Yesaya 9 - Ma Jou ai Demo-demo o Totobelohoka

9:1-4 ko atailakouahi

¹ Ho ona gea abe yomanoa duru o fufutuoka ahao yamake ma dararono moi abe duru kohadararono angamoi ona ahao ka idadi yataoko to Una ai hininga de ahao itararono onangika. De ona genangoka ma dihiraino yotobamodongo o hone-honengika, masara ahao ka idadi ihioriki itararono ma titi Ma Jou ai duduhunu onangika.

² De Ngona Ma Jou nahidoaka la ona duru yososanangi, de manga gogarago duru idadi ilamoko. Abe ona ahao yomorene to Ngona ani himangoka imaketero hoka o nyawa yotobamorene o gugutuku ma gogiriaka, de yomakigimono imaketero hoka ona yolaku-laku ma oraha yodafongo manga hilaku ma utumu.

³ Ngona, Jou, nagorakoka manga gina ma dodubuho onangoka de aino, de natobi-tobikuku ma boboha de ma tutukunu abe apoha-poha manga belekaino. De gea notobikuku imaketero hoka ma dodihiraino de Ngona duru nahikalaka o Midiana ma nyawa manga tentara.

⁴ De ahao o wange gea de o hikadame ilaku, ho ko hoihenokaua o tentara manga hapatu yomakode-kode. De ngaro ma baju abe de ma awunoka ma titi yomaketeparangi, enangoo mata-mata atoomuino de atufuku la idadi o uku ma inomo. Ma Jou ai Demo-demo naa inahingahu abe ai Mesia to Dautu ai toforauku de Una gea ahao Ma Jou ai nyawa wahikoano ka hiado-adonika.

O hingahu abe ma titi nanga Duduhunu O Hitararono ma hidogo

⁵ De hokonaa ma titi hiadono o hikadame ilaku. Angamoi ahao o ngofaka womatengo womaboa ngoneoka, abe womatengo o ngofaka iwihidoaka ngoneino. De Una gea womahimoku ai tagongo la wonahipareta ngoneino. De nagali ai romanga iwoeika, abe iwihiromanga Wososawaro Wohidee, de Ma Jou Wokokurutiye, de nanga Baba abe ko iwa ai Baha, de o Hikadame ma Baluhu.

⁶ De Una ahao wonahikoano de ai kuaha duru ikokurutiye, abe imaketero hoka ma dihiraino ai tofora o Dautu wonahikoano. De ai tonaka abe idadi ai giamoka, ena ka ihikaika idadi ilamoko, de ko ibobahaua abe wohikoano masara ka hiado-adonika naga ai kuaha. De gea wohikoano de duru itagi irahai mata-mataika ai kokawaaha ma goronaka. De mangale ma titi Ma Jou o Yawe duru wadora ai nyawaika, ho ka idadi wahikoano irahai naa de ka hiado-adonika.