Yosua 8 - Ma Jou ai Demo-demo o Totobelohoka

8:3-17,23-29 ko atailakouahi O Ai ma kota o Isiraele ma nyawa ihikala

¹ De Ma Jou o Yawe wihingahu o Yosuaika, wato, “Ngini ngaro ufa niamodongo o Ai ma nyawaika de ufa nimafikiri nia hiningaka iwoe hiadono nihuha. De angamoi Ngohi tinihidoakoka o lolaku nginika ho ka idadi niaparangi o Ai ma nyawaika de nia domoroini angamoi ona mata-mataika gea Ngohi tinihidoakoka ti ngini nia giamika. Ho ahao ona ka ma moi de manga koano, de manga kota de manga tonaka mata-mata tinihidoaka.

² Ngini kiani nidiai onangika de manga koanoika duru imaketero hoka nidiai o Yeriko ma nyawaika de to ona manga koanoika. Masara nako o Ai ma nyawa manga kiahonanga de manga aewani gea mata-mata tinihigunoa nimale la nimahitingini. De hokonaa ma ngekomo la niaparangi onangika. Manga kota ma poretoka de nia tentara ma regu moi kiani niahagogono.”

³ Ho Ma Jou wotemo ipahaino de ahao o Yosua de ai tentara mata-mataika yosobo yoiki o Ai ma kotaika. De gea o Yosua waregu ai tentara ma nyawa la o regu moi ona manga ngoe yasana moruange abe duru yotobamoroini. De ma regu moi gea wahuloko de ahao o futu-futuoka wahidingoto manga dumutika.

⁴ Masara ko wahidingotuahi de o Yosua wahuloko onangika wato, “Abeika, ngini kiani niloiki manga kota ma poretika de nimagogono genangoka. Masara iti ufa nikurutikaholi de ma kota gea, ho koaho hatoli nimahidigi-digino. Ho genangoka nimagogonohi de kiani nimahidiaioka!

⁵ Masara nako ngohi de nanga gogianongoru o tentara ma nyawa utu abe naga ngohioka, ngomi ahao manga kota ma himangika mimahitigika. De gea mimahinonai dika, angamoi ma oraha ona yohupu la inaparangi abe imaketero hoka ma dihirainoli de ngomi naa mikokiloara dika.

⁶ De nanga musu gea imibaata de imikiniiki ngomi ka hiadono yohupu manga kotaka de yaino hatoli manga gurutino. Angamoi ona gea yomahikokagaro ato, ‘Ona naa ka yoara dika abe duru imaketero hoka ma dihirainoli!’ De gea ngomi naa igoungu mimadohuku onangino.

⁷ Masara duru ma oraha gea de ngini naa nia hagogono ma ngioka de kiani nimasikaa nimakokiokoino de nimataiti niangohama manga kota ma goronaika la niahikala onangika. Angamoi nanga Jou o Yawe Una ahao wahidoaka manga kota gea nia giama ma hoatika.

⁸ De ma oraha niahikala de kiani niatufuku manga kota gea la duru youkuoka. Abe gea kiani duru nianiiki itiai Ma Jou ai demo nginika. De hokogea dika aika to ngohi ahi huhuloko ma demo nginika.”

⁹ Ho wahuloko ibooto de wahidingoto o regu moi gea manga hagogono ma ngiika o Ai ma poretoka. De manga ngi gea imanoa o Betele de o Ai ma hidogoronaka.

¹⁰ De ma dawangeino abe duru o ngoru-ngorumino de o Yosua watoomuino ai tentara ma nyawa ma regu moioli gea. De ona yomatoomuino de ahao una de o Isiraele ma nyawa manga hohihira utu yosobo de yahihira manga tentara la yomahitigi o Ai ma kotaika.

¹¹ Ho ona mata-mata yomakiniiki yotagi-tagi hiadono hatoli yomahitigi ma kotaika. De o kota ma himangoka abe doka ma tonaka ma dola ma honongaka de ona yomahidodogumohi manga futu moi.

¹² De ma futu gea o Yosua wairiki ai nyawa yasana motoa de wahidingoto la ona yoiki yomagogono o Betele de o Ai ma hidogoronaka.

¹³ Ho ona gea yoikoka de ahao ma tentara mata-mata yomahidiaioka, abe ma regu moi o kota ma himangoka de ma regu moioli doka o kota ma poretoka. De o Yosua una o tonaka ma dolaka ma futu gea.

¹⁴ De ma dawangeino duru o ngoru-ngorumino de o Ai ma nyawa manga koano womalega o tonaka ma dolaika de wamake o Yosua de ai tentara. Ho una de ai tentara yomasikaa yohupu manga kotaino la yabaatika o Isiraele ma tentaraika abe naga ma geleforoka gea. Masara ma koano duru ko wahiorikua abe naga ma tentara o regu moioli yomagogono ai kota ma poretoka.

¹⁵ De ona yohupuino de ahao o Yosua de ai nyawa mata-mata yomadohuku manga poretoko la ka idadi yabudi o Ai ma tentara. Abe o Isiraele ma nyawa yomataiti yokokiloara de manga dumutu o tonaka ma kakaahaika.

¹⁶ De ma oraha gea nagahi o Ai ma nyawa yomagoo-gogerohi manga kota ma goronaka la yagoa-goana manga kokawaaha. Masara mangale ma titi o Yosua de ai nyawa yomahinonai hokogea ho o Ai ma tentara ma haeke yahuloko manga nyawa abe nagahi o kotakahi la onangoo yohupu de yakiniiki o Isiraele ma nyawaika. De hokogea idadi hiadono ona mata-mata yakiniiki o Yosua de ai tentara.

¹⁷ Ho duru ko yaiwaka o tentara o Ai eko o Betele ma kota-kotaka abe yagoa-goana manga kota gea angamoi ona ka yakokikiniiki o Isiraele ma nyawa ma hoanika. De gea manga kota o Ai duru hoka imatawangeika dika.

¹⁸ Ho ka de o Ai manga nau-nauru yakokiniiki o Isiraele manga tentara de Ma Jou o Yawe wihingahuoli o Yosuaika wato, “Naa, Yosua, ani kuama nohidoakiye nohitumutu o Ai ma kotaika! Angamoi manga kota naa tohidoaka ani giamika.” Ho o Yosua ai kuama wagorakiye de wohitumutu o Ai ma kotaika.

¹⁹ Ka de hokogea o Yosua ai kuama wohitumutu de ai tentara yasana muruono gea abe yomagogonika, ona yamake ai dodunguu gea de duru yomataiti yokokihupu manga hagogono ma ngiino de yomapopaata yangohama o Ai ma kota ma goronaika. Ka de o Ai ma nyawa yahikala genangoka de yomulaenge ma kota gea yatufuku.

^20-22 Ho o Ai ma nyawa manga tentara abe yaniiki o Yosua de ai tentara, ona yomadogilioro de yamake manga kota ma nofo idoa ma dihangiye de ona duru yohawana de ato yokokiloara. Masara ona ko idadiokaua yoara angamoi naa o Isiraele manga tentara utu yohupu o Ai ma kotaino de yaparangi o Ai manga tentara manga himangoka! De ona abe kangano yaniiki naga manga poretino de onangoo yomulaengoka yaparangi. Ho naa o Ai manga tentara yahigororomoka o Isiraele manga tentara ho ko kiaikakaua yoara. De o Isiraele ma nau-nauru gea yaparangi ka hiadono o Ai manga tentara yakokitomaka angamoi ko idadiokaua yoara.

²³ Abe gea o Ai manga koano dika ko iwitomaua, angamoi una gea ka iwitaokino de iwiao o Yosuaika.

²⁴ Ho o Isiraele manga tentara yaparangi de yaniiki o Ai ma nyawa mata-mataika ma hoanoka gea ka hiadono yahibinaaha yamataka. De ahao yogilio o Ai ma kotaika de hokogenangoo yodiai ma kota ma goronaka.

²⁵ De o Ai ma nyawa gea manga ngoe yasana ngimoi de hinooto, masara ma wange gea dika de ona mata-mata, ngaro o nau-nauru eko o ngo-ngofeka masara ona mata-mataika yohotumoka / ko yaiwaka.

²⁶ Abe o Yosua ai kuama wogila-gila wohidoakiye de wohitumutu ma kotaika hiadono o kota ma nyawa gea mata-mata yobinaahaka.

²⁷ De gea o Ai ma nyawa manga kiahonanga ihali-hali de manga aewani dika abe ko ibinaahaua. Abe gea o Isiraele ma nyawa yomahitoona dika la idadi manga hilaku ma utumu, de gea imakiniiki de Ma Jou ai huhuloko ma demo o Yosuaika ma dihiraino.

²⁸ De ahao o Yosua de ai nyawa yatufuku o Ai ma kota la duru irusakoka. De gea igoungu abe ma kota gea idadi hoka ma wale ma dounu dika, de ka hiadono ma oraha naa naga ko moiokaua yogogere genangoka.

²⁹ De nako o Ai manga koano, una gea o Yosua wahuloko ai nyawa la iwidideuku o gotaka o wange moi ma gahumu. Ho ma oraha ihumuririhuku de ahao ma koano ai badanga gea ihigutiuku o gotaka de auku. De ihigutiuku ipaha de yaumo dika o kota ma ngorana ma datekoka, de ahao yapohuku de o hakaru ma ngoe hiadono o bohuku ma amoko idadioka. De ma bohuku ma amoko gea ka nagahi hiadono o wange naa. De naa o ade-ade nenanga ma hidogo abe hamake Ma Jou ai Demo-demo ma bukuoka abe ihiromanga o Higalioli ma Pasala 27 ka hiadono ma Pasala 32. Abe genangoka hamake o Isiraele ma nyawa manga ade-ade abe yodiai ma oraha o Yeriko de o Ai ma nyawa yahikala ibooto de ahao yoiki o ngi moiikali la genangoka yomahuba manga Jouika. O Yeriko ma nyawa de o Ai ma nyawa yahihubaka Ma Jou o Yaweika de o bobinaaha de ahao o Yosua wahiaturu la o Isiraele ma nyawa yoiki o loku hinootoika abe moi ma romanga o Ebala ma loku de moi o Girisimi ma loku. Genangika yoiki la o lokuoka yomahuba Ma Jouika abe kiani hokogea la yaniiki Ma Jou ai behehongo onangika. Abe ma dihiraino de ai behehongo gea wihidoaka o Musaika ma oraha itigioka yowohama o Kanani ma tonakika. De ai behehongo gea hamake o Higalioli ma Pasala 27:1-8. Abe Ma Jou ai Demo-demoka gea de habasa abe hokokia Ma Jou wato kiani yodiai la ona de Una yomahiketehibehehongo la to Una ai behehongo de ai hiaturu ma pareta ka ihikaika yaniiki. Ho wahuloko la ka de yowohama o Kanani ma tonakika de kiani yoiki o loku hinootoika gea la ai behehongo ma hiowa ma demo de ai koboto ma demo yabasa mata-mata genangoka. Abe Ma Jou ai koboto ma demo gea ma titi manga hohowono abe adaene nako to Una ai behehongo de ai pareta ko ihingounua. De wahuloko la ai behehongo ma demo de ai koboto ma demo yotulihi o hakaruoka. Ho nako genangika yomahiadonoka de kiani o hakaru ma ago-agomo muruono naga ihigoko de yalapeoka de ma rupa hoka o mehele la ataulika ma hakaruika. De ma mehele gea ko itogowinuahi de kiani ihitulihi genangika Ma Jou ai pareta de ai behehongo mata-mata abe o Isiraele ma nyawa kiani yaniiki. De genangoka kiani ahao yodiaioli o huhuba ma ngi de yomahihuba o haharongo ma huhuba de o gogao ma huhuba ma ngoe. De manga hingounu yomahibehehongo Ma Jouika de iwihigiriiri de manga garago. De Ma Jou ai hiowa ma goronaka gea de ona yomakutuono yolomo de o rame-rame ma inomo. Hokogea ma dihiraino Ma Jou ai behehongo ma hiaturu abe Ma Jou wihidoaka o Musaika. De Ma Jou ai behehongo gea o Yosua duru ko wawohangua ho ka de o Yeriko de o Ai ma nyawa yahikalaka de ahao wohigila-gila Ma Jou ai behehongo o Isiraele ma nyawaika. Ho ona yoiki ngade-ngade o kilo moruange de iata ma gurutika abe hokogea imakitingaka ma gurutika manga ngi o Gigaloka de o Ebala ma loku ma dolaika. Hokogea o Isiraele ma nyawa manga ade-ade nenanga ma hitararono. De naa hohigila-gila manga ade-ade nenanga abe o Yosuali wohitulihuku ma titi ma oraha gea yodiai la yaniiki itiai Ma Jou ai behehongo ma hiaturu mata-mata gea.

O Hitararono ma hidogo

³⁰ De ahao o Yosua wodiai o huhuba ma ngi o Ebala ma lokuoka de ma huhuba ma ngi gea widingakoka Ma Jou o Yaweika abe Una o Isiraele ma nyawa manga Jou.

³¹ De o Yosua wodiai duru imaketero hoka Ma Jou ai duduhunu o Musa ma dihira wahibehehongo de ai behehongo gea wohitulihuku Ma Jou ai Pareta ma Bukuoka. Ho yaniiki abe wotulihi genangoka ma oraha ma huhuba ma ngi yodiai. De manga huhuba ma ngi gea yodiai o hakaruino masara abe kiani yapake o kia dika yamake genangoka ma hakaru yafafoiye la idadi manga huhuba ma ngi. De ko idadiua ma hakaru gea yapawa eko yapakoro de o alata o behino la ato ihitiai. De o huhuba ma ngi ma lokuoka yahihuba Ma Jou o Yaweiye o haro-harongo ma huhuba de o gogao ma huhuba.

³² De genangoka yahidiai o hakaru ma amoko muruono naga la to ena ma bakaika o Yosua wohitulihi ma pareta abe yamake o Musaino la yaniiki imaketero hoka o Musa wotulihi Ma Jou ai Pareta ma Bukuoka.

³³ De watoomuino genangoka o nyawa mata-mata abe naga o Isiraele ma nyawa manga doomuoka ngaro ona o Isiraele ma nyawa idodutu eko o homoaino ma nyawa abe yadionikino. De nagaoo manga hihira mata-mata, de manga balu-baluhu abe yatobahiaturu, de onangoo abe yatobaurusu o nyawa. De manga balu-baluhu mata-mata gea yomakokiokoino Ma Jou ai Peti arihonongaka la yahimanga manga hohidemoika o Lewi ma nyawaino abe yamoku Ma Jou ai Peti. De manga kokawaaha yaregu hinooto la yahirihimanga ho manga hononga naga o Girisimi ma loku ma geleforoka de manga hononga naga o Ebala ma loku ma geleforoka la Ma Jou ai huhuba ma ngi de ai Peti ihidogorona dau ma dolaka. Hokogea ma hiaturu yaniiki abe ma dihira Ma Jou o Yawe ai duduhunu o Musa wahibehehongoka wato kiani yaniiki la o Isiraele ma nyawaika yahiowa.

³⁴ Ka de o Yosua wabooto ai hiaturu ma karajaanga mata-mata gea de ahao wabasa Ma Jou ai behehongo ma demo ona mata-mataika, abe utu o behehongo ma hiowa, de utu o hohowono ma koboto abe yadaene nako Ma Jou ai pareta ko ihingounua. De gea mata-mata o Yosua wamake Ma Jou ai Pareta ma Bukuoka abe o Musa wohitulihuku genangoka.

³⁵ De abe o Musa ma dihira wihuloko o Yosuaika la wabasa Ma Jou ai demoino, moioo de ko iwa ma demo abe ko wabasaua o Isiraele ma nyawa manga doomu ma amokika. Ho ngaro o ngo-ngofeka, de o ngofa-ngofaka, de o homoaino ma nyawa abe yadionikino, ma ona mata-mataika ka idadi yoihene.