Yosua 2 - Ma Jou ai Demo-demo o Totobelohoka

O ngo Rahaba maduhunu ona yatailako o Kanani ma tonakika

¹ Ho naa o Isiraele ma nyawa ko yomahihorauahi o Yorodani ma akere ma honongaika ho ona nagahi o Sitimi ma dolakahi. De ahao yosobo de o Yosua wairiki o nauru yahinooto de wahidingoto o Kanani ma tonakika abe o Yorodani doka ma honongaika. De wahibehehongo onangika wato, “De naa ngone mata-mata ko hotobonguahi doka ma honongaika de ngini tinihidingoto la nihira niatailako ma nyawa abe gea doka ka hadugamika abe yogogere ma tonakoka gea. De utuohi kiani ona hahioriki abe to ona manga bobuturungu abe yogogere o Yeriko ma kotaka.” Ka de hokogea o Yosua wahuloko de ona yahinooto yosobo yatailako o Yeriko ma kotaika hiadono yomatohiki yowohama manga kota ma goronaika. De ona yowohama de ihiaka ato imidulu o ngofekaika abe muna ami biaha momafuku-fukunu ami badanga. Ho ona imimake momatengo ami romanga o ngo Rahaba de yomahidodogumu to muna ami tauoka.

² Masara naga o Yeriko ma nyawa abe yamake yahinooto gea de yoiki manga koanoika de iwihingahu unangika ato, “Marai o futu naa naga o Isiraele ma nyawa to ngone nanga kota ma goronaka yowohaminoka! Marai nanga tonaka yatailako la ka idadi inahioriki nanga buturungu.”

³ Ka de hokogea woihene de manga koano ai nyawa wahidingoto o ngo Rahabika de ai huhuloko ma demo munangika. Ho ona imitutumu de imihingahu, ato, “Ngonaika nanga koano wonihuloko la o nau-nauru abe naga ani tauoka kiani nahihupu ngomino naa. Ona gea o Isiraele ma nyawa abe yoboa inatailako la inahioriki hokokia manga ngekomo la inangohama de inaparangi! Ho ngona kiani ona gea nahihupu ngomino!” Hokogea imihuloko o ngo Rahabika.

⁴ Masara ngaro o ngo Rahaba madafongoka o nauru yahinooto gea, ma muna magogono la ufa o nyawa yamake. Ho naa mahipongono o koano ai nyawaika mato, “Igoungu, kangano naga o nau-nauru gea yoboa ngohino masara ona gea ko tahiorikua o nyawa onagona.

⁵ De ahao naa ona yohupu! Abe ka de o wange ihumuririhuku de ona ato kiani yohupu o kotaino done ato o kota ma ngorana ma dadatoko akusioka. De ngohi ko tahiorikua de o kiaika ona yakaika masara ahao naa yopahaika ho nako ngini nimataiti niahiduru marai ka niadaenohi.”

⁶ Hokogea mahipongono angamoi muna kanganoino de mahuloko yahinooto gea la iminiiki daku ami tau ma poretiye abe itiaiika de genangoka matobawoere ami rami ma roehe abe manga datomo o rami genangino momatobadiai ami lawe. De ma oraha gea dakenangoka naga ami rami ma roehe de ma jagaka mohidotoino de genangoka matouniye ho dau ami rami ma timiuku genangoka mahingohamika o nauru yahinooto gea.

⁷ De o Yeriko ma koano ai nyawa ko yamakeua yahinooto gea angamoi yomataiti o Yeriko ma kotaino yohupu la ato yahiduru o ngekomika abe ma dumutu o Yorodani ma akere ma dodobongika. De ka de yohupuoka de o kota ma ngorana yatatokoka.

⁸ De yahinooto o Isiraele ma nauru gea ko yomaiduahi de o ngo Rahaba modoa ami wowoere ma ngiiye daku ami tau ma poretoka la ona yahinooto matutumu.

⁹ De muna mahingahu onangika mato, “Ngohi naa duru tohioriki abe Ma Jou o Yawe, o tonaka naa Una winihidoakoka nginika. De gea ma titi hiadono ngomi o kotaka naa imidiodaka o hawana ma amoko ngomino. De igoungu o tonaka naa ma amokika ma nyawa manga domoroini ihagaka ma titi ngini o Isiraele ma nyawa niboa nenangino.

¹⁰ Ngomi miihenoka ti ngini nia dodagi ma ade-ade abe hokokia Ma Jou o Yawe winiduhunu ma oraha o Mesiiri ma tonaka nianoa gea mihiorikoka. Abe miihenoka hokokia o Bongo-bongo ma gahi wohidudungu la ka idadi nimahihora doka ma honongaika. De miihenoo ti ngini nia buturungu abe ma oraha ngini niaparangi o Amori ma nyawa manga koano yahinootoika o Sihono de o Ogo hiadono niahibinaahaka ona de manga kokawaaha mata-mataika ka hiadono ko moiokaua!

¹¹ De nia ade-ade gea ka de ngomi mata-mataino miihene de mia hawana imihifafara ka hiadono mia domoroinoo ma, ko iwaka. De gea ngohi tohioriki idadi mangale ti ngini nia Jou gea Una Ma Jou abe wohipareta o Horogaka daku o dunia ma dihangoka de hiadono dau o duniaukuoo ma, Una wohipareta mata-mataika.

^12-13 Ho naa ngohi duru tomagahoko nginika la nihihibehehongo ngohino de nia koboto ma demo la ufa nihieluku ngohino. Abe kiani nimagahoko Ma Jou o Yaweika la ngini niamake o hohowono Unangino nako ngini nihieluku ngohino. Hokogea ngohi tomigahoko ngohi de ahi tau ka ma moi la nimiduhunu. De abeika ngohi ahi dora ma hiokoo itagi nginika hiadono tiniduhunu la ufa inibodito ho hiadono itiai nginioo de nia dora ma hiokoo nimiduhunu ngohi de ahi baba de ngohi meme de ahi ria-dodoto de to ona manga ngofa-ngofaka. Iti ka to ngohi ahi dutu de ngini nimiduhunu la ma oraha ngini o Isiraele ma nyawa niboa de ufa hiadono ngomioo nimitoma! Ho ngohi duru tomagahoko la nihihibehehongo de o behehongo ma gou-goungu ma dodunguu.” Hokogea o ngo Rahaba momagahoko o nauru yahinootoika gea.

¹⁴ De ahao ona imipaluhu munangika, ato, “De gea igoungu to ngona ani wowango nomahidoaka la ngomi ufa mibodito. Ho ngomioo naa mia wowango misanangi dika mimahidoaka la ngona de ani tau mata-mata miniduhunu.” Hokogea imihibehehongo o ngo Rahabika ma, de ahao imihitiarioo abe ato, “Ma iti ufa ngona nomihingahu ani nyawaika de hiadono noade-ade o nyawa onagonaika dika abe ma titi miboa ngonaino naa. Kiani ngona nomarii-riidoka dika hokogea la ngomi de mia dora ma hiokoo miniduhunu ka hiadono ngomi miboali de midiai duru imaketero de abe ngona nomihibehehongoka. Ho ka de Ma Jou o Yawe o tonaka naa womihidoaka ngomino de nginioo ka niwangohi.” Hokogea imihibehehongo o ngo Rahabika.

¹⁵ Ho o ngo Rahaba moigo yahinooto maduhunu gea hiadono mato ahao mahidihiara ami jendelaino la youti doka o kota ma poretuku. De gea ka idadi angamoi to muna ami tau ihidatahumika de o kota ma dadaduhu abe yakurungaka o Yeriko ma kota. Ho ami tau naga ma jendela ma eteteke abe ihapongo doka o kota ma poretika ho ka idadi yapake de o tali la youti dau o tonakuku.

¹⁶ De ko youtiuahi de muna madotokoka abe hokokia yomagogono la ufa yamake o Yeriko ma nyawa gea abe ona ka yalingi-lingirohi. Ho muna mahingahu mato, “Ngini kiani nimahidodiai niloara o loku-lokuika la ka idadi nimagogonohi genangoka o wange hangeino ma dekana. Hokogea kiani nimagogono la hiadono ona ko inilingirokaua ho hiadono ona yolioka ma kotaino naa. Ho o wange hange ipaha de ahao ngini ka idadi nigila-gila nilio nia dodiawoika.” Hokogea o ngo Rahaba mahitiari ona yahinootoika.

¹⁷ De ona ato imihingounu ami hitiari masara ko youtiuahi ami jendelauku de naga to onangoo manga behehongo munangika, ato, “Ngonaoo kiani nomahidodiai naniiki mia demo naa,

¹⁸ abe to ngomi mia duduhunu ma behehongo ngonaika ka idadi, iti ngonaoo nomahitunguu de o bulu ma doka-dokara naa abe minihidoakika. Ho ma oraha ngomi o Isiraele ma nyawa miboa o tonakino naa, de ahao ma bulu ma doka-dokara naa kiani ngona nohilikoika la idideuku ani jendelaino naa. Nako hokogenangua nodiai ani dodunguu de ahao to ngomi mia behehongo ko ilakua ngonaika. De nako ani baba de ngoni meme, de ani ira-iranga de ona utu ani tauoka ko nahingohamua ani tauino naa de gea mia duduhunu ko yadaenua onangika.

¹⁹ Ho nako naga onagona dika ani tauino yohupu ma hoanika, de hiadono yobodito hiadono manga awunu iuihi, gea ko to ngomiua mia tagongo. Masara ona mata-mataika abe naga to ngona ani tau ma goronaka naa yodadioka to ngomi mia tagongo ma oraha ngini o Yeriko ma nyawa minihikala. Ho nako naga ona ani tau ma goronaka abe ahao ona yobodito hiadono manga awunu iuihi gea to ngomi mia tagongo.

²⁰ Masara ma moioli naa minihitiari ufa ngona nawohanga abe nako ngona naade-ade onagonaika dika abe naa ngona de ngomi homahiketehibehehongoka hodiai la homakuduhunu done ma bahauku de ngini nibodito. De gea angamoi ka de ngona noade-ade de gea mia koboto ma behehongo ngonaika ko ilakuokaua abe ngona nomiribuutu hiadono ngomi mikoboto.” Hokogea o nauru yahinooto gea imihitiari o ngo Rahabika.

²¹ De o ngo Rahaba mosanangi manga demoika gea ho mato, “Itiai nia demo, ho ngohi tosanangi dika taniiki nia demo mata-mata.” Ka de hokogea yomakoketemo ibooto de muna mahiguti de yapake ma tali gea la ka idadi ona yahinooto gea yosobo. De gea ipaha de muna mohiliko ma bulu ma doka-dokara ami jendelaika la ami dodunguu gea idideuku doka ma poretuku imaketero hoka ona imihibehehongoka.

²² De ona yahinooto gea yoikoka yomagogono o loku-lokuika de genangoka yomagogono hiadono o wange hangeino manga dekana. De o wange hange ipaha de o Yeriko ma nyawa abe yalingi-lingiri yokokilioka manga kota ma goronaika abe o ngekomo arihononga yalingiri ibooto de ko yamakeua ho yokokilio.

²³ De ahao yohupu yahinooto gea o loku-lokuino de yogila-gila dika hiadono o Yorodani ma dodobongika de yotobongo yomahihora doka ma honongaika de ka yogila-gila o Yosuaika la iwiade-ade unangika abe mata-mata gea idadioka onangika.

²⁴ Abe iwihingahu o Yosuaika ato, “Mia baluhu, duru igoungu, Ma Jou o Yawe wonahidoakoka ma tonaka mata-mataika gea! Hoka ma tonaka gea idadioka to ngone nanga kuahaka igogere angamoi o nyawa mata-mata gea doka ona inamodongoka ngoneino naa ka hiadono yatomomonoka. Hokogea mia baluhu ngomi miamake abe mia dodagi ma goronaka.” Hokogea o nauru yahinooto gea iwihingahu o Yosuaika.