Yohanese 9 - Ma Jou ai Demo-demo o Totobelohoka

Womatengo worafi de o Yesusu widuhunu la ka idadi womahioriki

¹ Ipahaino de ahao o Hiaini ma wange moioli de o Yesusu wotagi-tagi de wimake womatengo abe ka womahidoboainohi worafioka.

² De ona o Yesusu iwitobaniiki iwileha Unangika ato, “Mia Guru, naa moi minileha abe naa una ka womahidoboainohi de worafioka. Ho gea ma titi to una ai howono eko ai dimonoka to ona manga howono hiadono worafi hokogea?”

³ De o Yesusu wopaluhu onangika wato, “Masara ko ma titiua to una ai howono eko ai baluhu manga howono hiadono womaboa de worafioka. Hokonaa idadi unangika la ka idadi o nyawa yamake Ma Jou ai buturungu ai wowangoka.

⁴ Ma oraha adonoka abe ngone ka idadi hodiai to Una ai karajaanga abe wohihidingotino naa. Imaketero hoka o nyawa manga biaha yokarajaanga o wangeoka masara o futu-futu ko yokarajaangua, hokogenangoo de Ma Jou ai karajaanga. Abe nako ngoneoo hodamaa la Ma Jou ai karajaanga hato hokarajaanga nanga wowango ma bahaika, gea hokokapaanga.

⁵ De Ngohi naa o dunia ma dararono ho ma oraha Ngohi togogerohi o duniaka naa, o nyawa ka tahitararonohi manga wowangoka.”

⁶ Hokogea o Yesusu wotemo ibooto de ahao o tonakuku waobiruku o Yesusu, de ai kibiri wohikaruwaeino de ma tonaka gea. Hokogea wodiai hiadono idadi hoka o tonaka ma tau-taulu de ahao wohiehe worafi-rafi ai lako ma lokuino.

⁷ Gea o Yesusu wodiai ibooto de ahao wihuloko worafi-rafika gea wato, “Naa noiki o Siloama ma taagaika de nomamahau o akeruku gea.” Abe ma romanga o Siloama nako to ona manga demo gea ma titi o hidingoto. Hokogea o Yesusu wihuloko de o rafi-rafi gea wihingounu ho woiki o Siloama ma taagaika. Ka de womamahau de womahiorikoka ho wolio ai tauika.

⁸ Ho ona yogogere worafi-rafi ai tau ma datekoka de o nyawa utu abe ma dihirainohi iwimake womagaho-gahoko, ona genangoka yomakokeleha ato, “Naa una gea abe ma dihiraino worafi e? Abe ma ngoe himake wogogeruku la gea womagaho-gahoko ngoneino.”

⁹ De naga utu ato, “Iya, marai una gea.” Masara naga utu ato, “Ou, ko unangua! Marai yomakadaene dika manga himanga masara, ko unangua!” De ahao worafi-rafi, una ma hirete womahingahu wato, “Naa ngohi!”

¹⁰ De ahao ona iwihuloko ato, “Abeika, nomiade-ade abe hokokia idadi ani lako gea itiaioka ka hiadono ka idadi nomahioriki.”

¹¹ De una woade-ade onangika wato, “Kangano naga womatengo, ai romanga o Yesusu, gea Una wodiai. Abe o tonakino imakadaene hoka o hibauru wodiai, de gea wodiai ibooto de ahao wohiehe ahi lako ma lokuino. Gea ka de wohiehe ibooto de ahao wohihuloko wato, ‘Noiki o Siloama ma taagaika de nomamahau o akeruku gea.’ Ho gea toiki tomamahau hoka wohihulokoka de idadioka tomahioriki.” Hokogea dika woade-ade.

¹² Ho ona iwilehali ato, “Ho ma nauru gea o kiaka?” De wapaluholi wato, “Aiaho, bote Una naa o kiaka naga.”

¹³ De ahao ona yogahoko unangika abe ma dihira worafi-rafika ato, “Abeika, nominiiki o Farisi ma doomuino ma nyawaika.” Ho iwiao o Farisi ma nyawaika la ato iwihimatoko onangika la ka idadi ai lako yamake.

¹⁴ De naa mata-mata idadi o Hiaini ma wangeoka. Abe o Yesusu o tonaka ma tau-taulu wohidadi de genangino wapake la ka idadi womahioriki worafi-rafi, gea mata-mata idadi o Hiaini ma wangeoka.

¹⁵ Ho ka de o Farisi ma nyawa onangoo iwileha abe hokokia idadi unangika de onangikaoo wapaluhu wato, “Una gea wodiai abe ma rupa hoka o hibauru o tonakino, de gea wohiehe daku ahi lako ma lokuino ibooto de ahao wohihuloko la tomamahau. Ho tomamahau ibooto de ka itodokanino tomahioriki. Hokogea dika ai hiaturu ngohino.”

¹⁶ De o Farisi ma nyawa utu gea yotemo ato, “Masara nako hokogea wodiai o Hiaini ma wangeoka gea Una ko Ma Jouinoua angamoi to ngone nanga pareta watilakuroka.” Masara naga utu yotemo ato, “Ma, abeika ai dodunguu duru inahiheranga, nako Una o howo-howono ma nyawa ko idadiua wodiai hokogea.” Hokogea utu yotemo hiadono o Farisi ma nyawa gea duru yomaketeliliara.

¹⁷ Ho ona ma bahaika worafi-rafika iwileha unangika ato, “Ho, ngona gea, sarakia? Angamoi gea ma titi to ngona ani lako ho ani hininga Unangika sarakia?” De worafi-rafi gea wopaluhu wato, “Nako ngohi ahi hiningaka tanu Ma Jou wihiakunu ho ngohi tato Una gea Ma Jou ai uru ma dodofanga.”

¹⁸ Masara ngaro hokogea womahingahu ma, o Yahudioka manga balu-baluhu gea ko yongakua, ato bote ka ma dihirainohi de womahioriki. Ho hiadono ai baba de ngoi memeika yabehehongo ho naga o nyawa yangotaka onangika.

¹⁹ Ho ona ahao yaleha ai baluhika gea ato, “Sarakia, una naa ti ngini nia ngofaka, o nauru naa? De nako una gea nia ngofaka, igoungu una womahidoboainohi de worafioka? De nako hokogea adodoa ho naa ka idadi womahioriki?” Hokogea manga leleha ko itoa-toakua una gea ai baluhika.

²⁰ Ho ahao gea ai baba de ngoi meme yopaluhu ato, “Masara, igoungu, una naa mia ngofaka. De ka womahidoboainohi de duru ko womahiorikua.

²¹ Masara ngomioo duru ko mihiorikua hokokia idadi hiadono ka idadi womahioriki, de abe o nyawa abe iwihifelanga ai lako onangoo ko miahiorikua. Masara una wobaluhoka ho kiani unangika dika niwileha de una ahao ka idadi winihingahu abe hokokia idadi ai lakoika gea.”

²² Hokogea dika ai dimono yopaluhu angamoi yamodongo manga hidimonika. Yamodongo onangika angamoi ihioriki o Yahudi ma nyawa manga hidimono gea yoputuhoka ato onagona dika yotemo ato, “O Yesusu Una gea o Mesia,” gea ona ko yahigunoakaua yowohama manga dodotoko ma tauika.

²³ Gea ma titi hiadono worafi-rafi ai dimono gea yopaluhu ato, “Masara una wobaluhoka ho kiani unangika dika niwileha.”

²⁴ Ho ka de hokogea ai baba de ngoi meme yopaluhu ibooto de ahao manga hidimono gea iwiahokoli worafi-rafi la wahimanga. Ho naa ma hinooto iwileha-leha ma titi ato, “Duru kiani Ma Jou dika nigorakiye ho kiani nohibehehongo Ma Jou ai himangoka la ufa nomahipongono. Ngona kiani de ani demo ma gou-goungu nomahingahu angamoi ngomi wiwihiorikoka Una wonihifelanga ani lako, de Una gea o howo-howono ma nyawa.”

²⁵ De worafi-rafi gea wapaluhu onangika wato, “Ngohi ko tihiorikua nako Una o howo-howono ma nyawa eko koua. Masara naa duru tohioriki, abe ngaro ma dihira torafioka ma naa tomahiorikoka!”

²⁶ Ho ona iwilehali ato, “Ho wadodoa ani lakoika? Hokokia wodiai wohifelanga ani lako hiadono ka idadi nomahioriki?”

²⁷ De una wapaluhu onangika wato, “Tato bote tinihingahuoka masara ko nihingakua ho adodoa ho ka nihilehahi? Sarakia, ngini ko nihigihenua abe tinihingahuoka? Eko marai nginioo niato o Yesusu nioigo niwinii-niiki?”

²⁸ Ka de gea wotemo ibooto de ona worafi-rafika iwihidokengino ato, “Marai ngonaoo hoka onangoli abe o Yesusu iwitobaniiki nodadioka! Masara nako ngomi, ani hibaluhu naa, koua! Ngomi o Musa dika wiwinii-niiki abe Ma Jou ai behehongo hamakeoka o Musaino, gea dika mianiiki ngomi.

²⁹ Angamoi nako o Musa, igoungu, Ma Jou wotemo unangika, gea mihioriki. Masara o nauru gea, Una o kiaino ma nyawa hiadono ngomi ko wiwihiorikua!”

³⁰ Ho una wapaluholi onangika wato, “Ngohi gea nia demo duru ka toherangaholi hiadono kanganohi tanu totemo ma duru toheranga hiadono ko idadiua totemo! Una gea wodiai la ka idadi tomahioriki masara ngini niato ngaro Una gea o kiaino ma nyawa ma ko niwihiorikua!

³¹ Ma ngone naa hohioriki nako o howo-howono ma nyawa ngaro yomaniata ma, manga gogahoko Ma Jou ko wahigihenua. Ma ona abe iwihigiriiri de yaniiki to Ma Jou ai mau, gea ona wahigihene.

³² Abeika naa, ka de o dunia idadioka de hiadono ma oraha naa de ko ma iwahi o nyawa yoihene o ade-ade ma gou-goungu abe hokonaa. Abe o nyawa ka de yomahidoboainohi yorafioka de ahao naga o nyawa yodiai hiadono ka idadi yomahioriki.

³³ Nako Una wohiduhunu gea ko Ma Jouinoua duru ko kia-kiaua wakunu wodiai.”

³⁴ Ka de worafi-rafi gea wotemo hokogea de ona duru iwitaere ato, “Ou, ngona gea ka de nomahidoboainohi de duru nodadiokau o howo-howono ma nyawa! Mode ngona onaguna hiadono nato nomidotoko ngomino hokonaa?” Hokogea o Farisi ma nyawa iwitaere ibooto de ahao de manga dohata, manga dodotoko ma tauoka worafi-rafi gea iwihihupuoka ma hoanika.

O Yesusu wahitararono ma titi o nyawa abe yorafioka Ma Jouika

³⁵ Ka de o Yesusu woihene abe worafi-rafi gea manga dodotoko ma tauoka iwiumoka ma hoanika de wilingiri una. Ho gea ka de wimake de o Yesusu wileha unangika wato, “Sarakia, nako o Nyawa ma Ngofaka ngona ningakuoka Unangika?”

³⁶ De una wipaluhu wato, “Ahi Baluhu, nako o Nyawa ma Ngofaka gea onaguna? Irahai nohihingahu la ka idadi tingaku Unangika.”

³⁷ De o Yesusu womahingahu wato, “Marai ngona nimakeoka o Nyawa ma Ngofaka, angamoi gea Una abe wonitemo-temo ngonaika ma oraha naa.”

³⁸ De worafi-rafi gea duru wihidogaragoholi o Yesusika ho womamotumuku ai himangoka de duru ka de ai doraka wotemo wato, “Ahi Baluhu, duru toningaku.”

³⁹ De o Yesusu wihingahu unangika wato, “Ngohi naa toboa o duniauku naa la ka idadi o nyawa manga howono tahidumutu onangika. Hokogea tahitararono manga howono la ona yorafioka ka idadi yomahioriki, masara abe ona yomagoraka de yomahingahu ato ka idadi yomahioriki, onangika gea tahidadi la yorafioka.” Hokogea o Yesusu wohiketero ma titi o nyawa manga howono wahidumutu.

⁴⁰ Masara o Farisi ma nyawa genangoka yoihene ai demo gea de iwileha ato, “Ho gea ma titi o kia notemo, done ngomioo nato mirafi?”

⁴¹ De o Yesusu wapaluhu onangika wato, “Nako de ma titi nginioo hoka nirafioka, abe igoungu ko niwihiorikua Ma Jou, gea ko iwa nia howono hiadono inihohowono. Masara angamoi ngini nimagoraka niato ma gou-goungu abe Ma Jouino duru nihioriki, ngaro ko nihiorikua, gea nimahitaana abe itiai ti ngini nia hohowono ka inidaenohi.” Hokogea o Yesusu wahidumutu manga sade onangika.