Yesaya 55 - Ma Jou ai Demo-demo o Totobelohoka

Pasala 55 ko atailakouahi Ma Jou wahoko o nyawa la o wowango wahidoaka

¹ Ma Jou wahoko o nyawaika wato, “Ngini mata-mata abe nia ngomaha yoduu-dudungu, abeika ngini niainohi o akerino naa! De ngaro ti ngini nia tiwi ko iwaka, ko adodoaua, masara ka idadiohi nikokiboaino! Niboaino la nimangiriki o angguru ma teongo ma gohaka eko o hapi ma susu de niokere! Abe gea biaha kiani nimaijaino masara naa ngaro ufa dika de nifangu, ka idadi nimaleino dika de niokere!

² De abeika nitotoihene Ngohino la ka idadi nimamake de niolomo o inomo duru ma rorahai abe inihiwango nginika! Done ma titi o kia hiadono nimaijaino o inomo abe ko inihiutumua? De done sarakia nia karajaanga ma hasilino de niaumoika nia tiwi gea la nimamake o inomo abe duru ko inihiputurungua?”

³ “Koaho ngini nimatoomuino de nitotoihene Ngohino la ka idadi o wowango nimamake! De gea ahao tinihibehehongo moi nginika abe duru ko tawoha-wohangua ka hiado-adonika. De ahi behehongo gea ahao imakiniiki de ahi behehongo ma dihiraino abe tihibehehongo nia koano o Dautika.

⁴ Abe tigorakiye o Dautu la wodadi o nyawa o dutu ma ngoe manga hihira wokokurutiye, la una gea ka idadi wahidumutu o nyawa Ngohino hiadono ona ihioriki to Ngohi ahi kuaha.”

⁵ “De nginioo ahao niahipareta o nyawa o dutu ma ngoe. Abe ngaro ona manga ngoe ma dihiraino de duru ko inihiorikuahi ngini masara ahao naga manga hingounu nginika. De manga hingounu gea nginika ihititi Ngohi ti ngini nia Jou o Yaweino. Abe Ngohi ti ngini nia Koano tokokurutiye, masara tinihidoakoka la o homoa ma nyawa inihoromati nginika.” Hokogea Ma Jou watemo de wahigaro ai nyawaika.

Ma Jou wohikohowono to Una ai hininga de o nyawa manga hininga

⁶ Ho koaho ngini niwilingirohi Ma Jou o Yawe la nimahitigi Unangika, angamoi ma oraha naa naga de Una hatoli igapanga niwimake.

⁷ Abe o nyawa yotobadiai ma dorou kiani yoporetika manga howono gea la yanoaka dika. De kiani manga hininga ma dorou yomahipidili genangino la ibootohi itagi manga hiningaka. De gea yolio Ma Jou o Yaweino la Una ahao ai hininga ma dora ma hiokoo wapake onangika. Kiani iwigilio Una manga Jouika la Una duru waofi manga howono ai hininga ma rorahaiino.

⁸ De Ma Jou wahitararono ma titi abe Una ka idadi waofi o nyawa manga howono ai hininga ma rorahaiino hokonaa, wato, “Angamoi to Ngohi ahi hininga ma dodagi de ti ngini nia hininga ma dodagi gea duru imakohowono, de to Ngohi ahi datoro duru ko imakadaenua de ti nginioli nia datoro.

⁹ Abe nako hohidotelega ahi hininga de ahi datoro de abe ti ngini nia hininga de nia datoro, gea ka to Ngohiohi duru ka ikurutiyeholi. Abe hohioriki nako o dunia de ma dihanga de ka ma dihangohi duru ikurutiye, hokogenangoo to Ngohi ahi hininga duru imakitingaka de ti ngini angamoi to Ngohi duru kohagurutiye.”

¹⁰ “De naa moioli o hiketero todiai. Abe o awana ipuraraha ma dihangoka de auku dau ma duniauku de ko ilioiyeokaua masara ihipehaka ma tonaka la ihifero ma hofokika. De ma gugutuku ma hofokino de idadi o nyawa manga inomo de ona yotobadatomo manga bibiti.

¹¹ De hokogenangoo de to Ngohi ahi demo abe ihupu ahi uruino, abe Ngohi tohidingotika de gea kiani ma hofoko idadi genangino. De ko ma iwa abe ahi demo yogilio Ngohino de ma homoa dika. Ko hokogenangua, masara ahi demo ahao ihihofoko ma hasili abe imakiniiki de ahi hidee enangika.”

¹² “De naa tagou-goungu tinihingahu abe ngini ahao nigogarago ma oraha nikokihupu genangoka de niaino. De gea nia kokihininga de ma riidoka angamoi nihupu de ko kia-kiaua idadi nginika, nisosanangi dika nihupu genangino. De ma oraha gea de ma dulaada mata-mata inihinere angamoi enangoo igogarago. Abe ma loku-loku ahao yonyanyi de ma ilingi ma amokiye, de ma gota mata-mata ahao yopokahoata ma titi ma garagoino!

¹³ De abe ma dihiraino naga o gota ma hohumuduru de ma hihikaka, ahao gea aturuuru la o gota duru ma rorahai de ma ago-agomo iwangoiye genangoka. De gea mata-mata idadi de ihiboaino o horomati ma amoko Ngohi o Yawe ahi romangino, de idadi ahi kuaha ma dodunguu moi abe ko ihihangua de ko awohangua ka hiado-adonika.” Hokogea Ma Jou ai hingahu ma demo abe hokokia ahao idadi to Una ai nyawaika.