Yosua 4 - Ma Jou ai Demo-demo o Totobelohoka

Ma Jou wahihora o Isiraele ma nyawa de o heheranga hiadono yodiai o hohininga o hakaru ngimoi de hinootoino

¹ Ho ona mata-mata nagau doka o Yorodani ma honongaka de ahao Ma Jou o Yawe wihingahu o Yosuaika, wato,

² “Yosua, naa adonoka ma oraha o nau-nauru yangimoi de yahinooto abe niairikoka gea ona nahokino abe o Isiraele ma nyawa manga dutu ma doomu homoi-homoiika naga womatengo abe ona gea niairikoka.

³ De naa nahuloko ona o nauru yangimoi de yahinootoika la yatoomu o hohidemoika, ona dokena ka ma akerokahi yomaokoino. De genangoka kiani o nauru yangimoi de yahinooto homoi-homoi yomagoraka o Yorodani ma akere ma hakaru moi ma amoko. De homoi-homoi manga hakaru yomagoraka gea yao ihibarene ma dudungiye doka ma honongaika de yakelenga nia ngioka abe ngini o futu naa nimaidu genangoka.” Hokogea Ma Jou wihitararono o Yosuaika.

⁴ Ho o Yosua wahokino o nau-nauru yangimoi de yahinooto gea abe yahitunguu o Isiraele ma nyawa manga dutu ma doomu mata-mataika,

⁵ de wahuloko onangika wato, “Ngini naa niagilio nanga hohidemoika abe to ngone nanga Jou iwileleani dokea abe ka yamokuinohi Ma Jou o Yawe ai Behehongo ma Peti. De genangoka o Yorodani ma akere ma hakaru ngini o hakaru nimaketemomoi niamoku de niao nenangino. Hokogea nidiai la o Isiraele ma nyawa manga dutu ma doomu ngimoi de hinootoino naga to ona manga dodunguu ma hakaru homoi-homoiika.

⁶ De ma hakaru ngimoi de hinooto gea hapake la hodiai o hohininga ma dodunguu moi. De ahao ma oraha ti ngini nia ngofa-ngofaka yamake de marai inileha ngini o dimo-dimonika ato, ‘O kia ma titi o hakaru ma doomu naa?’

⁷ De ngini ka idadi niade-ade onangika abe hokokia ngini niwohama o Kanani ma tonakino naa. Abe niade-ade niato, ‘Ma oraha gea ngomi doka o akere ma honongaka de miato mitobongo masara o Yorodani ma akere mihitaana yanguihi ho ko idadiua mitobongo. Ma ka de nanga hohidemo yogila-gila ihidobongo Ma Jou o Yawe ai Behehongo ma Peti de Ma Jou wodiai la ma akere itoaka ho ka de o akere yadoko de o Yorodani ma akere ko ihahurokaua la ka idadi ngomi mata-mata mimahihora naa ma honongaino. Ho o hakaru ma doomu naa idadi nanga hohininga ngone o Isiraele ma nyawa mata-mataino ka hiado-adonika.’ Hokogea ma titi hiadono tinihikarajaanga de ma hakaru abe bootino niaoino.” Hokogea o Yosua ai hitararono o nau-nauru yangimoi de yahinootoika.

⁸ Ho o Isiraele ma nyawa manga nau-nauru gea yodiai duru imaketero hoka Ma Jou o Yawe wihibehehongo o Yosuaika de ai behehongo gea kangano wadofangoli onangika. Ona yaleino o hakaru ngimoi de hinooto o Yorodani ma akere ma goronaino la hokogea ihitunguu abe o Isiraele ma nyawa yomahitoomuika de manga tofora o Isiraele ai ngofaka yangimoi de yahinooto manga romangika. De manga hakaru gea yakelenga manga ngioka abe gea bootino yomaidu genangoka.

⁹ De ahao o Yosua unangoo wagilio o hohidemoika abe ona nagahi o akere ma goronaka de duru genangoka wodiai o hohininga ma dodunguu moioli. Abe una wafafo o hakaru ngimoi de hinootoli duru o hohidemo manga ngioka abe genangoka yomatongohono ma dekana yamokuino Ma Jou o Yawe ai Behehongo ma Peti o Yorodani ma akere ma goronaka. De ma hakaru ngimoi de hinooto gea nagahi manga dingiioka ka hiadono ma oraha naa ma ade-ade naa ihitulihuku.

^10-13 De igoungu hokogea yomatongohono o hohidemo o wange gea abe yamoku Ma Jou o Yawe ai Behehongo ma Peti. Abe ona yomaokoino o Yorodani ma goronaka ka hiadono manga dodiawo yodiai ibooto mata-mata gea abe Ma Jou o Yawe ma dihira wihibehehongoka o Musaika. De gea ka idadi yaniiki itiai mangale ma behehongo gea o Musaoo wihibehehongokali o Yosuaika. Hokogea hiadono kangano ma oraha yomahihora de yaniikoo o Musa ai hiaturu abe o nau-nauru manga dutu hangeino gea abe yososawaro yoparangi kiani yohira-hira yotobongo. Ona gea o Isiraele manga dutu ma doomu hangeino abe o Rubene, de o Gaada, de o Yusupu ai totoforauku ma hononga abe yomahidutu ai ngofakika o Manase. De o nau-nauru abe yososawaro yoparangi gea manga ngoe yasana moruata de ona homoi-homoiika de manga daeoka de angamoi yahihira-hira manga gogianongoru, o Isiraele ma nyawa, ho kangano ona yohira Ma Jou o Yawe ai himangoka yomahihora doka o behehongo ma tonakika. De o Kanani ma tonaka genangoka ihiromanga o Yeriko ma dola de genangika yogila-gila de yomahidiai yoparangi genangoka. Ho kangano o nau-nauru yasana moruata gea yomahihora ibooto de ahao o Isiraele ma nyawa utu ona yomatai-taiti yomahihora doka ma honongaika. De kiani manga hohidemo gea yomatongohono o Yorodani ma goronaka ma dekana. Ho yomatongohono hiadono manga gogianongoru yomahikokihoraka de ma hakaru yatorakoka ibooto de ahao ka idadi o hohidemo gea onangoo manga lou yakokigoraka de yogila-gila yomahihora doka manga gogianongoruika. De ona abe yohira yomahiadonikaka doka ma honongaika, ona gea yawuni-wuningi ma oraha manga hohidemoli yoboaino onangoli yomahihora o tonaka ma dudungino.

^14-18 Abe manga dodobongo ma hiaturu mata-mataika yabootoka de ahao Ma Jou o Yawe wihingahu o Yosuaika, wato, “Yosua, kiani nahoko o hohidemo gea la naa onangoo yosobo yoboaino yogila-gila yamoku to Ngohi ahi Behehongo ma Peti la onangoo yofarene o Yorodani ma akere ma ngigorino naa.” Hokogea wotemo Ma Jou ho ka de manga hohidemo yomahiadono o Yosua ai timiuku gea de wabehehongo onangika, wato, “Ngini tiniahoko de ahi horomati la naa nginioo nifareniye o Yorodani ma akerino.” Hokogea o Yosua wahoko o hohidemoika de ai horomati abe ona ka yamokuinohi Ma Jou o Yawe ai Behehongo ma Peti. Ho ona o Yorodani ma akeroka de aino yofarene ma dudungiye. De ka de manga lou yomahidoko o tonaka ma dudungiye de o Yorodani ma akere ihahuroli imaketero de hoka yanguihi imahidataoko ihahuru hoka o moku-moku iboa dinaoko ka hiadono hoka ma dihirali. O wange gea Ma Jou o Yawe wodiai de ai buturungu la utuohi o Isiraele ma nyawa de manga horomati ilamoko itagi o Yosuaika. De ona manga hiningaino o Yosua iwigorakiye ho una wodadi imaketero hoka o Musali manga himangoka. De hokogea manga horomati itagi o Yosuaika ka hiadono ai wowango ma bahaika.

¹⁹ De ma wange gea yowohama o Kanani ma tonakika duru adaene manga taongo ma mede duru ihira, de o mede gea ma tanggala ngimoiuku de o Yorodani ma akerika yomahihora de ahao yomahiaini o ngi moi abe ahao ona ihiromanga o Gigala. De ma ngi gea ma tonakoka abe idolaika o Yeriko ma dola ma honongaka abe idateke o wange ma hiwariha.

²⁰ De o Gigaloka gea o Yosua ma hakaru ngimoi de hinooto abe yagoraka ma akerino gea watatoro o tonakoka la idadi o hohininga ma dodunguu.

²¹ De ma hakaru gea o Yosua watatoro ibooto de wahingahu o Isiraele ma nyawaika wato, “Naa o dodunguu moi abe to ngone nanga hohininga abe ka ihikaika to ngone nanga totoforauku ka idadi yamake de yohininga abe nanga Jou wodiai nenangoka. Abe onagona dika ma oraha yoboa de yatilakuru ma hakaru ma hohininga nenanga de marai manga ngofa-ngofaka yaleha manga babaika ato, ‘Baba, naa o kia ma titi o hakaru naa o nyawa yatatoro de ma hapa hokonaa?’

²² Ka de yoleha hokogea de manga baba ka idadi yaade-ade manga ngofa-ngofakika abe hokokia ngone o Isiraele ma nyawa o Yorodani ma akerino naa homahihora o tonaka ma dudungino.

²³ De hokogea ka ihikaika ngone kiani homahiketehihohininga angamoi nenangoka ti ngini nia Jou, Ma Jou o Yawe, o Yorodani ma akere wohidudungoka ti ngini nia himangoka ka hiadono ngini mata-mata nimahihoraka doka ma honongaka de niaino. Hokogea ti ngini nia Jou, Ma Jou o Yawe, wonahidiai nanga ngekomo duru imaketero hoka ma dihira wonahidiai o Bongo-bongo ma gahino abe enangoo wohidudungu duru nanga himangoka ka hiadono homahihora doka ma honongaika.

²⁴ De gea Ma Jou wodiai la ngone de o dunia ma nyawa mata-mataika ahao iwihioriki abe gea ka Una dika duru de ai buturungoka hiadono hokogea idadi. De Una gea wodiai la ngini ka ihikaika niwimodongo Ma Jou o Yaweika de gea abe nia modongo ihititi duru nia horomatioka de aino.” Hokogea o Yosua ai hohininga ma hitararono ai gogianongoruika.