Yosua 23 - Ma Jou ai Demo-demo o Totobelohoka

O Hitararono ma hidogo abe ma titi hokokia idadi o Yosua o Pasala 12 hiadono o Pasala 22 O Yosua ai behehongo ma demo ma baha o Isiraele ma nyawa manga hohidimonika

¹ De o taongo muruono ipahaika abe Ma Jou o Yawe duru o Isiraele ma nyawa waduhunu hiadono ko yomaketeparangiokaua de manga musu abe yogogere o Kanani ma tonakoka gea. Ho naa adonoka ma oraha o Yosua iwiperekioka.

² De una wahokino o Isiraele ma nyawa manga hohidimono abe yaperekioka. Ho ona abe yoboa manga haeke o dodoomuoka, de ona abe yatobaurusu manga gogianongoru abe yahowono, de manga tentara ma hohidimono ona mata-mata yokokiboa. De ona o Yosua watoomuinoka de wahingahu onangika wato, “Ngohi naa duru ihiperekioka.

³ De ngini o Isiraele ma nyawa manga dimo-dimono niamakeoka de ti ngini nia lako ma hirete o heheranga mata-mata abe Ma Jou o Yawe wodiai nginika la winiduhunu hiadono winihiriidi nia tonakoka naa. Una Ma Jou o Yawe waparangi onangika ka hiadono nia musu ko inihikalaua.

⁴ Abeika ngohi o tonaka nenanga tinihikodokuoka nginika abe ahao idadi ti ngini nia totoforauku manga oara ma tonaka ngaro ena gea o nyawa abe hahikalaka manga tonaka eko to ona manga tonaka abe ko hahikalauahi. Masara o tonaka mata-mata gea abe o Yorodani ma akere ma batingoka ka hiadono doka o Gogorona ma Gahika ena mata-mata idadioka ti ngini nia tonaka.

⁵ De ngaro naga o nyawa utu abe ka yogogerohi genangoka masara onangoo Ma Jou o Yawe ahao wahihupu hiadono ko moiokaua naga to ngone nanga tonakoka. De ngini ahao ona niaturuuru manga ngiika la nginioli nigogere o tonakoka gea duru imaketero hoka ma dihiraino Ma Jou o Yawe winihibehehongoka.”

⁶ “Ho naa ngohi duru tinihigaro la ngini de nia buturungu ma gahumu kiani nianiiki Ma Jou ai behehongo ma hiaturu mata-mata abe ihitulihukuoka o bukuoka abe ma romanga o Pareta ma Buku o Musaino. O buku ma dola gea kiani nianiiki duru itiai hiadono duru ko nirehe-rehenua.

⁷ Ho kiani duru nimahidodiai la ufa nimaketedodiawo de ona abe ka yogogerohi o tonakoka naa. Ngaro to ona manga jou-jou ma roma-romanga, ma, ufa niafetongo. De utuohi nimagoana la ufa nimahuba enangika. De duru nimahidodiai la ufa nihikoboto de niapake o jou gea ma romanga nia koboto ma demo ma goronaka. De duru ko idadiua nioleleani enangika gea.

⁸ Masara kiani niwileleani ti ngini nia Jou, Ma Jou o Yawe. Ngini ka ma dihirainohi de ka hiadono ma oraha naa nianiiki Ma Jou ai behehongo mata-mata abe ngone de Ma Jou homahiketehibehehongoka. De kiani ka ihikaika ngini mata-mata de nia hininga ma gahumu nianiiki ai behehongo gea.”

⁹ De o Yosua wogila-gila watemo manga hohidimonika wato, “Abeika Ma Jou o Yawe ai duduhunu ngoneino! Ngaro o tonakoka naa o nyawa manga ngoe de manga doomu ma amoko abe yomaketemomoi manga popareta de manga hiaturu masara Ma Jou wonaduhunu. Abe ona de manga buturungu de manga kuaha duru ma amoko, masara ka to Unangohi ai buturungu de ai kuaha ilamoko ho wahihupuoka manga tonakino naa. Ho ngaro naga o nyawa de manga buturungu hokogea masara ko yaiwa abe ka idadi inahikala ngone o Isiraele ma nyawa ka hiadono o wange naa.

¹⁰ De ngaro o parangi ma goronaka de abeika nanga duduhunu Ma Jou o Yaweino, abe idadioka hiadono ngini o nau-nauru ngaro ka womatengo dika masara Ma Jou wihiakunu la ai musu waloaroka yasana moi. De gea duru womahitaana abe nia Jou, Ma Jou o Yawe, waparangi onangika duru imaketero hoka winihibehehongoka nginika.

¹¹ Ho ngini kiani duru nimahidodiai la nia dora itagi ka ihikaika nia Jouika, Ma Jou o Yaweika.”

¹² “Abe nako nia Jou niwiporetika la nimaketehimoloka de o nyawa gea, abe ka yowangohi de yogogerohi nia hidogoronaka, de ahao Ma Jou ai duduhunu nginika wohikuranga.

¹³ Abe ka de ngini nimale nia rokata eko nia fekata o nyawaino abe ko o Isiraele ma nyawaua de Ma Jou o Yawe ahao ona gea ko wahihupuokaua nia tonakino naa. Masara ona wanoaika manga ngioka ti ngini nia hidogoronaka de ika-ika de ona yodadi o modoi nginika abe ahao inihidiliko ho initaokoka ngini o Isiraele ma nyawa. Angamoi ona ahao yodadi imaketero hoka o hakara ma odiri nia gumurukika nako nimaketehimoloka de ona. Eko hohiketero de hoka o hihika abe yatofoko nia lakoko angamoi ma bodito ma kangela irupa-rupa gea inidaene ka hiadono ngini inihiofioka o tonaka ma rorahaiino naa abe Ma Jou o Yawe, ti ngini nia Jou, winihidoakoka.”

¹⁴ “Ngohi o Yosua naa ma dekana tinihihira-hira masara ko itedekanokaua de ngohi tohonenge, abe hokogea inadaene ngone mata-mataika o dunia ma lokuoka. Masara naga ma gou-goungu abe duru ibitumoka ti ngini nia hiningaka homoi-homoiika abe duru nihiorikoka Ma Jou o Yawe ai behehongo mata-mata idadioka abe Una winihibehehongoka. Ko moiua ai behehongo la ko idadiua!

¹⁵ Abe mata-mata Ma Jou o Yawe wohibehehongoka wato wodiai, gea kiani wodiai ho hiadono ma owa abe winihibehehongoka, ena gea kohangoe niamakeoka! Masara ma kangela, abe enangoo winihibehehongoka nako ko niwihingounua, enangoo ahao kiani niamake. De nako hokogea ngini ka ihikaika ko niwihingounua de ahao Una kiani winihiofioka o tonaka ma rorahaiino naa abe winihidoakoka.”

¹⁶ “Ho ufa ngini niawohanga Ma Jou o Yawe ai pareta ma behehongo abe winihitagongoka. Ena gea kiani nihingounu angamoi nako ahao idadi ai pareta gea niatilakuru hiadono nimahuba o jou-jou utuika, de ka hiadono nioleleani to ena ma pangaoika de hiadono nimaponuku enangika, gea ahao Ma Jou ai ngamo duru ifae nginika. De nako Ma Jou o Yawe ai ngamo itagi nginika hiadono winihohowono de gea duru itaiti de ngini winihiofioka nia tonaka duru ma rorahaiino naa abe winihidoakoka.” Hokogea o Yosua ai higaro de ai hitiari ma demo ai gogianongoruika.