Yunusu 2 - Ma Jou ai Demo-demo o Totobelohoka

O Yunusu womaniata Ma Jouiye

¹ De o Yunusu o nawoko ma pokoroka de womaniata ai Jouiye, de hokonaa ai demo ma oraha womaniata, wato,

² “Ngohi naga ahi huha ma goronaka de ahao tomagahoko Ma Jou o Yaweiye de Una wohipaluhu. Ngohi tomahingahu tato, Ngohi naa imaketero hoka naga yohone-honenge manga ngi ma goronaka, ma ka de o duduhunu tomagahoko Ngonaiye de nohihigihene.

³ Ngona nohiumo duru o gahi ma lukuku hiadono totikiuku dau o dowongioka, de o bauhoo ihihigororomino. To Ngona ani lulu ihihidilakuroka ahi lokuino, de ani moku-moku gea ihihipaka-paka.

⁴ Hokogea ngohi de ahao totemo Ngonaiye tato, ‘Ngohi naa ani himangoka nohiduhuoka, ma ngaro hokogea ma ngohi duru tongaku, ahao ani Tau ma Debi-debinika toiki genangika.’

⁵ Hokogea ahi hininga tomahingahu Ngonaiye, mangale o gahi gea ngade-ngade ihihibodito, abe ahi badanga ihihawoinoka, de o lulumiti imahideho-dehorinoka ahi peaino.

⁶ Ngohi gea o loku-loku ma timiuku o gahi ma goronaka, dau ihilutu, imaketero hoka ihidukusioka o dunia ma goronaka. Masara Ngona, ahi Jou o Yawe, ahi wowango nagorakoka ma lungunino gea.

⁷ Abe gea ngade-ngade tohonenge de ahao tonihininga, Ngona Ma Jou o Yawe. De ahi niniata ma demo gea idoa Ngonaiye, hiadono ani Ngi ma Debi-debiniye imahiadono.

⁸ Ona abe yomahinganono manga popangaoika dika, ona gea inikokiporetoka ngaro Ngona nadora, de gea manga nganganono parahaja dika.

⁹ Ma nako ngohi, ka Ngonaika dika totarimakase, de o higiriiri tohinyanyi ma oraha tomahuba Ngonaiye, De gea abe nengokadau tonihibehehongokau tato ahao todiai, gea ngohi tagoungu ahao todiai, Angamoi ka Ngona Ma Jou o Yawe dika abe ka idadi ngomi o nyawa nomihihohe mia hohowonino.”

¹⁰ Hokogea o Yunusu womaniata ipaha de Ma Jou o Yawe wohiaturu la o nawoko gea o Yunusu iwihingunanga dika o dowongiha.