Yunusu 1 - Ma Jou ai Demo-demo o Totobelohoka

O Yunusu Ma Jou ai behehongo unangika ko wohingounua

¹ Ma moiuku Ma Jou o Yawe ai demo iboa o Amitai ai ngofakika, abe ai romanga o Yunusu, de Ma Jou witemo unangika, wato,

² “Yunusu, ngona nomaoko de noiki o Niniwe ma kotaika, o kota gea ma amoko abe duru de ma buturungoka, de onangika noiki la duru nahikokingahu onangika gea Ngohi tamake abe manga datoro duru itotorouholi.”

³ Masara ka de gea woihene de o Yunusu ko wosanangiua hiadono Ma Jou o Yawe ai himangoka de waino woara, ho wosobo wato woiki o Tarasiisi ma kotaika. De una wato o kapa waniiki ho ihira woiki o kota moiika ma romanga o Yopa, abe o gahi ma datekoka. De genangoka waika de wamake o kapa moioli ato yoiki yohidete o Tarasiisi ma kotaika. Ho ai dodagi ma hewa gea wohidoakoka de wofarene o kapaoko, wato woiki o Tarasiisika la una de Ma Jou yomakitingaka kohagurutika.

^4-5 Ho ahao yoikoko gea, de o Yunusu womanoauku dau o kapa ma goronaka de womaidu-idu, ho duru iwikiookoka. De Ma Jou o Yawe wohiboaino o hidaloko duru kohabuturungu hiadono idadi o rato o gahioka. De manga kapa o lulu ihiboha-boha ka hiadono ngade-ngade akilianga. De angamoi o rato gea duru kohagiria ho o kapa ma nyawa gea mata-mata yokokihawana ho hiadono yomakokigahoko o duduhunu manga jou homoi-homoiika. De manga gina-gina yakokitifaka o gahiuku la ihiuwini ma kapa, angamoi ato done yalutu.

⁶ De o kapa gea manga kaputeene wouti o Yunusuku o kapa ma goronauku de o Yunusu wiahoko wato, “Ngona naa done sarakia, o rato naa ma gogiriaka de ka inikiookohi! Ei, nomomikohi, ani jouika nonagahokohi o duduhunu, bote womalega ngoneino la ko wonahigunoaua hobinaaha.” Hokogea o kaputeene witaere o Yunusika.

⁷ Ho o Yunusu womomiki de wodoa daku o kapa ma lokuiye de genangoka una de o kapa ma nyawa yomakoketemo, ato, “Abeika, ngone homatoomuino homaketebataru la homakamaihi la gea hohioriki to onagona manga howono hiadono o bodito naa hamake.” Ho ka de yomakamaihi de iwidumutu o Yunusika.

⁸ De angamoi o Yunusu iwidaenoka ho unangika ona utu iwileha-leha, ato, “To onagona manga howono la hiadono ngone hamake o bodito naa? Ani karajaanga o kia? De ngona o kiaino ma nyawa? Kiani nomahingahu ngona o kia ma tonakino de ani dutuoo o kiaino?”

⁹ De o Yunusu wopaluhu onangika wato, “Ngohi o Isiraele ma nyawa, de tomahuba Ma Jou o Yaweika, Una gea Ma Jou o Horogaka abe o tonaka de ma gahi mata-mataika Una watulaada.” Hokogea wahingahu onangika.

¹⁰ De ahao o Yunusu womahingahuoo onangika wato, “Ma oraha naa ngohi tato tidokaowara Ma Jou o Yawe.” Ho ka de yoihene o Yunusu ai ade-ade gea de duru yokokihawanoka de iwilehali unangika ato, “Adodoa ho ngona hokogea nodiai?”

¹¹ De mangale ma titi ma rato gea ka idogo-dogo ma buturungu, ho ona ka iwilehahi ato, “Ka minidodoaika de ngona la o rato naa iriidi?”

¹² De o Yunusu wopaluhu onangika wato, “Kiani ngini nihiumo o gahiuku de ahao ma rato naa ka idadi iriidi. Ngohi tohioriki gea ma titi to ngohi ahi howono hiadono ngone o rato inadaene hokonaa.”

¹³ Ma ngaro o Yunusu wotemo hokogea ma, ko iwiumouahi o Yunusu, de o kapa ma nyawa ato, “Hohitai-tailohi homahioru-oruohi dina ma gogowahiha.” Masara o rato ka idogo-dogo ma buturungu ho ngaro duru yomahioru-oru ma, manga kapa ko itagiua o gowahiha.

¹⁴ Ho gea ko yomahigakunihaua yomahioru, angamoi o rato kohabuturungu ho ona ka ihiboakiye yomagahoko o duduhunu Ma Jouino, ato, “Duru mimagahoko Ma Jou o Yawe, ufa nomihigunoa la ngomi mihonenge. Abe tanu ngomi wiwiumoka masara bote ai howono Ngonaika ko iwa, ho hiadono ngomi dika nomihohowono. Ho naa mimahidiai wiwiumo masara ngomi ufa ngomioo mihonenge mangale ma titi to una ai howono Ngonaika. Masara Ngona Ma Jou o Yawe ho nodiai dika abe naniiki to Ngona ani mau.”

¹⁵ Hokogea yomagahoko de ahao o Yunusu iwiumo o gahiuku, iwiumoka de ka itodokanino iriidi ma rato. De o gahi duru iriidoka.

¹⁶ De gea o kapa ma nyawa yamakeoka de duru iwimodongoka Ma Jou o Yaweika ho abe ma oraha o dowongiha yomahiadonoka de yomahuba Ma Jou o Yaweika. De manga niniata ma goronaka de ona yomahingahu ato ka Una dika iwileleani.

O Yunusu Ma Jou widotoko de o heheranga

¹⁷ De o Yunusu iwiumoka dai o gahiuku de o nawoko duru ma amoko Ma Jou wohiboaino la gea o Yunusu iwilahiri masara ko wohonengua. Ho o Yunusu ai wange hangeino de ai futu hangeino, o nawoko ma amoko ma pokoro ma goronaka.