Yesaya 57 - Ma Jou ai Demo-demo o Totobelohoka

Pasala 57 ko atailakouahi

¹ De igoungu naga o nyawa yototiai Ma Jou ai himangoka masara ko yaperekiuahi de yopahaka. De hiokoo naga ona yatobagou-goungu manga demoino masara utu yahiaturu la yohonenge ma titi o nyawa manga dorouino. De manga hone-honenge gea ikuranga o nyawa yataoko ma titi.

² Masara ona abe manga wowango yao itiai nako hiadono yopahaka gea de ahao ka idadi yomahiaini o kangelaino, abe manga hininga ko aruwaeokaua masara duru iriidoka.

¹⁵ Abeika nitotoihene Unangika abe duru Wokokurutiye, abe Una wohikoano ka hiado-adonika de ai romanga duru ma debi-debini. Abe hokonaa to Una ai demo, wato, “Ngohi naa ahi gogere o ngioka abe duru ikokurutiye de duru itebi-tebini, masara Ngohi togogeroo o nyawa manga hidogoronaka abe manga hininga duru ihuha de abe yomahitipokouku. De gea togogere onangoka la tahiwangoro ona manga hininga ma dodipokouku, la tahigaro ona manga hininga ihu-huha hiadono manga domoroini ka ilioli.

¹⁶ Angamoi Ngohi naa ahi ngamo nginika ko ihikaikaua itagi, de ahi dadae ma demo nginika naga de ma batingoka. Abe nako hoka ko iwa ahi ngamo ma batingi, gea de ahao o nyawa manga womaha ka ikokitoaka dika, de ona mata-mata tatulaadauku manga womaha agorakoka.”

¹⁷ “De igoungu ahi dohata duru ifae ma titi o nyawa manga horoodo ma dorou, ho tahohowono onangika de taporetika ma titi ahi ngamoino. Masara ngaro hokogea tadotoko o nyawaika masara ka hokogea dika yogila-gila manga pea ma dodogowini ho ko ihihingounua Ngohino.

¹⁸ De ngaro tohiorikoka manga wowango ma dodagi masara Ngohi ahao taduhunu manga kangelaino, de tahidoaka la manga hininga ma miriidi ka ilio onangika. De Ngohi ahao talaru onangika abe manga hininga aomanga de o huha.

¹⁹ De gea talaru ipaha de ahao manga hininga aturuuruoka hiadono o higiriiri ma demo ihupu manga uruoka de aino. De ngaro ona manga gurutika ekola ona manga digi-digino, masara Ngohi tahidoaka ona mata-mataika la manga hininga duru iuwinoka angamoi taduhunu manga kangela homoi-homoiino.” Hokogea o Yawe watemo ai nyawaika.

²⁰ De wogila-gila wotemo wato, “Masara ona manga wowango itobatorou gea yomaketero hoka o gahi abe duru o rato ma goronaka ho ma moku-moku ko itogu-togumua masara ka ihikaika ihibuaeliye ma peseke.

²¹ De hokogenangoo o nyawa yotobatorou manga wowango, ho ona gea duru ko amakeua o hininga ma miriidi.” Hokogea to ngohi ahi Jou ai demo.