Yosua 11 - Ma Jou ai Demo-demo o Totobelohoka

O Pasala 11 ko atailakouahi (sawali 11:23) O Yosua de ai tentara yahibinaaha o tentara abe daukuku

¹ De ipahaino de o abari abe ma titi o Isiraele manga lolaku imahiadono o nyawa abe yogogere daukuku. De genangoka naga o kota moi ma romanga o Hasoro, de to ona manga koano o Yabini. Ho ma oraha ma koano gea yoihene ma abari de wohidingoto o behehongo ma hurata ai dodiawo yamuruonika abe onangoo homoi-homoi yahikoano manga kokawaaha. Abe gea wohidingoto o Madono ma kota manga koanoika ai romanga o Yobaba, de o Simirono ma kota de o Aksafa ma kota manga kokoanoika.

² De nagali wohidingoto ai hurata o kokoanoika abe yahikoano o loku-lokuoka daukuku, de o kokoanoika abe yahikoano o Yorodani ma dolaka daku o Galilea ma tonaka ma honongaka, de o kokoanoika abe yahikoano o Galilea ma loku-lokuoka. De o kokoano abe yahikoano manga kokawaaha o Gogoronaka ma gahi ma ngigorino abe itigi-tigino de o Doro ma kota, onangikaoo wohidingoto ai hurata.

³ De nagali o Kanani ma nyawa manga kokoano, abe ngaro yahikoano ma tonakoka daioko de ngaro dinaiha, masara onangikaoo o Yabini wohidingoto ai hurata. De nagali ma kokoano abe yahikoano o Amori ma nyawa de o Hete ma nyawa de o Ferisi ma nyawa de o Yebusi ma nyawa o loku-lokuoka, de o Hewi ma nyawa abe o Heremono ma loku ma gogeleforino o Misapa ma tonakoka yogogere. Ho ma koano gea mata-mataika o Yabini wohidingoto ai behehongo ma hurata la wato ona yoboa de yomakokitoomuino unangoka.

⁴ De ma kokoano gea yamake ai behehongo ma hurata ipaha de ona mata-mata yahokino manga tentara. De ahao ona yosobo manga ngi homoi-homoioka de yotagi-tagi la mata-mata yomakokitoomuino. De yomatoomuino o ngi moioka de o tentara ma nyawa gea duru ko manga ngoe! De nagali manga kuda de manga goroba parangi duru kohangoe. Ho nako halega-lega onangika de duru ko idadiokaua hamake ma tonaka manga lou ma timiuku angamoi ma tonaka yakokilufungoka. De ona manga ngoe yomaketero hoka o dowongi ma mui ma ngoe o gahi ma ngigorino.

⁵ De hokogea o kokoano de manga tentara yomakodogoino o Meromo ma akeroka la ka idadi yaparangi ka ma moi o Isiraele ma nyawaika.

⁶ De ahao Ma Jou o Yawe witemo o Yosuaika wato, “Ufa ngona namodongo onangika gea, angamoi itebini adonoka o wange hokonaa de Ngohi tahidoakoka o Isiraele ma tentara manga giamika ho ona yomaketero hoka yohonengoka. De ma oraha gea kiani ngini niahitalo manga kuda mata-mataika, de abe manga goroba parangi gea kiani ngini nikokitufuku hiadono duru youkuoka.”

⁷ De o Yosua woihene Ma Jou ai higaro ma demo gea ipaha de ahao una de ai tentara mata-mata yotagi-tagi o Meromo ma akerika de duru yatodokana manga musuika. Ho genangoka ka itodokanino de yabaata ona yowoe-woeika.

⁸ De gea Ma Jou o Yawe wahidoaka manga musu o Isiraele ma nyawa manga giamika, ho ona gea yoara dika masara ka yanii-niiki de yahohonenge onangika. Abe yanii-niiki o wange ma hiwarika ka hiadono o Misirefoto-maimi, de o Sidono ma Amokika de o Misipa ma dolaika. De ma bahauku de manga musu duru ko moiokaua abe ka yowangohi, ona mata-mata yokokihonengoka.

⁹ De ahao o Yosua de ai nyawa yahitalo manga musu manga kuda mata-mataika, de abe manga goroba parangi gea yakokitufukoka. De manga datoro gea mata-mata duru imakiniiki de Ma Jou ai huhuloko ma demo onangika.

¹⁰ De gea ipaha de ahao ona yogilio manga poretino o Hasoro ma kotaino de yabaata onangika. Ho ma kota gea yataoko de manga koano iwihohonenge de o humaranga. De abe o Hasoro ma kota gea, ka enangohi de ma kuahaka nako de o kota de o koano utuoli ma tonakoka gea.

¹¹ Ho yataoko ipaha de ahao yahohonenge to ena ma nyawa mata-mataika hiadono duru ko yaiwaka, de ma kota gea yatufuku.

¹² De ahao o Yosua de ai tentara yogila-gila ma kota utuika gea de abe ma ngi homoi-homoioka de yahohonenge manga koano de manga kokawaaha mata-mataika. Hokogea yahibinaaha onangika la duru imakiniiki de ma huhuloko ma demo abe ma dihiraino de o Musa wodofanga onangika. Abe o Musa una gea Ma Jou o Yawe ai huhuloko.

¹³ De nako ma kota-kota gea, homoi-homoi ihigoko o dounu moioka abe hoka manga biaha. De o Yosua de ai nyawa ko yotufukua ma kota-kota gea masara ka yanoaika dika.

¹⁴ De nako ma kota-kota gea ma kiahonanga de ma aewani ma duduono, gea mata-mata o Isiraele ma nyawa yomahitoona. Masara abe ma titi ma nyawa gea duru yamataka.

¹⁵ Angamoi ma dihiraino de Ma Jou o Yawe wihuloko la hokogea yodiai o Musaika de o Musa unangoli wadofanga ma huhuloko ma demo gea o Yosuaika. Ho o Yosua duru wohidodiai waniiki itiai ma huhuloko ma demo mata-mata gea abe wamake o Musaino de Ma Jouino.

¹⁶ Ho hokogea o Yosua de ai tentara yahikala ma tonaka gea mata-mataika. Abe ngaro ma loku-lokuoka de abe o loku-loku ma timiuku, de ngaro ma tonaka daukuku de abe dakuiye, de abe o Gosene ma kapongoka de ma tonaka ma kakaaha abe daku o Gosene ma honongaiye, de ngaro o Yorodani ma akere ma dola, masara gea mata-mata ona duru yahikala.

¹⁷ Ho yahikala ipaha de ahao o Isiraele ma nyawa manga tonaka duru ihiwoatika de ihikurutika. Abe nako daku ma honongaiye manga tonaka ma batingi naga o Borongko ma loku-lokuoka abe itigi-tigino de o Edomo ma tonaka. De nako dau ma honongauku manga tonaka ma batingi naga o Baala-Gada ma kapongoka abe imanoa o Heremono ma loku ma timiuku de o Libanono ma dolaka. Abe ma tonaka gea mata-mata manga kokoano o Yosua wataokino de wahohonenge onangika.

¹⁸ Masara abe ma oraha ona yomaketeparangi de ma kokoano, gea ko itaitua wahikala masara duru ma dekana waparangi onangika hiadono ka idadi wahikala ona mata-mataika.

¹⁹ De ma oraha gea ko iwa ma nyawa abe yomakadame de o Isiraele ma nyawa sawali o Hewi ma nyawa abe o Gibeono ma kotaka yogogere. Ho ma nyawa utu mata-mata o Isiraele ma nyawa kiani yahikala onangika.

²⁰ De ona gea Ma Jou o Yawe wahitogowini manga hininga la yoigo yomaketeparangi de o Isiraele ma nyawaika. Ho ma bahauku de ona duru yahibinaaha onangika, abe o Isiraele ma nyawa ko yapakeua manga hininga ma hiokoo onangika, angamoi hokogea ma dihiraino Ma Jou wihuloko o Musaika wato kiani yodiai onangika.

²¹ De hokogea idadi abe ma oraha o Yosua de ai tentara yabaata de duru yahibinaaha o Anaka ma nyawa de manga totoforauku abe ma dihiraino yogogere o loku-lokuoka. Abe ngaro o Anaka ma nyawa abe yogogere o Heboronoka de o Debiroka de o Anaboka, de ngaro ona abe yogogere o Yehuda de o Isiraele ma loku-loku mata-mataika, masara o Yosua de ai tentara yakokihohonenge onangika. De manga kota-kotaoo duru ihibinaahaka.

²² Ho nako o Isiraele ma tonaka ma amokika de ngade-ngade ko yaiwaka o Anaka ma nyawa. Abe nagahi yamuruonokahi dika yogogerohi o Gasa de o Gaata de o Asodo ma kota-kotaka. Masara ona utu yokokihonengoka.

O Kanani ma tonaka idadioka o Isiraele ma nyawa manga tonaka

²³ De o Yosua de o Isiraele ma nyawa ka ihikaika yomaketeparangi de o nyawa mata-mataika abe yogogere o Kanani ma tonakoka ka hiadono mata-mataika yahikalaka. Angamoi hokogea nengokadauinohi Ma Jou o Yawe wihibehehongo o Musaika wato kiani ona o Isiraele ma nyawali yomahituruuru yogogere o Kanani ma tonakoka. Ho yomahitoonangoo ma tonaka gea de ahao o Yosua wahikodoku la manga dutu yangimoi de yahinootoino homoi-homoiika yamake manga oara ma tonaka genangoka. Hokogea o Yosua o tonaka wahikodoku la gea o Isiraele ma nyawa manga dano-danonguku ka ihikaika idadi to ona manga oara. Ho gea o Isiraele ma nyawa yoriidoka manga tonakoka gea angamoi yoparangi yomahiainoka.