Yesaya 61 - Ma Jou ai Demo-demo o Totobelohoka

O Hitararono ma hidogo O Yesaya ai hingahu ma demo abe ahao o Yesusu wagoraka de wodotoko genangino

¹ Ma Jou o Yawe Wokokurutiye abe mata-mataika naga ai kuahaka, Una gea wohilufungu de ai Womaha ngohino la wohitingakoka ahi karajaangika. Abe Ma Jou o Womaha wohigutiuku ngohiuku de mimahidogogere ka moi de Una. De wohihikarajaanga la ngohi tahingahu-ngahu o abari ma rorahai o huha ma nyawaika, de ona talaruoo manga huha ma goronaka. De Ma Jou ai hingahu moi abe wato kiani ngohi tahingahu gea, “O hiluasa ma oraha adonoka!” Ho gea tahingahu onangika abe ma dihiraino de yahidukusioka abe manga howono ma ngioka. De gea to ngohi ahi karajaanga abe idadi ma titi hiadono Ma Jou o Yawe wohihidingoto ngohi nenangino. Ho ona abe duru yamao manga howono ma dubuho, ngohi naa toboaino la tapaliara de taduhunu onangika. De onangika abe yamao o howono ma kuaha yahidubuioka ahao ngohi tahingahu onangika abe ngohi ka idadi tahihupuoka manga kangelaino gea. De onangoo abe yahidubuioka de o fufutu ma kuaha, ngohi tahingahu onangikaoo abe ka idadi tahihupu o fufutu ma kuahaino.

² De ngohi tahingahuoo naa adonoka ma oraha abe Ma Jou o Yawe ai sosanangi yadaene onangika. O ayata nenanga naga ma titi hinooto de ma oraha enangoo hinooto. Abe ma dobiki ihira gea ma titi ma sosanangi o Yesusu wamake ma oraha wolio o Horogaiye de ngoneoo hamake ma sosanangi gea ma oraha hingaku Unangika. Ho Una wonahingahu wato, “Naa adonoka ma oraha abe Ma Jou o Yawe ai sosanangi yadaene onangika.” (O Yesaya 61:2a). De o ayata naa naga ma dobikoli abe ituru, abe ma titi o lalaru ma garago ahao o nyawa o duniaka yamake ma oraha o Yesusu woboali la wahikoano o dunia ma amokika. Ho o ayata ma dobiki ituru gea itemo hokonaa, “De ahao nagaoo ma oraha abe ka idadi ngohi tahingahu Ma Jou ai nyawaika tato, ‘Naa adonoka ma oraha nanga Jou wonahibalaha onangika abe inahikangela. De to Una ai nyawa manga doomuoka abe yalufungoka de manga hininga ma huha, naa adonoka ma oraha walaru onangika hiadono manga gari waturuuru de o garago.’” (O Yesaya 61:2b).