Yosua 6 - Ma Jou ai Demo-demo o Totobelohoka

O Yeriko ma kota Ma Jou wahitoropaha

¹ Naa, o Kanani ma nyawa abe yogogere o Yeriko ma kotaka duru yamodongo o Isiraele ma nyawaika abe ona yomahitiginoka manga kotaino. Ho duru yomahidukusioka manga kota ma goronaka la ko moiua ka idadi yohupu eko yowohama ma hoanika. Ho manga kota ma dadaduhu ma ngorana abe idateke ma hoanika ena gea duru yakusi-kusioka.

² De Ma Jou o Yawe wihingahu o Yosuaika wato, “Yosua, abeika manga hawana o Yeriko ma nyawa! De manga hawana gea ma dodunguu abe manga kota nenanga tinihidoakoka ti ngini nia kuahaika ka ma moi de manga koano de manga tentara mata-mataika Ngohi tinihidotodoakoka.

³ De hokonaa ma hiaturu tinihidoaka nginika la nidiai. De nia hiaturu ihira la nia tentara mata-mata yomatatorika de yotagi de manga midirihoka yakiloliti ma kota gea o wange moi ma moi. De hokogea yodiai o wange-wangeiye ka hiadono o wange butaangaino ma dekana.

⁴ De nia hohidemo, abe inihidemo Ngohino, nahiaturu la onangoo yaniiki nia tentara o wange-wangeiye ma oraha o Yeriko ma kota yakiloliti. Abe ona utu yamoku to Ngohi Ma Jou o Yawe ahi Behehongo ma Peti de naga yatumidoli abe yahihira-hira ona abe yamoku ahi Behehongo ma Peti. De o hohidemo yatumidi abe yohira ona gea homoi-homoiika yasoino manga guguli o domba ma tatadukino. Hokogea o wange butaanga ma dekana ona de ti ngini nia tentara o Yeriko ma kota niakiloliti o wange moi ma moi dika. Masara ahao o wange ma tumidoka de kiani niakiloliti ma tumidino. De ma oraha gea nia hohidemo yatumidi gea ka ihikaika yawuwu manga guguli manga dodagioka.

⁵ Ka de niakiloliti ma tumidi ibooto de ahao ona manga guguli utuohi ilamokiye yawuwu hiadono ma ilingi yogirangika la ihailika ma dekana. De hokonaa Yosua, ani hiaturu ani tentaraika, ka de ona yoihene o guguli ma ilingi yogirangika ma amokiye gea de ona mata-mata kiani ka ma moiiye yomahagaaga! Ka de nia lolaku ma hagaaga ihaili de o Yeriko ma kota ma kurunga ma dadaduhu itoropahuku ka ma moi. De ka de itoropahoka de ka nianiikika o Yeriko ma nyawa niangohama ngini o nau-nauru mata-mata.” Hokogea Ma Jou o Yawe wahiaturu la ka idadi yahikala ona o Yeriko ma kotaka.

^6-7 De o Yosua, abe ai baba o Nuunu, una watoomu manga hohidemo mata-mata de ma hiaturu gea wahingahu onangika, wato, “Ngini naa o Behehongo ma Peti kiani niamoku de nianiiki nanga nau-nauru abe yomakokigaoino manga parangi ma dae ma oraha o Yeriko ma kota yakiloliti. De kiani naga ngini initumidi abe yahihira ona gea abe yamokuino o Behehongo ma Peti. De ngini abe niahihira-hira initumidi nimagao nia guguli o domba ma nauru ma tatadukino.” Hokogea o Yosua wahiaturu manga hohidemoika. De ahao una watoomu ai tentara de onangikali wahibehehongo de ai demo duru de ma buturungoka onangika, wato, “Ngone naa hokokisobo! Ngone mata-mata Ma Jou woigo wonapake de wonahimatoko ai lolaku ngoneino! De hokonaa ngone homatatoro ma hiaturu ma oraha o Yeriko ma kota hakiloliti, abe yohira nanga tentara manga doomu moi, de ahao nanga hohidemoli onangoo yotagi de manga guguli de Ma Jou o Yawe ai Behehongo ma Peti, de ahao nanga tentara ma hononga abe ngini niwoe-woe nikokitagi niahidoduruika nanga hohidemo la manga poretino hiadono ngone mata-mata hosobo, hokokitagi manga kota hakiloliti!”

⁸ Ka de hokogea o Yosua wahingahu de manga hohidemo yatumidi onangoo yosoboka manga tentara yahidoduruino de Ma Jou o Yawe naga onangoka ho imaketero hoka ai himangoka yotagi de manga guguli o domba ma nauru ma tatadukino yomulaengoka yawuwu. De ahao manga dodiawo o hohidemo gea abe yamoku Ma Jou o Yawe ai Behehongo ma Peti onangoo yosobo yahidoduruino.

⁹ De naga manga gogoana o tentaraino, abe naga de manga parangi ma daeoka, ona utu o hohidemo abe yawuwu manga guguli manga himangoka de naga utu yagoana o hohidemo manga poretino abe yamoku Ma Jou o Yawe ai Behehongo ma Peti la ka ihikaika yagoana manga dodagioka. Hokogea o tentara ma nau-nauru manga hohidemo yahidogorona de o hohidemo yatumidi gea ka ihikaika manga guguli yawuwu.

¹⁰ De o Yosua wahitiari manga nyawa mata-mataika wato, “Ma oraha ngone hotagi de moioo de ko idadiua hotemo. Ho kiani ngone hokokimouokahi abe, ngaro o demo moioo ma, ko idadiua ngini nitemo. Hokogea ka hiadono ma wange ma tumidi de manga kota haloliti ma tumidi de ahao naga ma oraha ngohi tinihingahuoka tato, ‘Nimahagaaga!’ Ho genangoka de ahao duru nanga ilingi ma amokiye ngone mata-mata homahagaaga! Masara ma oraha nanga dodagi ma goronaka kiani ngone mata-mata homatongohono dika.” Hokogea o Yosua wahibehehongo onangika.

¹¹ Ho gea yokokisobo de Ma Jou o Yawe ai Behehongo ma Peti yomagao de o Yeriko ma kota o Isiraele manga tentara mata-mata yakokiloliti ma moi ibooto de ahao yokokilio manga doomu ma ngiika de yomaidu genangoka.

¹² De ma dawangeino o Yosua womomiki duru o ngoru-ngorumino de o hohidemo yomahidiai abe yomahimoku Ma Jou o Yawe ai Behehongo ma Peti la yao.

¹³ De yosoboli ho manga hohidemo yatumidi ona de manga guguli o domba ma nauru ma tatadukino yawuwu yahihira-hira ona abe yamoku Ma Jou o Yawe ai Behehongo ma Peti. De naga o hohidemo manga himangoka de manga poretoka manga gogoana o tentaraino. De ona homoi-homoi de manga parangi ma daeoka yagoana manga dodagioka. De ka ihikaika o hohidemo yatumidi abe de manga gugulioka yawuwu manga guguli.

¹⁴ Ho o wange ma hinooto gea o Isiraele ma nyawa yakiloliti ma moioli o Yeriko ma kotaino ibooto de ahao yolioli manga doomu ma ngiika. De duru hokogea o wange-wangeiye yodiai o wange butaanga ma dekana.

¹⁵ De ahao ma wange tumidoka de duru o ngoru-ngorumino abe ahao ipotokaiha de o Isiraele ma nyawa gea yomomiki de yosobo o Yeriko ma kota yakilolitoli imakadaene de hoka o wange butaangaino ipopaha. Masara o wange ma tumidoka naa de yakiloliti ma tumidino duru o wange moi dika.

¹⁶ De o Yosua wadotokoka manga tentaraika gea wato, “Nako ngini adonoka ma tumidi manga kota niakiloliti ibooto de ahao nanga hohidemo yatumidi manga guguli ona duru apoputurungu yawuwu. Ho ka de o guguli ma ilingi ma amokiye de yogirangika gea de nginioo duru de nia ilingi de ma buturungu ngini mata-mataika ka ma moiiye duru nimakokihagaaga de o lolaku ma hagaaga! Angamoi duru ma oraha gea de manga kota Ma Jou o Yawe wonahidoakoka.

¹⁷ De kiani o Yeriko ma kota de ma dola mata-mata hahibinaaha! Ngaro o nyawa, de manga aewani, de manga kiahonanga, ma kiani hahibinaaha angamoi Ma Jou o Yawe ai behehongo ngoneino la mata-mata gea ngone hidingakoka Unangika ho ena gea mata-mataika homahihuba Unangika de o bobinaaha. Masara naga o Yeriko ma nyawa momatengo o ngo Rahaba homiduhunu abe ngaro muna gea momatobafukunu ami badanga, masara muna de ami dutu abe naga ami tau ma goronaka, ona kiani hahigunoa la yowango. Angamoi o ngo Rahaba gea abe maduhunu nanga gogianongoru yahinooto gea abe hahidingoto la ona yoiki yatailako manga kota, de ona gea muna magogono ami tauoka hiadono ka yowangohi ma oraha naa.

¹⁸ Masara ngaro o kia dika naga o kota ma goronaka gea ma, ko idadiua ngini nimagoraka angamoi mata-mata gea ka ma moi ngone hidingakoka Ma Jouika. Ho nako naga o Yeriko ma nyawa manga kiahonanga abe ngini nimagoraka de nimagao hiadono nanga doomu ma ngiika de gea nginioo inihibinaaha. De gea ngone o Isiraele ma nyawa mata-mataika ninahikangela nako naga nginioka abe nimale manga kiahonanga.

¹⁹ Bowahu dika manga kiahonanga abe yodiai o gurasino, de o haakaino, de o tabaagaino, de o behino, gea enangoo mata-mata hidingakika Ma Jou o Yaweika. Ho gea ena dika hagoraka de ahao hohingohama to Ma Jou ai gogogono ma ngi ma goronaika la ma hali-hali gea hihitouna.” Hokogea o Yosua wadotoko o Isiraele ma nyawaika abe kiani yodiai ma oraha ona o Yeriko ma kotaka Ma Jou o Yawe wahikala.

²⁰ Ho ka de o hohidemo manga guguli ma ilingi ma amokiye yogirangika de o Isiraele ma nyawa gea mata-mata duru yomahagaaga de manga ilingi ma amokiye. Ho ka ma moiiye to ona manga lolaku ma hagaaga de o guguli ma ilingi yogirangika de ka itodokanino de itoropaha! Abe o Yeriko ma kota ma kurunga ma dadaduhu itoropahoka! Ho gea o nau-nauru yamake ka de itoropaha ibooto de ona mata-mata yomataiti yangohama o Yeriko ma nyawaika de yahikala mata-mataika.

²¹ De angamoi o kota gea iwidingakoka Ma Jou o Yaweika ho o Isiraele manga tentara yapake manga dia la yahibinaaha mata-mata abe de ma womahoka. Hokogea yahihuba o kota ma dola Ma Jouika. Ho o Yeriko ma nyawa, ngaro o nauru, ngaro o ngofeka de ngaro manga gogilau eko yaperekioka ma, kiani o Isiraele ma nyawa yahihuba o Yeriko ma nyawa ka ma moi de to ona manga hapi, manga domba, de manga keledai.

²² Masara kanganoinohi o Yosua wahuloko o nauru yahinootoika abe ma dihira yatailako manga kotaika gea, wato, “Ngini kiani nimataiti ami tauika abe ami badanga momatobafukunu la muna de ami dutu niahihupu ona mata-mata la duru nia behehongo munangika nianiiki.” Hokogea o Yosua wahulokokau.

²³ Ho ka de o Yeriko ma kota yangohama, de o goduuru yahinooto gea abe ma dihira yatailako manga tonakika gea yaika ami tauika de o ngo Rahaba de ami dutu genangoka yahikokihupu, abe ami baba, de ngomi meme, de ami ira-iranga de ona mata-mata ami gogianongoru abe naga ami tau ma goronaka gea yahikokihupuoka. Masara ona ko idadiua yahikasapuru o Isiraele ma nyawa manga doomu ma goronaika ho yadiai to ona manga ngi moioli abe o Isiraele manga doomu ma ngi ma poretoka de genangoka yangotakika de yahigogere o ngo Rahaba de ami gogianongoru la ma hohutulu yatingakika.

²⁴ De ahao o Isiraele ma nyawa o Yeriko ma kota ihidutufuku ka ma moi de o nyawa manga honenge, de manga aewani ma honenge, de manga kiahonanga yahidutufukoka. Masara manga gurasi, de manga haaka, de manga tabaaga, de manga behi ihihupuokahi de ahao ihidutufuku. Angamoi kiani ma hali-hali gea ena ihingohama Ma Jou o Yawe ai gogogono ma ngiika.

²⁵ Masara o ngo Rahaba dika abe ami badanga momatobafukunu de ona ami tauoka, de ami gogianongoru utu abe duru ami dutu adaene, ona mata-mata gea ka yowangohi angamoi muna maduhunu o nauru yahinooto gea abe o Yosua wahidingoto o Yeriko ma kotaika la yatailako to ona manga buturungu. Ho muna de ami gogianongoru yogogere o Isiraele ma nyawa manga goronaka ka hiadono o wange naa abe to muna ami ade-ade naa ihitulihuku.

²⁶ De ma oraha gea yahihuba ma kota gea Ma Jouika de o Yosua wotemo de o koboto ma demo, wato, “Ngaro Ma Jou o Yawe wahohowono onaguna dika abe nako ahao, una wato wohitaili o Yeriko ma kota naa wohigokoli ma hungi! Ho ka de una wodiai abe idadi o kota ma lifunu, De ai ngofaka o nauru o domoro wohonenge, De ka de o kota ma kurunga ma ngorana ma dadatoko wodiai, De ai ngofaka ma bahali unangoli wohonenge.” Hokogea o Yosua ai koboto ma demo abe o Yeriko ma kotaika.

²⁷ Ho Ma Jou o Yawe naga ka ihikaika o Yosua winiiki. De o nyawa ma tonakoka gea ona mata-mataika iwihioriki o Yosua ma titi ai wowango ma datoro. Abe mata-mata una wodiaioka de wotemoka, gea o nyawa yomaketeade-ade hiadono duru ihikabarihi o tonaka ma amokika.