Yesaya 8 - Ma Jou ai Demo-demo o Totobelohoka

8:11-15, 21-23 ko atailakouahi

¹¹ De ahao Ma Jou o Yawe wotemo ngohi o Yesayaino de ai demo ma bobuturungu. Abe wohilufungu de to Una ai kuaha de duru wohihitiari wato, “Ufa ngona ani wowangoka de nomaaduru abe hoka o Yehuda ma nyawali naa manga datoro.

¹² Abe nako hoka noihene o abari abe ato naga o nyawa manga hidee ma dorou, de gea ufa niangaku dika manga demoika. De nako o nyawa duru yamodongo moiika, gea ngaro ufa de ngona naniiki dika manga hawana ma hininga.

¹³ Angamoi naga moi dika abe kiani ngona ani horomati de ani hawana itagi genangika, de gea Ngohi Ma Jou o Yawe Wokokurutiye abe kiani nohimodongo Ngohino. Angamoi ka Ngohiohi totebi-tebini.

¹⁴ De nako nomahinganono Ngohino de ahao ka idadi ngona nomahitatoko Ngohioka. Masara nako o Isiraele de o Yehuda ma nyawaika ahao ko hokogenangua. Angamoi onangika Ngohi todadi hoka o hakaru moi abe idadi o bebeleke o nyawaika hiadono yopeleke enangika de yoruba. De ona gea yoruba ma titi manga hininga ieteke Ngohino. De ngaro o Yerusaleeme ma kota ma nyawa masara onangoli hokogea manga hininga. De gea ma titi ho hiadono Ngohi ahao todadi hoka o modoi eko o bobenga onangika.

¹⁵ Ho o Isiraele ma nyawaino gea de manga ngoe yopeleke de yoruba genangoka hiadono yobodito. De nagali manga ngoe abe ahao yahidataoko ma modoioka de yaoika ma homoaika.” Hokogea Ma Jou o Yawe wohihingahu ma titi o Isiraele ma nyawa ahao yataokino de yaoika.

²¹ De Ma Jou ka wohitemohi ma titi ena gea abe wato, “De ahi nyawa yatao-taokino gea ahao yoparadidu / yohuruputu aika aino ma tonakoka gea de duru yohafini de yohu-huha. De manga hafini gea yahidadi la duru yongamo hiadono o doana ma demo ihupu manga uruino. Abe gea iwidoana ma koanoika de ngaro Ngohioo manga Jouino masara yomamatagaiye de ihidoana Ngohino.

²² De o tonaka ma amokika gea ngaro o kiaika dika yomalega masara gea o kokangela de o fufutu dika yamake hiadono ngade-ngade manga hininga itoaka ma titi manga dodubuho gea. Ho ka idadi hotemo hato ona gea yomaketero hoka yaumoka o fufutu ma goronaka abe duru ma daro-daromoka.”

²³ Masara ngaro ona gea manga kokangela ilago-agomo, masara gea ko ihikaikaua yomanoa o fufutuoka. Abe igoungu ma dodihiraino de Ma Jou o Yawe wahitipokouku ona abe yogogere o Sebulono de o Nafatali ma tonakoka. Masara ipahaino de ahao wohiaturu la ona abe yogogere ma tonakoka gea yamake o horomati o nyawaino. Abe manga tonakoka gea naga imanoa ma ngekomo ma amoko abe ka ihikaika o nyawa yotagi-tagi genangika, de ma tonaka gea ihiromanga o Galilea ma tonaka abe ona ko o Yahudi ma nyawaua duru ko manga ngoe yomanoa genangoka, de utu o Yorodani ma akere ma honongaka yomanoa.