Yosua 7 - Ma Jou ai Demo-demo o Totobelohoka

O Akana ai howono Ma Jouika

¹ Masara o Isiraele ma nyawa gea Ma Jou o Yawe ai behehongo onangika yao ko itiaiua abe o Yeriko ma nyawa manga kiahonanga mata-mata ona kiani iwidingakoka Unangika. Ma Jou wato ena gea kiani yahihuba Unangika de o bobinaaha, masara naga womatengo ai romanga o Akana, una ko wohingounua Ma Jou ai behehongika. Abe ngaro ma kiahonanga gea kiani ona iwidingaka Ma Jouika masara naga utu o Akana gea womagorakoka. O Akana gea o Isiraele ma nyawa abe womahidutu o Yehuda ma dutuika de ai baba o Karami. De o Karami ai babali o Sabadi, de o Sabadi to una ai babali o Sera ho o Akana wokuwewete o Seraika. De ona gea mata-mata o Yehuda ai toforauku yadaene abe una o Isiraele ma nyawa manga dutu moi abe ona o dutu yangimoi de yahinootoino. De naa o Akana womagoraka o Yeriko ma kiahonangino abe kiani idadi manga huhuba Ma Jouika ho Ma Jou ai ngamo duru itagi ihauku o Isiraele ma nyawaika ma titi gea o Akana wodiaioka. Masara o Isiraele ma nyawa utu ko ihiorikuahi ma titi to Akana ai howono gea. De gea o Yeriko ma nyawa yahikalaka ho ona ato naa ka idadi yogila-gila o Kanani ma nyawa yahikala mata-mataika.

O Hitararono ma hidogo

² De o Isiraele ma nyawa ka yogogerohi o Yeriko ma dolaka de o Yosua wato wahidingoto ai nyawa o Amori ma nyawaika abe yogogere o Ai ma kotaka la yatailako to onangoli manga buturungu. O Ai ma kota gea itigioka o kota ma romanga o Popangao ma Tau abe nako to ona manga demo, o Bete-Awene. De manga kota o Popangao ma Tau ena gea itigi o kota utuoli abe ma romanga Ma Jou ai Tau abe nako to ona manga demo, o Betele. De manga kota ihiromanga Ma Jou ai Tau gea idateke o wange ma dumuniha. De naa o Yosua ona yatailako ko wahidingotuahi de wahingahu onangika wato, “Niloiki de niatailako o Ai ma kota de o tonaka abe imakadatekika.” Ho o nau-nauru yamuruono naga gea yosoboka de yoiki o Ai ma kotaika de yatailako hokokia manga buturungu ma nyawa ma kotaka gea.

³ Ka de yatailako mata-mata genangoka ibooto de yoboali o Yosuaino de iwihingahu ato, “Mia baluhu, abe ngomi miamake o Ai ma nyawa ko yowoeua. Ho borotaua ngone mata-mata hoiki haparangi o Ai ma nyawaika gea, ngaro ka inasana hinooto eko inasana hange dika ma gea ka inawedono la hahikala o Ai ma nyawaika. Borotaua ngone mata-mata hoiki angamoi to ona manga nau-nauru ko yowoeua, ho nako ngone mata-mata hoiki gea o bole-bole dika homahile.” Hokogea manga hingahu o Yosuaika.

⁴ Ho naga ngade-ngade yasana hange o Isiraele ma nyawa manga tentara yoiki la yaparangi o Ai ma nyawaika. Masara o Ai ma nyawahi yoputurungu ho yahidodohuku hiadono o Isiraele ma nyawa manga tentara yoara.

⁵ De o Ai ma kota o loku ma tubuoka ho o Ai ma nyawa yomulaenge daku manga kota ma ngoranoka de yakiniiki yahidodohuku o Isiraele ma tentara dau ma geleforuku. De naga ma geleforoka gea o Ai ma nyawa manga baiti abe ma dihiraino yomabaiti manga kota ma dadaduhu ma hakaru genangoka. Ho gea o Isiraele ma tentara yoara youti ma geleforuku de genangoka o Ai manga tentara yadaene. Ho ka de o Isiraele manga tentara yadaene de yatoma ngade-ngade yamoruange de yabutaanga. De hokogea idadi de o Isiraele manga tentara duru manga domoroini ko iwaka angamoi duru yohawanoka ho yoara ka hiadono to ona manga doomu ma ngiika.

⁶ De ma oraha yomahiadonino o Isiraele ma nyawa manga ngiino de o Yosua woihene abe idadi kangano de duru wohuha. De ahao una de o Isiraele manga baluhu yoiki Ma Jou o Yawe ai Behehongo ma Petika de genangoka manga pakeanga yakakihi de yomaoku-okutuku de o tonaka ma kafo manga mumukuku la ihitunguu manga hininga ma huha. De yomakokimotumuku o tonakoka Ma Jou o Yawe ai Behehongo ma Peti ma himangoka. De genangoka yomamotumuku ka hiadono yofutu.

⁷ De o Yosua womaniata wato, “Ahi Baluhu, ngohi naa duru tohuhaholi! Ngona Ma Jou o Yawe abe mata-mataika to Ngona ani kuahaka ho naa ma titi o kia hiadono hokonaa ma dubuho miamake? Ngomi naa ani nyawa, o Isiraele ma nyawa, de Ngona de ani buturungu nomihihora o Yorodani ma akerino masara abeika mia kangela naa! Adodoa ho Ngona nomihidoaka o Amori ma nyawaika abe yogogere o Ai ma kotaka gea la ka idadi ona imitoma dika? Nako hokonaa miamake ma dubuho de koaho ngomi mimagoo-gogere doka o Yorodani ma akere ma honongaka dika ngomi o Isiraele ma nyawa mata-mata.

⁸ Ahi Baluhu, Ma Jou o Yawe, o kia naga abe ngohi ka idadi tomidemo? Angamoi ngomi o Isiraele ma nyawa miloaroka o Ai ma nyawa manga himangoka.

⁹ Ho naa abe idadioka de ahao o nyawa abe yogogere o Kanani ma tonaka ma amokika ka de yoihene de onangoo manga domoroini naga ka hiadono imiparangi ngomino. De o nyawa utu manga gogere ma gurutika ma onangoo ahao yoihene ma ade-ade abe hokokia o nyawa ko yowoeua de imihikala ka hiadono miloara. Ka de gea yoihene de manga domoroini utuohi idogo ngomino de ona ahao yomakokitoomuino de ahao yomahikagaro hiadono yoboa de imihigilolitino. De ona yowoe-woe ho marai imihiofi o dunia ma lokuino ngomi abe mimahiromanga Ma Jou o Yawe ani nyawa. De nako hokogea idadi, de ahao hokokia Ngona nodiai la to Ngona ani romanga o nyawa agorakiye?” Hokogea o Yosua ai hininga ma huha womahingahu Ma Jou o Yaweika.

¹⁰ De Ma Jou o Yawe wotemo o Yosuaika wato, “Yosua, nomomikiye! Ngona nododoa nomamotumuku ahi himangoka hokonaa?

¹¹ Nia kangela naa idadi mangale o Isiraele ma nyawa yahowonoka Ngohino. Ona gea yatilakuroka ahi behehongo onangika abe tato kiani yaniiki. Ona yomagorakoka ena gea o Yeriko ma kiahonangino abe Ngohi tinihibehehongoka tato kiani nihidingakoka Ngohino dika mata-mata. Ho ona gea ihidohikoka ahi kiahonanga, de yoelukoka, de ma kiahonanga gea yomale de yomahitoonangoka hiadono yagogono manga tau ma goronaka.

¹² Ho gea ma titi hiadono o Isiraele ma nyawa ko idadiokaua yolaku de ka manga musuohi yoputurungu ka hiadono nia tentara yodohuku de yoara de hiadono utu yohonenge. De gea ma titi ani nyawa utu ihilawana Ngohino hiadono ngini mata-mataika ka idadi o bobinaaha inidaene. Ngini kiani ma kiahonanga gea nihibinaahakahi abe naga nia hidogoronaka imanoa de ahao ka idadi Ngohi tininiiki hoka ma dihirali de tiniduhunu.” Hokogea Ma Jou wihingahu o Yosuaika.

¹³ Hokogea wihingahu ibooto de ahao Ma Jou wihidumutu o Yosuaika manga ngekomo, wato, “Ho naa, Yosua, kiani ani nyawa nahiaturu la ona yomahitebinokahi ahi himangoka ma titi yomahidiai la manga hininga ma dumutu ka Ngohino dika. Ho ani hingahu ani kokawaahaika hokonaa, nato, ‘Ngini mata-mataika naa kiani nimahitebini Ma Jou o Yawe ai himangoka la nimahidiai la itebini o ngorumino ka idadi ngone haniiki gea abe kiani hodiai. Angamoi Ma Jou o Yawe, to ngone o Isiraele ma nyawa nanga Jou, wonahingahuoka wato, Ena gea abe Ngohi tomadingakoka naga ti ngini nia hidogoronaka abe nimahitinginioka. Ho kiani ma kiahonanga gea nihihupuokahi nia doomu ma goronaino de nihibinaaha angamoi Ngohi tinihibehehongokau nginika tato gea ena kiani idadi o hibinaaha ma huhuba Ngohino. Gea nidiai ibooto de ahao niamoroini niahimanga nia musuika.’” Hokogea Ma Jou ai hingahu o Isiraele ma nyawaika abe o Yosua ahao kiani wadofanga ona mata-mataika.

¹⁴ De Ma Jou wohigila-gilahi de ai hiaturu abe kiani yakokiniiki, wato, “Ho itebini ngini mata-mata nimahitebinoka de o ngoru-ngorumino ngini nimakawalimi niboa ahi Behehongo ma Petino de nimahikokimatoko Ngohi, Ma Jou o Yawe ahi himangoka la ka idadi tinihidumutu abe una wahowonoka. De hokonaa ma hiaturu: ihira kiani ngini mata-mata nimaregu o dutu homoi-homoiika abe nimahidutu de nia tofora o Isiraele ai ngofa-ngofaka manga romangika yangimoi de yahinootoino. De ahao nia dutu ma doomu yomakawalimi yoboa o Behehongo ma Peti ma himangino de Ngohi Ma Jou o Yawe ahao tinihidumutu nginika nia dutu moi gea abe onangoka naga nia gianongoru abe wahowonoka. De ahao nia dutu moi abe una wahowonoka to ona manga gogianongoruino. Ho, kiani o dutu gea yomareguoli de to onangoli manga dutu-dutu ma doomuoli. De ahao to ona manga dutu-dutu gea yomakawalimi yoboa o Behehongo ma Peti ma himangino. De Ngohi Ma Jou o Yawe ahao tinihidumutu nginika to ona manga dutu moi abe una gea wahowonoka to ona manga gogianongoruino. De ahao nia dutu gea abe tinihimatokoka onangoo yomareguoli de manga fam homoi-homoiika. De ahao to ona manga fam mata-mata yomakawalimi yoboa o Behehongo ma Peti ma himangino. De Ngohi Ma Jou o Yawe ahao tinihidumutu nginika o fam abe una manga gianongoru wahowonoka. De ahao o fam gea manga nau-nauru homoi-homoiika yomakawalimi yokokiboa o Behehongo ma Peti ma himangino de Ngohi Ma Jou ahao tinihidumutu una gea abe wohidohikoka ahi kiahonanga.

¹⁵ De kiani ngini niwihohowono una gea, abe winihimaleke ngini o Isiraele ma nyawa mata-mataika, angamoi naga unangoka ma kiahonanga abe Ngohi Ma Jou o Yawe tato ko idadiua ngini nimahitingini. Ho una gea niwihohowono de o uku ka ma moi de to una ai kiahonanga mata-mata. Ho ka ma moi niahibinaaha de o uku ka hiadono unangoo ma iwitinoka. Una gea watilakuroka to Ngohi, Ma Jou o Yawe, ahi behehongo de winihimaleke ngini mata-mataika angamoi una wodiaioka abe ko itiaiua nia hidogoronaka de winihiemono ahi himangoka. Hokogea Ngohi Ma Jou o Yawe ahi hiaturu ma demo onangika abe kiani ngona Yosua, nadofanga onangika.” Ho o Yosua duru wahingahu Ma Jou ai hiaturu ma demo gea o Isiraele ma nyawa mata-mataika de ona yomahitebini Ma Jou ai himangoka la manga gogaooka ma dadatoko ko iwa.

¹⁶ De ahao o ngoru-ngorumino o Yosua womaokoino Ma Jou ai Peti ma datekoka de o Isiraele ma nyawa wahoko o dutu homoi-homoi la yomakawalimi yoboa Ma Jou o Yawe ai himangino de Ma Jou ai hidumutu adaene o Yehuda ma dutu ma doomuika. Ka de ona iwihioriki una abe wahowonoka naga manga doomuoka de Yehuda ma nyawa yomareguoli de to ona manga dutu-dutu.

¹⁷ De ahao o Yosua wahoko o Yehuda ma nyawa manga dutu ma doomu homoi-homoi de yomakawalimi yoboa de Ma Jou o Yawe ai hidumutu adaene o Sera ai dutuika. De naa o Sera ai nyawa iwihioriki una abe wahowonoka naga to ona manga goronaka ho kiani o Sera ma dutu yomareguoli de to ona manga fam-famino. De ahao o Yosua wahoko to ona manga fam homoi-homoiino de onangoli yomakawalimi yoboa Ma Jou ai Behehongo ma Peti ma himangino de Ma Jou ai hidumutu adaene o Sabadi ma famika.

¹⁸ De ahao o Yosua wahuloko la o nauru mata-mata abe manga fam Sabadi la homoi-homoi manga nau-nauru yomakawalimi yoboa Ma Jou ai himangino de gea Ma Jou ai hidumutu adaene o Akanika. O Akana una gea to Karami ai ngofaka, de o Karami una gea to Sabadi ai ngofaka, de o Sabadi una gea to Sera ai ngofaka de ona mata-mata gea o Yehuda ma dutuino. De hokogea Ma Jou o Yawe ai hiaturu o Isiraele ma nyawa mata-mata yaniiki la hiadono iwimake una gea abe wahowono o Yeriko ma kiahonanga womagoraka.

¹⁹ Ho o Yosua witemo o Akanika wato, “Ahi ngofaka, ngona naa naga Ma Jou Wotebi-tebini ai himangoka ho nomangaku dika ani howono la gea Ma Jou o Yawe ai medebini ma dararono nagorakiye ma oraha napake ani demo ma gou-goungu. Ho naa, ahi ngofaka, ufa ani howono nomahipongono, nomahingahu dika ngohino gea abe ngona nodiaioka.” Hokogea o Yosua witemo ai gianongoru o Akanika.

²⁰ De o Akana wipaluhu o Yosuaika wato, “Ahi baluhu, igoungu, naga abe ngohi tomagorakoka! Ngohi naa tahowonoka Ma Jou o Yaweika, to ngone o Isiraele ma nyawa nanga Jouika. Hokonaa ngohi igoungu todiaioka.

²¹ Ma oraha ngone haleoka ma kiahonanga gea abe o Yeriko ma kotaino de ngohi tamakeoka o baju duru ma rorahai o Babele ma tonakino, de tamake o haaka o kilo hinooto de ma hononga, de o gurasi ma hapa ma baka-baka o dobiki moi abe ma dubuho o kilo ma hononga. Ka de manga kiahonanga gea tamake de ngohi duru tohafini enangika ka hiadono tomagorakoka, de tagogono ahi tauoka abe ahi tau ma goronaka tohibaituku. De ma haaka gea tonoa ena gea la itimi-timi.” Hokogea o Akana womangaku.

²² Ho o Yosua wahuloko ai hidingoto ma nyawaika la yoiki yatailako o Akana ai tauika de ona yoiki yomapopaata genangika. Ka de yomahiadonoka o Akana ai tauika de yowohama ai tau ma goronaika de genangoka yamake ma kiahonanga gea abe o Akana wohibaituku duru imaketero hoka wahingahuoka. De wagoungu, ma haaka gea wohitimi-timiuku ka ma moi de ma kiahonanga wotohikino gea.

²³ Ho yagoraka ma kiahonanga gea ai tauino de yao o Yosuaika la una de o Isiraele ma nyawa mata-mata ka idadi ena gea yamake ma oraha yakelenga ato Ma Jou o Yawe ai himangoka.

²⁴ De ahao to Sera ai kuwewete o Akana gea, o Yosua de o Isiraele ma nyawa yao ona o tau moi ka ma moi. Abe una de ma haaka, de o Babelino ma baju, de ma gurasi ma hapa ma baka-baka o dobiki moi, de to Akana ai ngofa-ngofaka ngaro o nauru ngaro o ngofeka, de ai hapi, de ai keledai, de ai domba, de ai tau o ngoerino, de ai kiahonanga utu mata-mataika yakokiaoka. Ho una de ai ngofa-ngofaka de ai tau, de ai kiahonanga ka ma moi yakokiao manga doomu ma ngi ma hoanika hiadono o dola moiika abe ahao ihiromanga o Kangela ma Dola.

²⁵ De genangoka o Yosua witemo o Akanika wato, “Ahi ngofaka, adodoa ho ngona nodiaioka naa ho hiadono ngone mata-mata nonahikangela? O wange naa de Ma Jou o Yawe kiani duru wonihikangela ngonaikali.” Hokogea o Yosua witemo ibooto de ahao o Isiraele ma nyawa mata-mata o Akana iwihakaru! De to una ai ngofa-ngofakoli yahakaru hiadono ona o tau moi yokokihonengoka. Ho ka de ona yahakaru ibooto de ahao yatufuku manga honenge ka ma moi de o Akana ai kiahonanga.

²⁶ De o Akana iwihipohuku de o hakaru ho hiadono itouniye angamoi o hakaru kohangoe. De manga lungunu ma hakaru gea nagahi genangoka ka hiadono o wange naa abe totulihuku manga ade-ade. Hokogea o Akana iwipohuku ibooto de ngaro Ma Jou ai ngamo duru ihauku, ma ka de hokogea iwihingounu ibooto de ai ngamo woporetoka. Hokogea idadi hiadono o wange naa ma ngi gea ihiromangohi o Kangela ma Dola abe nako to ona manga demo, o Akoro ma Dola.