Yosua 24 - Ma Jou ai Demo-demo o Totobelohoka

Ma Jou o Yawe wohigalioli ai Behehongo o Isiraele ma nyawaika

¹ O Yosua ai hingahu o Isiraele ma nyawa manga hohidimono mata-mataika ibooto de ahao una o Isiraele ma nyawa ma kokawaaha de manga hihira wakokiahokino la ona mata-mata yokokiboa o Sikeme ma kotaika. Ho ona yoboa de yomatoomuino ka ma moi de manga hohidimono abe yaperekioka, de manga haeke o dodoomuoka, de ona abe yatobauru-urusu manga gogianongoru abe yahowono, de manga tentara ma hohidimono ona mata-mata yoboa o Sikeme ma kotaino. De ona mata-mata gea yomatoomuino Ma Jou ai himangoka yododamaa to Una ai demo onangika.

² De ahao o Yosua manga doomu ma amokika gea wahimanga de wahingahu onangika wato, “Hokonaa Ma Jou o Yawe, to ngone o Isiraele ma nyawa nanga Jou, to Una ai hohininga ma demo ngone o Isiraele ma nyawaino. Una wato, ‘Ma dodihiraka abe ti ngini nia totofora o Tera de ai ngofa-ngofaka o Abarahaama de o Nahoro, ona gea yogogere doka o Efaraata ma akere ma honongaka de yomatobahuba-huba o jou-jou ma homoaika.

³ De ahao nia tofora o Abarahaama tihihupu ai tonakino gea, doka o Efaraata ma akere ma honongaka, de Ngohi Ma Jou tiao hiadono o Kanani ma tonakika de tihidagi-dagi o Kanani ma tonaka ma amokika de genangoka tihidoaka ai ngofakika o Isaka. De o Isakino tihidoaka o Abarahaama ai danongo de ai totoforauku manga ngoe.

⁴ Abe tihidoaka o Isakika ai ngofaka yahinooto o Yakubu de o Esau. De tihidoaka o Esauika o tonaka o loku-lokuoka abe ihiromanga o Seiri ma tonaka. Masara o Yakubu de to una ai ngofaka mata-mata yokokiloiki daku o Mesiiri ma tonakika.’”

⁵ De Ma Jou wohigila-gila de ai hohininga ma ade-ade wato, “De nia totofora ona ika-ika yokangela o Mesiiroka de Ngohi taduhunu onangika abe tahidingoto o ria-dodoto o Musa de o Harunu onangika. De o Musa de o Harunu tapake la yahinootoino gea Ngohi duru tohiboa o kokangela ma hohowono o Mesiiri ma nyawaika! De o kokangela onangika imakiniiki de ahi duduhunu nia totoforaika abe hokogea todiai la ka idadi ona tahihupu o Mesiiri ma tonakino.

⁶ Masara ka de ti ngini nia totofora gea yomahiadono o Bongo-bongo ma gahi ma ngigorika de ahao o Mesiiri ma nyawa duru yoluku la o Isiraele ma nyawa yohupu ho hiadono yanii-niiki de manga parangi ma gogoroba abe atauru de o kuda.

⁷ De ma oraha nia totofora yamake o Mesiiri ma nyawa gea yoboa de duru de manga hawana ihiboa-boaka Ngohi Ma Jou o Yaweino la taduhunu. De ona gea ko yadonuahi nia totoforaika de Ngohi tadatoko de o fufutu hiadono o Mesiiri ma nyawa ko idadiua yadaene. De ahao ona tahidatamunu de o gahi ka ma moi o Mesiiri ma nyawauku hiadono yakokilutuoka. De ti ngini nia totofora de manga lako ma hirete yamake mata-mata gea abe Ngohi nia Jou todiai. De ahao nia totofora yogogere o tonaka ma kakaahaka ma dekana.”

⁸ De o Yosua wogila-gila wadofanga Ma Jou o Yawe ai hohininga ma ade-ade o Isiraele ma nyawaika, wato, “Ka de uku de Ngohi ahi nyawa o Isiraele ma nyawa tahihira-hira o Amori ma nyawa manga tonakika abe naga o Yorodani ma akere ma honongaka abe doka o wange ma botokaiha. De o Amori ma nyawa gea duru yaparangi masara Ngohi tahidoaka o lolaku nia totoforaika hiadono o Amori ma nyawa manga tonaka ka idadi yomahitoona de onangoli yogogere genangoka.

⁹ De ahao naga ma oraha o Moaba ma nyawa manga koano o Balaka abe o Siporo ai ngofaka, una naga ai hidee yaparangi. Abe ma oraha gea o koano o Balaka wibehehongo o Beoro ai ngofaka o Bileamika abe una wososawaro wotobamai-maihi la una woboa de wagahoko o kokangela yadaene o Isiraele ma nyawaika.

¹⁰ Masara o Bileama gea Ngohi Ma Jou ko tigihenua ho ko tihigunoaua hokogea nia totofora wahikangela ka hiadono Ngohi tihuloko la una ahi nyawa wahiowa dika. Hokogea Ngohi Ma Jou ahi nyawa tadatoko o koano o Balaka ai hidee ma dorouino.”

¹¹ “De ngini utu ka o ngofa-ngofakohi abe ma oraha o Yorodani ma akere ngini o Isiraele ma nyawa nimahihora ma honongaino ho niwohamoka o Kanani ma tonakino naa. De niboa o Yeriko ma kotaino de o Yeriko ma nyawa inilawana masara niahikalaka. De naga o nyawa utu manga ngoe iniparangi abe o Amori ma nyawa, o Ferisi ma nyawa, o Kanani ma nyawa, o Hete ma nyawa, o Giragasi ma nyawa, o Hewi ma nyawa, de o Yebusi ma nyawa. Ona mata-mata iniparangi la inihihupu o tonakino naa masara Ngohi Ma Jou tinihidoaka o lolaku ka hiadono niahikala ona mata-mataika.

¹² De Ngohi tapake o ofungu la ena ihira yaparangi o Amori ma nyawa manga koano yahinooto de manga tentara. De ngaro ma oraha gea nginioo niaparangi onangika masara nia lolaku gea ko ma titiua nia sosawaro, de nia humaranga, de nia toimi. Igoungu, nia lolaku gea duru ihititi de ahi ofungino gea.

¹³ Ngohi tinihidoakoka o tonaka naa de o inomo ma ngoe nagau ma oraha niwohama abe nia inomo gea ko ti nginiua nia karajaanga ma kangelaino de hiadono niamake. De tinihigogere o kota ma ngoeika abe ko nginiua nia kangelaino nihigoko abe ka hiadono ma oraha naa nia gogere o kota homoi-homoioka gea. De tinihidoaka o angguru ma redi ma ngoe de o saitunu ma redi ma ngoe abe de ena gea tinihidailako nia ngokere de nia minya.” Hokogea Ma Jou o Yawe ai hohininga ma demo onangika abe o Isiraele ma nyawa manga doomu ma amokika.

¹⁴ De ahao o Yosua wahigaro ona mata-mataika wato, “Ho naa ngini nikokiihenoka Ma Jouino abe hokokia Una wonahihira de wonaduhunu ngone o Isiraele ma nyawa ma dodihiraino ka hiadono ma oraha naa. Ho naa ngohi o Yosua ahi hininga tinihingahu nginika: Ngini kiani de nia horomati ma modongo Ma Jou o Yaweika niwileleani. De kiani nia hininga itiai abe o kia dika niwihibehehongoka nia Jouika niato gea nidiai de gea kiani niagoungu hiadono nidiai duru imaketero de abe niwihibehehongoka Unangika. Ho kiani duru nianoaka o popangao abe hoka nanga totofora ma dihira yoleleani enangika manga kapongoka abe doka o Efaraata ma akere ma honongaka. De o popangao abe nanga totofora yoleleani o Mesiiri ma tonakoka enangoo ibootohi ngini nimahuba-huba enangika. Ho naa, tinihigalioli tinitemo, ahi gogianongoru, ngini kiani niwileleani ka Ma Jou o Yaweika dika!

¹⁵ De nako ngini ko nioigoua niwileleani Ma Jou o Yawe de kiani duru o wange naa dika de ngini homoi-homoiika nimaputuhu abe onagonaika ahao nileleani. Ho, sarakia ngini? Niwileleani Ma Jou, eko nioleleani o jou ma homoaika abe imaketero hoka nanga totofora ma dihira yoleleani doka o Efaraata ma akere ma honongaka? Eko marai nioigo nioleleani o Amori ma nyawa manga jouika abe ma oraha naa ona gea niaturuuruoka ho nginioli nigogere manga tonakoka. Marai nioigo la to ona manga jou gea nioleleani eko sarakia? Masara nako ngohi de ona mata-mata ahi tauoka, ngomi mimaputuhoka wiwileleani ka Ma Jou o Yaweika dika! Ho ngini sarakia?”

¹⁶ Hokogea o Yosua waleha onangika de ona mata-mata ka ma moiiye yopaluhu, ato, “Ngomi naa duru mioluku Ma Jou o Yawe wiwinoaika la hiadono mimahuba-huba o jou ma homoaika!

¹⁷ Abeika, nanga gogianongoru ma dihira o Mesiiri ma nyawa yahidadi manga huhuloko dika de ahao Ma Jou o Yawe, to ngone nanga Jou, Una wahihupu manga kokangela ma karajaangino o Mesiiri ma tonakoka! Una wodiai o heheranga duru ma amoko hiadono ngoneoo de nanga lako ma hirete hamakeoka! De gea Una abe wonapaliara nanga dodagino abe o tonaka ma kakaahaino de wonaduhunu ma oraha ngone naga nanga musu manga hidogoronaka ka hiadono ngone ka howangohi o wange naa!

¹⁸ De gea Una Ma Jou o Yawe abe o Amori ma nyawa de o nyawa utu wahihupu manga gogerino o tonakoka naa. Ho ngomi ma oraha naa mia hininga imaketero hoka ngonali, abe duru mimaputuhu wiwiniiki ka Ma Jou o Yaweika dika de wiwileleani angamoi ka Una dika to ngone nanga Jou!” Hokogea ona mata-mata abe yomatoomuino genangoka yopaluhu o Yosuaika.

¹⁹ Masara o Yosua ai hingahu onangika ka wohigila-gilahi, wato, “Masara ufa nimataitiholi nimahingahu abe ngini ka niapoa niwileleani itiai Ma Jouika. De hokogea totemo angamoi Una duru wotebi-tebini ho wodohata o howonika, de ai nyawa duru ko wahigunoaua yomahuba-huba o popangaoika. Ho nako ngini hokogea nitemo masara ahao ka de ipahaino de niwilawana de niahowono Unangika de ahao Una ko winihiapongua ti ngini nia lawana de nia howono gea.

²⁰ Ho nako ngini Ma Jou o Yawe niwiporetika de ahao nioleleani o jou ma homoaika de Una ahao winilawana. De ngaro hokonaa ma dekana duru de ai hininga ma owa winipaliara irahai ma ka de niwiporetika hokogea de ahao ai hohowono ai ngamoino inidaene de ka hiadono kiani Una winihibinaaha.”

²¹ De o Isiraele ma nyawa manga babaluhu ma demo o Yosuaika ato, “Koua, ngomi naa duru de mia hininga ma buturungoka mimaputuhoka miato, ngomi mata-mata wiwileleani ka Ma Jou o Yaweika dika.”

²² De o Yosua wato, “Nako hokogea nimaputuhoka marai ka idadi nimahikoboto la ti ngini nia tagongo naga abe iti nia putuhu gea niagou-goungu.” De ona yopaluhu ato, “Igoungu ngomi naa ka idadi mimahikoboto ho mia tagongo naga de ko minielukua!”

²³ De ahao o Yosua watemoli onangika wato, “Nako nia hininga hokogea kiani o popangao mata-mata abe naga nginioka gea kiani nihibinaaha mata-mataika la duru ko moiokaua naga nginioka. De kiani ngini homoi-homoiika nia hininga ma dumutu duru ka Ma Jou o Yaweika dika abe to ngone o Isiraele ma nyawa nanga Jou la ka Una dika niwileleani.”

²⁴ De ona mata-mata yopaluhu o Yosuaika de manga behehongo ma demo ato, “Ngomi miagou-goungu wiwileleani to ngone nanga Jou dika Ma Jou o Yaweika. De mia hingounu ka Unangika dika wiwihingounu.”

²⁵ Hokogea to ona manga doomu ma demo o Sikemoka o wange gea ho o Yosua wodiai manga behehongo ma demo abe ma titi ona de Ma Jou o Yawe yomahiketehibehehongoka de ihitulihukuoka ho ma hurata gea ko idadiua ona ahohihanga ngaro ka hiado-adonika.

²⁶ Abe o Isiraele ma nyawa manga behehongo ma demo Ma Jou o Yaweika gea o Yosua Ma Jou ai himangoka wohitulihuku o bukuoka abe ihiromanga, “Ma Jou ai Behehongo ma Pareta ma Buku.” De ahao o Yosua wohigoko o hakaru ma amoko la idadi to ona manga hohininga ma dodunguu. De hokogea wodiai la ufa yawohanga manga behehongo ma gou-goungu ma demo abe ona de Ma Jou o Yawe yomahiketehibehehongoka. De o hohininga ma dodunguu gea o hakaru ma amoko abe yalulu o gota ma timika abe iwango duru Ma Jou o Yawe ai Tau o Ngoerino ma datekoka.

²⁷ Gea mata-mata o Yosua wobootoka de ahao watemo ona mata-mataika wato, “O hakaru ma amoko naa Ma Jou o Yawe ai demo mata-mata abe womihingahu o wange naa enangoo iihenoka. Ho ma hakaru naa ahao duru inihitaana nia howono abe nako idadioka ngini ko nianiikokaua ti ngini nia behehongo ma demo Ma Jouika.”

²⁸ Hokogea o Yosua ai higaro ma demo wabootoka ho wahingahu onangika wato manga doomu ibooto ho ka idadi yokokilio manga tau homoi-homoiika abe naga to ona manga oara ma tona-tonakoka. Itigioka o Yosua wohonenge de o Isiraele ma nyawa manga hihira o Yosua watoomuino de wahigaro hiadono ona iwihibehehongoli Ma Jouika abe ka Una dika iwiniiki.

Itigioka o Yosua wohonenge O Hitararono ma hidogo

²⁹ De o Yosua, abe to una ai baba o Nuunu, una ai wowango ma datoroka duru witobaleleani Ma Jou o Yaweika de ai ngumuru adonoka ai taongo o ratuhu moi de ngimoi de una wohonenge.

³⁰ De o Yosua iwilungunu to una ai oara ma tonakoka abe naga o Timata-Sera ma loku-lokuoka abe o Isiraele ma nyawa yomahidutu o Efaraimika. De o Yosua ai tonaka gea to ona manga hidokuino ma tonaka gea abe dau o Gaasa ma loku imakadateke.

³¹ De abe ma oraha o Yosua wowango de o Isiraele ma nyawa duru iwiniiki Ma Jou o Yawe. De ngaro una wohonenge ma, ona ka iwiniikohi Ma Jou o Yawe abe ma oraha manga hihira nagahi abe yomahikumuru de o Yosua. Abe ma oraha o Yosua wahihira-hira de Ma Jou o Yawe wodiai o heheranga ma ngoe manga hidogoronaka de waduhunu o Isiraele ma nyawa ma ngoe. De Ma Jou ai karajaanga gea o Isiraele ma nyawa manga hihira abe yomahikumuru de o Yosua yamake de to ona ma hirete manga lako. Ho ma oraha manga hihira gea ka yowangohi de o Isiraele ma nyawa ona Ma Jou ka iwiniikohi itiai.

³² De manga tofora o Yusupu ai kobongo abe ai gogianongoru yao o Mesiirino gea o Isiraele ma nyawa yao manga tonaka ma honongaika abe o Sikeme ma romanga la ka idadi genangoka alungunu. Abe ma dihira o tonaka genangoka manga tofora o Yakubu womaija o Hamoro ai ngofa-ngofakino de ma ija o tiwi ise-senge o ratuhu moi abe o haakaino. De o Hamoro ai ngofaka womatengo ai romanga o Sikeme. De o tonaka gea abe o Yusupu ai baba womaija ahao idadi ai totofora manga tonaka ma hidoku abe o Manase de o Efaraimi manga totoforauku manga tonaka. De duru genangoka o Yusupu ai kobongo alungunu ho o Yusupu ai lungunu naga o Sikeme ma tonakoka.

³³ De manga hidemo Ma Jouika o Eleasara abe wituruuru ai baba o Harunu ho unangoli wodadi o Isiraele ma nyawa manga hidemo wokokurutiye de naa, unangoo ma, wohonengoka. De o Eleasara gea iwilungunu o Gibea ma tonaka daku ma loku-lokuoka abe enangoo idadi o Efaraimi ma nyawa manga hidoku o Kanani ma tonakino. De o Eleasara ai ngofaka o Pinehasa wamake ai tonaka genangoka ho ai baba o Eleasara iwilungunu ma tonakoka gea.