Yesaya 6 - Ma Jou ai Demo-demo o Totobelohoka

6:1-10 ko atailakouahi Ma Jou ai behehongo moi o Yesayaika

¹ De ma dihiraino, abe ma taongo nanga koano o Usia wohonenge, de ngohi timake nanga Baluhu idodutu. Una naga ai Tau ma Debi-debinoka de wogogeruku ai kaderaka abe duru ikurutiye de duru ma hohailoa ma rupa. De to Una ai baju duru ikurutuku hiadono tamake gea ngade-ngade hoka aomanga to Una ai Tau mata-mataika.

² De nagali hoka o aewani muruono naga ai aridatekoka, de ena gea ma romanga o serafa. De ma serafa gea homoi-homoiika naga ma gafuufu abobutaanga. Ho to ena ma himanga imatatoko de ma gafuufu hinooto, de to ena ma lou enangoo yatatoko de ma gafuufu hinooto. De nagahi ma gafuufu hinootohi ho genangino yapake la ka idadi ihoho.

³ De ma serafa gea yomakokoboaka ato, “Ma Jou o Yawe abe wahipareta o Horogaka ma tentara, Una gea duru ko ai medebini! De o dunia ma amokika aomangoka de to Una ai medebini ma dararono!”

⁴ De to ena ma ilingi duru ilamokiye hiadono to Una ai Tau ma ngorana de ma dibiingoka. De nagali o uku ma nofo ma amoko ai Tau ma goronaka hiadono duru aomangoka de ma nofo gea.

⁵ De gea mata-mata tamake de toihene de ahao totemo tato, “Adoo, ngohi naa tokangelaka, de maraioka ihibinaahaka naa! Angamoi ngohi naa o tobahowono ma nyawa. Ahi uru ipeseke dika ma titi ahi demoino de totobahowono. De ngaro ahi gogianongoru ahi tonakoka ma onangoo manga uru ka ipeseke dika ma titi manga howo-howono. De ma oraha naa timakeoka de ahi lako hinooto nanga Koano, Ma Jou o Yawe abe Una wahipareta o Horogaka ma tentara mata-mataika. Ho igoungu ngohi naa tokangelaka!”

⁶ Masara gea de ahao ma serafa moi ka ihoho ngohino. De to ena ma giamoka naga o uku ma ngaboho moi abe agorakoka o huhuba ma ngioka de o kakatama.

⁷ De ma ngaboho gea yaoino la itubuku / ihitubuku ahi uruino. De ma serafa gea itemo ato, “Abeika, ma ngaboho inidubukoka ani uru ma kaiika, ho ani dorou agorakoka de ani howo-howono aofioka.”

⁸ De ahao ngohi toihene nanga Baluhu idodutu woleha wato, “Onagona ka idadi Ngohi tohidingoto? De done onagona yodadi to Ngomi mia hidingoto ma nyawa la mia demo yatotaka?” De ai leleha gea toihene ho ngohi topaluhu tato, “Ngohi naga. Ka idadi Ngona nohihidingoto ngohi!”

⁹ Ho Una wotemoli wato, “Ngona kiani noiki de nahingahu ahi nyawaika de notemo nato, ‘Ngaro ngini nihigali-gali nihigihene ahi demoino masara ngini ko nihiorikua. De ngini gea ngaro nihigali-gali niolega ahi datorino masara gea ngini ko nihiorikua ma titi genangino.’ Hokogea ahi hohowono ma demo abe ngona kiani nadofanga onangika.”

¹⁰ De ahao Una ka wotemohi ngohino wato, “Ho ani demoino gea de ngona nadiai la to ona manga pea duru itogowinoka, de manga ngauku hoka ko idadiokaua iihene, de ngaro manga lako ma ko idadiokaua yomahioriki. Angamoi nako ka idadi yomahioriki de manga lako de yoihene de manga ngauku, done ona gea manga hiningaino de yataoko ma titi de gea yotoba de hiadono yomatogumoka manga kokangelaino. Masara ma oraha naa de Ngohi ka tolukohi manga kangela tagoraka onangoka de aino.”