Yosua 10 - Ma Jou ai Demo-demo o Totobelohoka

O Pasala 10 ko atailakouahi O Isiraele ma nyawa yahikala o dutu manga ngoe

¹ De ipahaino de o Yerusaleeme manga koano o Adonisedeke una woihenino ma titi hokokia o Yosua wahikalaka de wahibinaaha o Ai ma kota de abe wihohonenge manga koano. Abe gea idadi duru imaketero abe hokokia wadiaioka o Yeriko ma kotaikali de to onangoo manga koanoika. De ma koano gea woihenoo ma titi o Gibeono ma nyawa yomakadameoka de o Isiraele ma nyawa de abe yomahiketehibehehongoka ho naa kiani yomakuduhunu nako naga abe yaparangi onangika.

² De ma abari gea ma koano de ai kokawaaha yoihene ipaha de gea hiadono duru yokokihawanoka. Angamoi nako o Gibeono ma kota gea duru ko ietekua. Abe gea ma amoko ka imakadaene dika de o kota-kota utu ma ago-agomo abe naga de manga koano homoi-homoi. De ngaro ihidotelega de o Ai ma kota masara ka o Gibeonohi ilamoko. De hongoli o Gibeono ma nau-nauru ona duru yojago de yososawaro yoparangi.

³ Ho o Yerusaleeme manga koano gea wohidingoto o hurata moi o koano iatika la wato ona yamotoa mata-mata yomakokuduhunu. Abe ai hurata gea wohidingoto o Hohamika abe una wahikoano o Heborono ma kapongoka, de o Pireamika abe una wahikoano o Yaramutu ma kapongoka, de o Yafiaika abe o Lakisi ma kapongo manga koano, de o Debirikali abe una wodadi o Egono ma kapongo manga koano.

⁴ De o Yerusaleeme manga koano ai gogahoko o kokoano utuika gea itemo ato, “Ngohi o Adonisedeke tomagahoko la ngini mata-mata niboa de nimatoomuino ngohioka la ngone homakuduhunu haparangi o Gibeono ma nyawaika. Angamoi ona yomakadameoka de yomahiketehibehehongo de o Yosua de abe ai nyawa o Isirale ma nyawaika.”

⁵ De o koano yamotoa gea, ngaro manga kapongo homoi-homoi naga de ma romangoka, masara ona mata-mata yafetongo o Amori ma nyawa. Ho ona mata-mata yosanangi ai gogahoko ma demoika ho ipahaino de manga tentara ma nyawa mata-mata yomakokitoomuinohi de ahao yosobo yotagi-tagi abe manga dumutu o Gibeono ma nyawaika. Ho ona ko manga ngoe yomahitigi o Gibeonika la ka idadi yabaata onangika.

⁶ Ho ka de o Gibeono ma nyawa yamake abe naga ma tentara ma nyawa ko manga ngoe yoboaino de manga gogahoko ma demo iwihidingoto o Yosuaika abe naga o Gigaloka. De manga demo ma goronaka yotemo ato, “Duru mimagahoko o duduhunu! Ho ufa hiadono ngini niminoaika, ngomi naa abe midadioka ti ngini nia gogilaongo! Angamoi naga o Amori ma nyawa manga kokoano de manga tentara yoboainoka o loku-lokuoka de yaino, de yomakokuduhunu la imibaata ngomino! Ho kiani nimataiti niboaino la nimiduhunu ngomi naa!”

⁷ Ho o Yosua de ai nyawa abe duru yotomoroini yoparangi, de ai tentara mata-mata yosoboka o Gigaloka la yaduhunu o Gibeono ma nyawaika.

⁸ De gea Ma Jou o Yawe wihingahu o Yosuaika wato, “Ufa ngona namodongo o Amori ma nyawaika gea, angamoi Ngohi naa ahao tahidoaka dika to ngona ani giama ma hoatika. Abe ko moiua onangino ka idadi inilawana ngonaika hiadono inihikala.”

⁹ Ho o Yosua de ai tentara o Gigaloka de yosobo de yomataiti yotagi-tagi duru o futu moi gea ma gahumu. De yomahiadono o Amori ma nyawa manga tentaraika de ka yabaata onangika. De gea duru yatodokana o Amori ma nyawaika angamoi manga hiapoto yomahiadono.

¹⁰ De Ma Jou o Yawe wahikapusaka manga musu gea, ho o Isiraele ma nyawa yahohonenge ko manga ngoe o Gibeonoka. De ahao ona abe ka yowangohi yoara de yaniiki ma ngekomo abe ma dumutu o Betehoronika, masara o Isiraele ma nyawa yanii-niiki onangika de utuohi yowoe yahohonenge o ngekomoka gea. Abe yanii-niiki ka hiadono o Aseka de o Makeda ma ngi-ngiika.

¹¹ De abe ma oraha ona yoara manga gogiriaka o Betehoronoka de yauku ka hiadono o Asekauku, Ma Jou o Yawe wadopuraraha de o es ma awana duru ikiria ma dihangoka de auku onanguku. Ho nako hahidotelega manga ngoe abe o Isiraele ma nyawa yahohonenge de manga humaranga de manga ngoe abe yohonenge ma titi o es ma awana, masara ka onangohi yowoe abe o es ma awana yahohonenge onangika.

¹² De ma wange gea abe Ma Jou o Yawe wohiaturu la o Isiraele ma nyawa ka idadi yahikala o Amori ma nyawaika, naga o Yosua ai niniata ma demo Ma Jouika abe womaniata duru o Isiraele ma nyawa mata-mata manga hima-himangoka. Abe o Yosua womaniata wato, “Ngohi tomagahoko la o wange ko itagiokauahi masara ka imahiaini dika o Gibeono manga kapongo ma loku ma daaniye! De la o mede enangoo ka imahiainohi dika o Ayalono ma dola ma daaniye ho ko itagiokauahi ma dumutika!” Hokogea o Yosua ai gogahoko ma demo.

¹³ De idadi duru imaketero de ai demo gea, abe ma wange de ma mede duru ko igila-gilakauahi ka hiadono o Isiraele ma nyawa yahikalaka manga musu. Yahikala ipaha de ahao ka idadi ena gea itagiokali abe hoka ma biaha ka ihikaika itagi. De ma datoro gea ihitulihuku o buku moioka abe ma romanga o Yasara ma Buku. Abe o wange moi ma gahumu gea de ma wange duru ko itagiokauahi masara ka imanoahi duru o dihanga ma gogoronaka, ho duru ma dekana abe gea ko itumunuahi.

¹⁴ De ngaro duru ma dodihiraka hiadono ma wange gea masara ko idadiuahi hokogea ma heheranga. De ngaro ma wange gea ipaha ka hiadono ma oraha naa naga abe tohitulihuku ma ade-ade masara ko idadiokauahi ma heheranga hokogea. Abe ma wange gea de Ma Jou o Yawe wohimoteke de o Yosua ai gogahoko ma demo o fara moi gea, de Una duru waduhunu ai nyawa o Isiraele ma nyawaika ma oraha waparangi to ona manga musuika!

¹⁵ De hokogea ipahaino de ahao o Yosua de o Isiraele ma nyawa gea mata-mata yokokilio manga doomu ma ngiika abe o Gigaloka.

¹⁶ Masara abe ma oraha yomaketeparangiohi gea de o Amori manga koano yamotoa ona ka yoara dika de yomagogono o aruku ma goronaika moi abe o Makeda ma kapongoka.

¹⁷ De ipahaino de naga o nyawa abe iwihingahu o Yosuaika ato, “Ngomi miamakeoka o koano yamotoa gea, angamoi yomagogono o aruku ma goronaka o Makeda ma kapongoka.”

¹⁸ Ho o Yosua wopaluhu de wahuloko wato, “Nialulu o hakaru ma ago-agomo la duru atatoko o aruku ma biono. De niahiaturu la naga o gogoana ma nyawa ka ihikaika genangoka yagoa-goana la ufa yoaroli.

¹⁹ De abe naga nia musu utuoli, gea ngini kiani niahidoduruika hiadono niamake de niataoko! De ufa hiadono ona ka idadi yoara de yomahiadono manga kota-kota ho yomahitatoko gea ma goronaka, angamoi Ma Jou o Yawe winihidoakoka nia lolaku, ho kiani niahikala onangika!”

²⁰ Ho o Yosua de o Isiraele manga tentara ka yogila-gila dika yomaketeparangi manga musuika gea ka hiadono duru yahikalaka. Abe duru yahibinaaha o koano yamotoa gea manga tentara, de manga hou ka yamuruono dika abe ka idadi yomahiadono manga kota de yomahitatoko gea ma goronaka.

²¹ Ho yaparangi ibooto de ahao o Isiraele ma nyawa iwigilioino o Yosuaino abe manga doomu ma ngioka o Makeda ma kapongoka. De ma parangi gea ipaha de duru ko moiokaua o nyawa abe yamoroini yatemo de yalawana o Isiraele ma nyawaika.

²² De ahao o Yosua wotemo ai nyawaika wato, “Abeika nialuluika o hakaru ma ago-agomo gea o aruku ma bionoka de aika. La ma koano yamotoa gea niaoino ahi himangino.”

²³ Ho o aruku ma goronaka de yaino yao o koano yamotoa gea, abe ona yahikoano manga kapongo o Yerusaleeme de o Heborono de o Yaramutu de o Lakisi de o Egono.

²⁴ De yaoino de o Yosua wahuloko ai tentara ma hohidimono yamuruono naga wato, “Ngini niboaino de niadoko o kokoano naa manga tomara homoi-homoiuku.” Ho ona yoboa de yodiai duru imaketero hoka ai huhuloko ma demo gea.

²⁵ De ahao o Yosua wahigaro onangika wato, “Ufa ngini nihawana de ufa nia hininga ieteke. Masara ngini kiani nimaputuhu abe ngini de nia buturungoka de nia domoroinoka, angamoi Ma Jou o Yawe ahao wodiai nia musu mata-mataika imaketero hoka wodiaioka onangika naa nia timiuku.”

²⁶ De hokogea wotemo ibooto de o Yosua wahuloko ai nyawa la yahohonenge ma koano gea de yadideuku manga honenge o gota motoa amomoiuku. De yanoaika ma gota-gotaka gea ka hiadono o wange ihohomuku.

²⁷ De ipahaino abe ma oraha ma wange itumunu de o Yosua wahulokoli ai nyawa la ma koano manga honenge yahigutiuku ma gota-gotaka de yauku. Ho yahigutiuku de ahao yaumo o aruku ma goronaika abe ma dihiraino de ona yamotoa yomagogono genangoka. Yaumo ipaha de ahao yatoomuino o hakaru ma ago-agomo de ihitou-touniye o aruku ma bionoka la duru atatokoka de ma hakaru. De ma hakaru ma dounu gea nagahi ka hiadono ma oraha naa naga abe tohitulihuku ma ade-ade.

O Yosua de ai tentara yahibinaaha o kapongo utuoli

²⁸ De ma wange gea o Yosua de ai tentara ona duru yahikala o Makeda ma kapongo ma nyawaika. Abe ona yahohonenge manga koano de manga kokawaaha mata-mataika, ho moioo de ko iwaka manga nyawa. De o Yosua wodiai manga koanoika abe imaketero dika hoka ma dihiraino wodiaioka o Yeriko ma nyawa manga koanoika.

²⁹ De o Makeda ma kapongo yahibinaahaka de ahao ona yogila-gila o Libana ma kapongika de yabaata onangikali.

³⁰ De genangokaoo Ma Jou o Yawe wahidoaka ma kapongo de manga koano o Isiraele ma nyawa manga giamika. Ho ona yahohonenge o Libana ma nyawa mata-mataika de ko iwaka manga hou. De o Yosua wihohonenge to ona manga koano abe imaketero hoka ma dihiraino wodiaioka o Yeriko ma nyawa manga koanoika.

³¹ De o Libana yahibinaaha ipahaino de ahao yogila-gila o Lakisi ma kapongika de yabaata onangikali.

³² De Ma Jou o Yawe wahidoaka o Lakisi ma nyawaoo o Isiraele ma nyawa manga giamika, ho manga wange hinootoino dika de yahikalaka. De imaketero abe hoka ma dihiraino o Libana ma kapongoka, ona yahohonenge o nyawa mata-mata genangoka.

³³ De ma oraha gea o Gesere manga koano o Horama, una de ai tentara yoboaino la ato yaduhunu o Lakisi ma nyawaika. Masara o Yosua de ai nyawa yahohonenge onangoo mata-mata, ho duru ko yaiwaka.

³⁴ De o Lakisi yahibinaaha ipahaino de ahao yogila-gila o Egono ma kapongika de yabaata onangikali.

³⁵ De manga wange moiino dika genangoka de ka idadi yahikala, ho yahohonenge onangoo mata-mataika. Abe manga hibinaaha gea imaketero dika hoka o Lakisokali.

³⁶ De ahao o Yosua de ai tentara o Egonoka de yogila-gilali abe manga dumutu o Heboronika la yabaata onangikali.

³⁷ De ipahaino yataoko o Heborono ma kapongo gea de yahohonenge ona mata-mataika, abe ngaro manga koano de ngaro manga kokawaaha masara ona mata-mata yokokihonengoka. De ngaro ma kapongo utu mata-mata abe ma digi-digino masara onangoo mata-mata duru yahikokihibinaaha onangika. Abe imaketero dika hoka ma dihiraino idadi o Egonoka, hokogenangoo ma hibinaaha hiadono duru ko yaiwaka ma nyawa genangoka.

³⁸ De ipahaino de ona yogilio la manga dumutu o Debirika. De yomahiadono genangika de yabaata onangikali.

³⁹ De genangokaoo yahikala ma kapongo gea de manga koano de ma kapo-kapongo utu abe naga ma digi-digino. De yahikala ipahaino de duru yahibinaaha ona mata-mataika hiadono ko iwaka ma nyawa genangoka. Abe ma hibinaaha imaketero hoka ma dihiraino idadi o Heborono de o Libana ma kapo-kapongoka.

⁴⁰ De hokogea o Yosua de ai tentara yahikala de yahibinaaha ma tonaka mata-mata gea. Abe ngaro ma loku-lokuoka de ma gogeleforino, de ngaro ma tonaka ma dola-dola de ngaro o Negebe ma tonaka ma kakaaha, masara ma tonakoka mata-mata gea ona yahikalaka hiadono manga kokoano de manga kokawaaha mata-mata yahikokihibinaahaka, ho duru ko iwaka o nyawa genangoka. De hokogea manga hibinaaha angamoi o Yosua de ai tentara duru yaniiki itiai o Isiraele ma nyawa manga Jou o Yawe ai huhuloko ma demo onangika.

⁴¹ Ho ona duru yahibinaaha de yahikiditoko ona mata-mata abe ma dihiraino yogogere o Kadese-Baraneaka ka hiadono o Gasa ma kapongika, de onangoo abe o Gosene ma tonakoka ka hiadono o Gibeono ma kapongika.

⁴² Abe o Yosua de ai tentara ma nyawa yahikala ma kokoano de ma tonaka mata-mata gea abe manga dodagi moioka dika. De to ona manga hiakunu la ka idadi yahikala hokogea duru ihititi manga Jou o Yaweoka, angamoi Una duru waduhunu ai nyawaika ma oraha ona yaparangi o homoa ma nyawaika.

⁴³ De gea mata-mata ipahaino de ahao o Yosua de o Isiraele ma nyawa manga tentara mata-mata ona yokokilio manga doomu ma ngiika abe o Gigala ma ngioka.