Yohanese 5 - Ma Jou ai Demo-demo o Totobelohoka

O Yesusu wihitogumu womatengo o Betesa ma taagaka

¹ Ho gea ipaha de naga o rame-rame moi, abe o Yahudi ma nyawa manga agama ma rame-rame, de o Yesusu woikoli o Yerusaleeme ma kotaika la ka idadi waniiki manga rame-rame gea.

² De o Yerusaleeme ma kota naga ihigilolitino de o dadaduhu iputurungu ho o ngorana muruono naga de naga ma ngorana moi ihiromanga o Domba ma Ngorana. De ka de o nyawa yowohama o Domba ma Ngoranino de manga datekoka yamake o taaga ma amoko de ma taaga gea yobaakino. De o Yahudioka manga demo ihiromanga o Betesa, abe ma titi o dora ma hiokoo ma taaga. De ma taaga gea ihigilolitoka o tau motoa, ma gea hoka o tau ma punga dika imadiai.

^3-5 De naga o nyawa yokokangela genangoka manga ngoe yogogere, abe manga panyake irupa-rupa, ho utu naga yorafioka, naga utu yolugu, de naga utu manga badanga ma hononga ihonenge. De genangoka naga womatengo de ai panyakeoka hiadono ai dekana wogogere genangoka ai taongo moruange de tufange.

⁶ De o Yesusu wihioriki ai kangela ma dekanoka, ho ka de wimake una gea de wileha unangika wato, “Sarakia hobata, noigo notogumu?”

⁷ De una wofikiri o Yesusu woleha hokogea de ma titi nako wouti o akeruku ma oraha o malaekata aluluaka ma akere de ka idadi wouti o akeruku gea la wotogumu. Ho wipaluhu o Yesusika wato, “Ahi Baluhu, duru toigo masara ma oraha o akere aluluaka ahi dodiawo ko iwa abe ka idadi ihiduhunu touti ma akeruku. Ho ngaro tomaliara tato o akeruku touti la totogumu ma o nyawa utu yohiraka hiadono ngaro tato touti la totogumu ma ko tomahidae-daenua.”

⁸ Ka de ai demo gea woihene de o Yesusu wihuloko unangika wato, “Nomomikoka! Ani nanao nagoraka de nomaloiki.”

⁹ Ka de hokogea o Yesusu wotemo ibooto de ka dau de womaokoiye angamoi wotogumoka. De ahao ka idadi wotagi-tagi ho ai nanao wagoraka de womulaenge wotagi. De gea o Yesusu wihitogumu o Hiaini ma wangeoka.

¹⁰ Ho nagali genangoka o Yahudi ma nyawa manga balu-baluhu. De ona gea ka de iwimake abe una wotogu-togumoka gea ai nanao wao de iwitaere ato, “Adodoa ho hiadono o Hiaini ma wangeoka naa de ani nanao gea nao? Angamoi naga Ma Jou ai Behehongo ma Bukuoka ato ufa o Hiaini ma wangeoka hokarajaanga. Ho gea ma titi nanga bohono naga abe nanga kiahonanga ko idadiua hao o wange naa.”

¹¹ Masara una wopaluhu wato, “Ma naga womatengo wohihuloko ho hiadono ahi nanao tagoraka de tao nenangino. Abe Una wohihitogumu ahi kangelaino de ahao wohihuloko wato, ‘Ani nanao nagoraka de nomaloiki.’”

¹² Ka de ai demo gea yoihene de o Yahudi ma nyawa manga balu-baluhu gea iwilehali ato, “Onaguna gea wonihuloko la hiadono nagoraka de nao ani nanao gea?”

¹³ Masara una wotogumoka gea duru ko wihiorikua onaguna gea wihitogumu angamoi o Yesusu ko womafetongua de ka de wihitogumoka de o nyawa manga ngoe manga hidogoronaika o Yesusu wowohamoka.

¹⁴ Masara ipahaika de yomakamakeoli Ma Jou ai Tauoka ho o Yesusu una wihitogu-togumika witemo de o hitiari wato, “Abeika, ngona nosanangioka e? Naa ani buturungu ilioka. Ho nomatotoihene naa abe tonihingahu, ibootoka nahowonoli angamoi ngaro ma dihiraino ani kangela duru ilamoko masara o howono ma hohowonohi, ka enangohi duru ilamoko ma kangela.”

O wowango ka hiado-adonika ihititi o Yesusoka

¹⁵ De ahao una wotogumoka gea woiki manga balu-baluhika gea abe nengokaino iwileha onaguna wihitogumu. Gea onangika woiki, de ahao wahingahu wato, “Una gea wohihitogumu ai romanga o Yesusu.”

¹⁶ De mangale ma titi gea o Hiaini ma wangeoka o Yesusu wihitogumu una gea, ho hiadono iwihikangela o Yahudi ma nyawa manga balu-baluhu.

¹⁷ Ma o Yesusu wahingahu onangika wato, “Ko ma iwahi ma oraha ahi Baba ko wokarajaangua ho Ngohioo o wange-wangeiye ahi karajaanga ko itoa-toakua.”

¹⁸ Ho ka de o Yesusu ai demo gea yoihene de o Yahudi ma nyawa manga balu-baluhu gea duru idogo iwidohata hiadono iwihidee ato kiani iwitoma. Ona iwihidee ato iwitoma angamoi ma titi hinooto, moi manga bohono watilakuroka abe ko idadiua yokarajaanga o Hiaini ma wangeoka. De utuohi o Yesusu wifetongo Ma Jou, wato “Ahi Baba” hoka ma titi womahingahu wato yomatoteroino Una de Ma Jou. Gea ma titi hiadono ona yomakoketemo ato, “Kiani hitoma la hiadono wohonenge.”

¹⁹ De ahao o Yesusu wapaluhu onangika wato, “Naa duru tagou-goungu tinihingahu, ko moiua Ngohioka de tomahohiningaiye dika de todiai. Masara gea ena abe ahi Baba wodiai hokogenangoo imakadaene Ngohi naa todiai. Nako Ngohi dika ahi mau de todiai, gea ko todiaiua angamoi gea tamake o Baba wodiai, gea dika ka idadi Ngohioo todiai.

²⁰ Angamoi ahi Baba duru wohidora Ngohino ho wohihimatokoka to Una ai karajaanga mata-mata ingodumu Ngohino. Masara utuohi ilamoko wohihikarajaanga Ngohi naa hiadono ngini ahao niamake gea todiai de ko idadiokaua nitemo angamoi ka niherangaholi.

²¹ Abeika, o nyawa yohonengoka Ma Jou o Baba ka idadi wahimomiki, abe manga honengino wahiwangoli. De duru imaketero hokogea Ngohioo naa ai Ngofaka ka idadi onagonaika dika toigo tahidoaka o wowango de ka idadi tahidoaka.

²² De o Baba wohihidoaka o kuaha Ngohino la Ngohi ai ngofaka dika ka idadi o nyawa manga datoro tatailako ma titi tahohowono eko tahidoaka o wowango. Gea to Ngohi dika ahi hiaturu abe o hiaturu gea Una wato Ngohi dika todiai, Una ma hirete ko wodiaiua.

²³ Hokogea wohiaturoka la hiadono Ngohino o nyawa manga horomati idadi duru imaketero hoka o Babaika iwihoromati. De angamoi gea Ma Jou o Baba wohihidingoto Ngohi naa ho onagona dika ko ihihoromatiua Ngohino, gea Ma Jou o Babaoo ko iwihoromatiua.” Hokogea o Yesusu womahingahu onangika.

²⁴ De o Yesusu ko womatogumuahi wotemo onangika wato, “Naa duru tagou-goungu tinihingahu nginika, gea Ma Jou o Baba wohihidingoto Ngohi naa. De onagona dika abe ihigihene ahi demo hiadono duru iwingaku Ma Jou o Babaika, ona gea yamakeoka o wowango ma ngango abe ka hiado-adonika. De mangale ma titi o nyawa abe ko ihingakuahi Ngohino ona gea manga wowango ma honenge ho ka de ihingaku de manga wowango aturuuruoka abe idadi o wowango ma ngangoli. De ona gea ahao o hone-honenge ma hohowono ko yadaenokaua angamoi o wowango ma ngango nagau onangoka.”

²⁵ “De nenangoo duru tagou-goungu tinihingahu, naga ma oraha, de igoungu ma oraha gea adonoka naa, abe o nyawa ngaro yohonengoka ma ka idadi Ngohi Ma Jou o Ngofaka ahi ilingi yoihene. Ho ahi demo de ma kuahaka hiadono ona gea abe ngaro yohonengoka ma ka de ahi ilingi yoihene de yomomiki yowangoli.

²⁶ Angamoi duru imaketero hoka o wowango ma titi ahi Babaka, Una wohihidoaka ai kuaha Ngohino hiadono hokogenangoo o wowango ma titi Ngohioka.

²⁷ De nagali abe ai kuaha wohihidoaka Ngohino la o nyawa manga datoro tatailako, abe ma titi tahohowono eko tahidoaka o wowango, de ahi kuaha gea mangale Ngohi naa o Nyawa ma Ngofaka.”

²⁸ De o Yesusu wohigila-gilali womahingahu o Yahudioka manga balu-baluhika gea wato, “De ufa niheranga ahi demoika naa. Ahao naga ma oraha abe ona yohonengoka mata-mataika ngaro o kiaka dika naga ma ka ihigihene ahi ilingi.

²⁹ Ho ahao yokokimomiki manga honengino de ona abe manga datoro itiai yodomomikino o wowangoino, masara ona abe manga datoro itorou yomomikino la manga hohowono dika yamake.

³⁰ De gea duru ko moiua todiai abe Ngohi tomahohiningaiye dika de todiai. Ho abe ma oraha gea o nyawa manga datoro tatailako, abe tahohowono eko tahidoaka o wowango onangika, gea taniiki duru imakadaene abe toihene ahi Babaino. Ho o nyawa tahohowono itiai angamoi ko to Ngohiua dika ahi mau taniiki masara duru to ahi Baba ai mau dika taniiki angamoi gea Una wohihidingoto Ngohi.” Hokogea o Yesusu womahitararono o Yahudioka manga balu-baluhika gea.

O nyawa iwihitaana o Yesusu Unangoo Ma Jou

³¹ De ahao o Yesusu ka wahitararonohi onangika wato, “Ma nako to Ngohi dika ahi demo tapake la tomahitaana ngini marai ko niangakua.

³² Masara naga womatengo, Unangoo wohihingahu ma titi Ngohi naa, de gea Ma Jou o Baba de to Una ai demo gea duru igoungu.

³³ De naga womatengoli gea o Yohanese. Abeika, ti ngini nia nyawa niahidingotoka o Yohanesika de gea ma titi Ngohi naa winihingahu de una duru wagoungu.

³⁴ De mata-mata naa Ngohi tinihihohininga ko ma titiua kiani naga o nyawa manga demo la hiadono ihihitaana Ngohi naa. Ma, naa tinihihohininga abe to ona manga demo gea tapake la nginioo ahao Ma Jou ka idadi winihihohe nia hohowonino.

³⁵ O Yohanese, una gea ka idadi hihiketero de o hilo abe ma oraha itokara ngaro ko itedekanua ma o nyawa ka yahitararono. De imaketero hokogea ngaro ma oraha jai-jaiino dika ma nginioo nisanangi niodogarago o dararonika gea abe niamake o Yohanesino.”

³⁶ De o Yesusu ka wahitararonohi o Yahudioka manga balu-baluhika gea wato, “Masara abe Ngohi naa todiai, ena gea ihihitaana abe Ngohi naa Ma Jouoka de taino. Ho ngaro o Yohanese ai hingahu gea itiai ma titi Ngohi, masara naga abe ka enangohi abe duru ihihitaana de gea ma karajaanga abe Ma Jou wohihibehehongo la tabooto todiai. Ho genangoo la ihihitaana Ngohi abe Ma Jou dika wohihidingoto nginino.

³⁷ De o Baba ma hirete ka ma dihirainohi wohihingahuokau ma titi Ngohi naa de ai hidee abe ahao wohihidingoto o duniauku. Ngini naa ko ma moiuahi niihene to Una ai ilingi de ko ma moiuahi niwimake abe ai rupa.

³⁸ De to Una ai demo genangoo ko niodafongua ho hiadono to Una ai demo-demo ko imanoaua ti ngini nia hiningaka angamoi ko ningakua abe wohihidingotino Ngohi naa.

³⁹ Ngini naa o balu-baluhu de duru inimagawe nimadotoko Ma Jou ai Demo-demo angamoi niato ai Demo-demoino niamake o wowango ka hiado-adonika. Masara ngaro Ma Jou ai Demo-demo gea inihingahu ma titi Ngohi naa,

⁴⁰ ma, ngini nioluku Ngohino niboa la niamake o wowango ma gou-goungu gea.” Hokogea o Yesusu wataere o Yahudi ma nyawa manga balu-baluhika.

⁴¹ De o Yesusu wohigila-gila to una ai hininga onangika, wato, “Ngohi ko tolingirua o nyawa manga higiriiri Ngohino.

⁴² Masara ngohi duru tinihioriki ngini, abe nako nia dora Ma Jouika ena gea duru ko iwa nia hiningaka.

⁴³ Ngohi naa toboa de ahi Baba ai romanga tapake abe ma titi to Una dika ai kuahaino toboa, masara ngini ko nihidafongua Ngohi. Masara de o nyawa utu yoboa nginino, ngaro de to ona dika manga kuaha, ma, ka de nia sanangi niadafongo ona gea.

⁴⁴ Ngini naa duru nisanangi nimakokogorakiye angamoi o nyawaino dika manga higiriiri nimalingiri. Masara ko nimalingirua o higiriiri ma gou-goungu Unangino gea abe Una dika Ma Jou. Ho nako hokogea ti ngini nia hininga, done sarakia de ka idadi nihingaku Ngohi naa?”

⁴⁵ De o Yesusu wotemo-temo onangika naa ma baha wato, “Ma ufa ngini niafikiri niato bote Ngohi ahao o Baba titutumu la tinihingahu Unangika ma titi nia howono. Koua, ko Ngohiua tinikalaki, ma gea o Musa abe naa o Babaika wihingahu ngini naa nidiai ko itiaiua. Abeika, ngini niato o Musa niwingaku, ho duru nimahinganono unangino abe o duduhunu.

⁴⁶ Masara nako igoungu niwingaku gea kiani Ngohioo nihingakuoka angamoi ma titi o Musa wotulihi, ma titi Ngohi naa.

⁴⁷ Ho nako to una ai demo gea wotulihukuoka ko niangakua, done sarakia niangaku to Ngohi ahi demo?” Hokogea o Yesusu de ai demo wahitaana o Yahudi ma nyawa manga balu-baluhu manga hiningaika.