Yosua 3 - Ma Jou ai Demo-demo o Totobelohoka

O Isiraele ma nyawa o Yorodani ma akere yomahihora ma honongaika ho yowohamoka o Kanani ma tonakika

¹ De duru o ngoru-ngorumino o Yosua de o Isiraele ma nyawa yokokimomiki de ona yosobo ho manga ngi o Sitimi yanoaka de yoiki manga dumutu o Yorodani ma akerika. Masara ko yogila-gilauahi yotobongo o akerika ho yomahitigika dika de genangoka manga tau ihigokokali.

² De ona manga wange hange ipaha genangoka de ahao manga hihira yaika yaino yatutumu manga nyawaika.

³ De yahitararono manga kokawaahaika la ona ihioriki manga dodagi ma hiaturu abe kiani yaniiki ma oraha yoiki yowohama o behehongo ma tonakika. Yahingahu, ato, “Ona o Lewi ma nyawa abe inahidemo Ma Jou o Yaweika, de manga karajaangoo naga yamoku ai Behehongo ma Peti, ona nanga hohidemo gea, ahao inahihira-hira nanga ngekomika. Ho ngini niagoana la ka de niamake ona yoboa Ma Jou o Yawe ai Behehongo ma Peti yao de ngini nihioriki adonoka ma oraha hosobo ho kiani nimahidiai la nisobo, angamoi ona yohira-hira nanga datoroka ho ngone utu haniiki de hahidoduruika ona gea.

⁴ De hokogea ngini nianiiki ma ngekomo angamoi ko ma moiuahi niboa o ngekomino naa. De abe ngini niahidoduruika kiani naga ma hoana ngade-ngade o kilo moi abe Ma Jou ai Peti de ti ngini nia hoana abe hokogea ma gurutika nimakitingaka ma oraha hokokitagi. Duru ko idadiua nimahitigika Ma Jou ai Behehongo ma Petika!” Hokogea manga hihira yahitiari la ona mata-mataika ihidodiai yaniiki manga behehongo gea.

⁵ De hokogea yahitararono ibooto de ahao o Yosua wahingahu o Isiraele ma nyawa mata-mataika wato, “Ngini mata-mata kiani nimahitebinokahi Ma Jouika de ahao ka idadi hosobo. De gea itebini o ngorumino de ngini niamake o heheranga ma amoko abe Ma Jou o Yawe ahao wodiai nanga hidogoronaka.”

⁶ Ho ma dawangeino o Yosua wahibehehongo manga hohidemoika, wato, “Adonoka ma oraha ngini nimahimoku Ma Jou ai Behehongo ma Peti de ngini nisobo de niahihira-hira nanga nyawa nanga dodagika.” Hokogea o Yosua wahibehehongo de ona ka yomahimoku Ma Jou ai Behehongo ma Peti de yosoboka yotagi manga himangika.

⁷ De Ma Jou o Yawe wihingahu o Yosuaika, wato, “Yosua, o wange naa de Ngohi tomulaenge tonigorakiye o Isiraele ma nyawa manga himangoka. Hokogea Ngohi todiai la ona mata-mataika ihihioriki Ngohi abe toniniiki ngona imaketero hoka ma dodihiraino ka ihikaika o Musa tiniiki.

⁸ De hokonaa ngona nahibehehongo o hohidemoika abe yamoku to Ngohi ahi Behehongo ma Peti, nato, ‘Ngini ka de nimahiadono o Yorodani ma akerika de ko nimatogumuahi nia dodagioka. Kiani ngini nioaguroli ma akerika la nitobongo masara ka ma datekokahi niaika de nimatogumohi genangoka.’” Hokogea o Yosua wahiaturu manga hohidemoika abe ona yatobamoku-moku Ma Jou ai Behehongo ma Peti.

⁹ De ahao o Yosua wahoko o Isiraele ma nyawa manga kokawaahaika wato, “Ngini mata-mata kiani nimatoomuinohi ngohino naa la ka idadi ngohi tinihingahu Ma Jou o Yawe, ti ngini nia Jou, ai demo nginika!” Hokogea wahoko ho ona yomatoomuino o Yosuaka,

¹⁰ de una wato, “Ngini kiani nihikokioriki abe Ma Jou Wowango-wango Una naga wininiiki nia hidogoronaka de gea Una abe ahao o nyawa mata-mata abe yogogere o Kanani ma tonakoka wakiniiki hiadono manga tonaka idadiokali ti ngini nia tonaka. Ho ona o Kanani ma nyawa, de o Hete ma nyawa, de o Hewi ma nyawa, de o Ferisi ma nyawa, de o Giragasi ma nyawa, de o Amori ma nyawa, de o Yebusi ma nyawa ona mata-mata wakiniiki ma tonakino naa.

¹¹ Abeika, Ma Jou ai Behehongo ma Peti abe inihihira-hira ma oraha nimahihora o Yorodani ma akere ma honongaika, o peti gea to Una o dunia ma amokika ma dutu, de to Una ai peti gea ihihira-hira ihidobongo o Yorodani ma akerika.

¹² De naa o hiaturu moioli abe ngini o Isiraele ma nyawa o dutu ngimoi de hinooto, kiani nianiiki. Ngini o dutu ma doomu homoi-homoiika niwiiriki womatengo nia nyawaino de ahao naga ma oraha tinihingahu abe hokokia una ahao kiani wodiai.

¹³ Abe hokonaa ahao idadi ma oraha o Yorodani ma akere hotobongo de gea Ma Jou o Yawe wonahimatoko to Una ai mobuturungu la duru ka ihikaika ngini ko niawohangua Ma Jou o Yawe Una o dunia ma amokika ma dutu. Abe Una gea ahao wodiai la o Yorodani ma akere ko ihahurokaua ho bowahu ikiliorino dika. Abe ka de o hohidemo abe yamoku Ma Jou o Yawe ai Behehongo ma Peti yadoko o Yorodani ma akeruku de itodokanino ma akere gea itoakoka ho dai manga hononga ma akere igila-gilaka ihahuru ho iowahoka. De dina manga hononga ikiliorino ho bowahu genangoka itoomuino dika abe ifululuniye ma dingiioka dika.” Hokogea o Yosua wahingahu abe ahao hokokia o heheranga idadi onangika.

^14-15 De ma oraha gea o Kanani ma tonakoka o gandumu ma gugutuku ma oraha de, hoka ma biaha ma tonakoka gea, nako o gugutuku ma oraha de dina duru iawa-awana o Yorodani ma akere ma utuino ho ka ihikaika o Yorodani ma akere yangui-nguihi. Ho ma wange gea yotobongo de igoungu yanguihi o Yorodani ma akere masara ngaro hokogea ona o Isiraele ma nyawa manga tau o ngoerino yakokikilianga de yosobo de ona o hohidemo abe yamoku Ma Jou ai Behehongo ma Peti ona yohira-hira. De ka de yomahiadono ma akerika de manga hohidemo gea ka yogila-gila yotobongo ho yaika ma datekoka de ka de ona adoko yodobongo ma akeruku de

¹⁶ o Yorodani ma akere itoaka! Dina ma gurutiha abe genangoka o ngi moi ma romanga o Adama, de genangino itoaka ma akere abe ma tonaka genangoka ihiromanga o Saratana. Ho o Yorodani ma akere genangoka de ihahuru ka imahidataoko hiadono igila-gilaoko daioko. Ho jai-jai dika de ko ihahurokokaua o Gahi ma Honengoko, de abeika manga dodobongino iowahoka! Ho o Isiraele ma nyawa ka idadi yogila-gila yomahihora doka o Yorodani ma akere ma honongaika abe doka manga himangoka ko ikurutikakaua naga genangoka o Yeriko ma kota.

¹⁷ De ma oraha ona mata-mata yomahihora de manga hohidemo yomaokoino dika o tonaka ma dodogowinoka o Yorodani ma dodobongino ma goronaka. De duru yomarii-riidoka dika genangoka ka hiadono o Isiraele ma nyawa yomamata yomahihora ma dudungika de ka hiadono ona mata-mata yomahikokiadonoka doka ma honongaika.