Yohanese 2 - Ma Jou ai Demo-demo o Totobelohoka

O Yesusu o heheranga wodiai o gogilaka ma rame-rameoka

¹ De o wange hinooto ipaha de naga o gogilaka ma rame-rame o Kana ma kapongoka abe o Galilea ma tonakoka de o Yesusu de ngoi meme naga o rame-rameoka gea.

² Abe o gogilakino manga baluhu manga hiaturu la o Yesusu de ona iwitobaniiki onangoo yahokino la manga gogilaka ma rame-rame yaniiki.

³ De ona abe yahokino yaniiki o gogilaka ma rame-rame onangika yahiokere o angguru ma teongo ma gohaka. Masara ahao manga angguru ma teongo yamataka de o Yesusu ngoi meme moiki mihingahu o Yesusika mato, “Manga angguru ko iwaka.”

⁴ De o Yesusu womipaluhu munangika wato, “Ele, ngaro ufa nahuha manga angguru gea, nanoaika Ngohioka, ma, iti nohioriki ma oraha ko adonuahi abe ahao tomahimatoko ahi buturungu ma gahumu.”

⁵ Ho ngoi meme mahingahu onangika abe yoleleani o rame-rameoka gea mato, “O kia dika o Yesusu winihuloko la nidiai, gea ngini nidiai.”

⁶ De genangoka naga o akere ma ngi butaanga abe yodiai o hakaruino. De o akere ma ngi gea ma hapa hoka o boto duru ma ago-agomo abe amomoiika ka idadi ihinoa o akere ngade-ngade o litere o ratuhu moi. De genangino yomaguiti o akere la yapake yomaihoro de genangino yale la manga kiahonanga yaihoro ihidodiai imaketero hoka o Yahudi ma nyawa yomahibohono la ato manga datoro itiai Ma Jouika. Gea ma titi hiadono o akere ma ngi butaanga gea naga genangoka.

⁷ De abe yoleleani o rame-rame ma goronaka gea o Yesusu wahibehehongo onangika, wato, “O akere ma ngi gea kiani niakokiomanga de o akere.” Ka de ai behehongo yoihene de yomulaengoka o akere yale de yoguhe ma boto-botouku gea hiadono duru yakokiomangoka.

⁸ Gea yaomanga ibooto de ahao o Yesusu wahibehehongoli ona yoleleanika wato, “Ho gea ibooto ho naa genangoka niwiguiti la o rame-rame manga hidimonika niwidotaka.” Ho yodiai hoka o Yesusu wahibehehongoka.

⁹ De o akere iwidotaka unangika gea o Yesusu wohidadioka o angguru ma teongo ma gohaka. Ho naa, ka de o rame-rame ma hidimono gea wataili de duru woheranga hiadono womatemo ai hiningaka wato, “O kiaino o angguru naa?” Una gea ko wohiorikua o angguru ma teongo o kiaino iwiguhe masara ona abe yoleleani ona duru ihioriki. Ho naa una ka de wataili ibooto de wiahokino woila-ilaka.

¹⁰ De wiade-ade unangika wato, “O nyawa manga biaha yahitihiraka manga angguru ma rorahai abe yahiokere onangika abe yahokino. Gea yahiokere hiadono yakokiwedonoka de ahao manga angguru biaha abe ikuranga imutiti enangoli yahiokere. Masara nanga biaha gea ngona nohikawalimi, angamoi ngaro ani angguru kangano irahai ma ka nenangohi irahai abe nagogonika hiadono ma oraha naa de ahao nohihupu.”

¹¹ O heheranga naa o Yesusu wodiai o Galilea ma tonakoka abe o Kana ma kapongoka. Genangoka wohititi ai dodunguu, abe yahiheranga o nyawa, la onangika womahimatoko ai medebini ma dararono. De o Yesusu iwinii-niiki manga ngongaku ikokidogoli o Yesusika.

¹² Ho gea ipaha de o Yesusu woiki dai o Kapenaumu ma kapongoko. Naga yomakiniiki ngoi meme de ai doo-dodoto de ona gea abe wairiki la iwitobaniiki. Ho manga futu muruonino naga yomahidodogumu o Kapenaumu ma kapongoka.

O Yesusu waduhu abe yomafuku-fukunu Ma Jou ai Tauoka

¹³ De genangoka o Yesusu wodamaa hiadono itigioka o Yahudi ma nyawa ihirame-rame manga Totilakuru ma rame-rame de ahao wogila-gila daku o Yerusaleeme ma kotaiye.

¹⁴ De womahiadonika de ahao woiki Ma Jou ai Tauika de wowohama. De abe ihiromanga Ma Jou ai Tau ma punga-punga genangoka o Yesusu wamake o nyawa ko manga ngoe duru genangoka yotobafukunu o hapi, de o domba, de o namodaara. De naga o nyawa utu genangoka yogogeruku manga meja-mejaka la o nyawa o tonaka utuino manga tiwi yaturuuru de o tiwi abe ka idadi yapake o Yerusaleemoka.

¹⁵ Mata-mata gea o Yesusu wamake de Una duru ko woigoua ho waleino hoka o migi de womadiai o boboha moi. De ai boboha gea ahao wapake la o nyawa gea wahikiniiki Ma Jou ai Tauoka. Ho ona gea waduhu ka ma moi de manga hapi de manga domba. De abe o tiwi yotobaturuuru, to ona manga meja-meja wamotumu ho hiadono manga tiwi wapurarahoka.

¹⁶ De wahuloko onangika abe o namodaara yofuku-fukunu, wato, “Nia totaleo nihihupuoka! Ahi Baba ai tau ufa nihidadi o bubukunu ma tau!”

¹⁷ Gea ka de idadi de ona iwitobaniiki yomahohininga abe itulihukuokau Ma Jou ai Demo-demoka abe itemo ato, “Ahi Baba, ahi dora alufungoka ani tauika hiadono ko tomatongohonokaua ho kiani ani tau todatoko o dorouino.”

¹⁸ Hokogea o Yesusu wakiniiki ibootino de naga o Yahudi ma nyawa manga balu-baluhu yomarihimanga de o Yesusu de iwileha, ato, “Sarakia ngona naa hiadono hokogea nodiai? Nako Ma Jou wonihigunoa ngona nodiai hokogea ngomi miato kiani nomihimatoko o dodunguu la nomahitaana la gea minihioriki ngona de ani kuahaka.”

¹⁹ De o Yesusu wapaluhu onangika wato, “Nako Ma Jou ai Tau nenanga niakilianga de ahao o wange hange dika de Ngohi tohigokokali.”

²⁰ De ona iwipaluhu o Yesusika ato, “Adoo! Barikua ona ko manga ngoe abe Ma Jou ai Tau nenanga yodiai de o taongo moruata de butaangaino yokarajaanga masara genangoo de ko yabootua. Ho done sarakia ngona nato ngaro naga yakilianga masara ngona napoa de o wange hange dika nohigokokali?” Hokogea manga demo.

²¹ Masara o Yesusu womahiketero de ai badanga dika abe wato Ma Jou ai Tau gea ma titi to Una ma hirete ai badanga.

²² Masara duru ma dekanino de ahao ai demo ma titi gea ona iwitobaniiki yohininga de yomangaratii. Abe ai lungunino o Yesusu womomikokau de ahao yomahohininga ai demo ma dihira gea womahiketero ai badanga de Ma Jou ai Tau. Ho gea yomahohininga de ona duru yangaku Ma Jou ai Demo-demoika. De abe ma dihira o Yesusu wahingahuoka abe wato ai futu hange dika de womomikoka, genangikaoo duru yangaku.

O Yesusu duru wahioriki o nyawa manga hininga

²³ De ma oraha o Yesusu waniiki o Totilakuru ma rame-rame gea o Yerusaleeme ma kotaka, naga o nyawa manga ngoe iwingaku ai romangika mangale iwimake wodiai o heheranga ma ngoe genangoka.

^24-25 Masara onangika abe manga ngongaku hokogea dika o Yesusu ko womahinganonua to ona manga hiningaika angamoi o nyawa mata-mata duru manga hininga wahioriki. Ho ngaro ufa naga iwihingahu hokokia o nyawa manga hiningaka angamoi gea Una wohiorikokau.