi, kiani homaturuuru nanga tingkaiino ho ngone mata-mata naa haamo-amokiye homakokigahoko Ma Jouiye. Abe nako Ma Jou wonamake abe hagou-goungu hotoba, de boteua de honganono Ma Jou ai dora ilaku ho hiadono ai ngamo duru kohaamoko gea ko itagiokaua ngoneino de ko wadadiuali wonahohowono ho ngone ko hobinaahaua.” Hokogea manga koano wahuloko ai kokawaahaika.

¹⁰ De Ma Jou wamakeoka ona yagou-goungu yotobaka manga datoro itotorouino gea, ho ai dora itagi onangika de wato, “Itiai manga toduba hiadono manga dorou yanoaka, ho Ngohi naa ko tohiboauali onangika o bobinaaha abe hoka ma dihira tato tahohowono.” Hokogea Ma Jou ai demo.