Yesaya 53 - Ma Jou ai Demo-demo o Totobelohoka

O dunia ma nyawa iwioluku to Ma Jou ai Huhuloko abe wihidingoto onanguku O Hitararono ma hidogo

¹ Ngomi abe Ma Jou ai Demo-demo miadofanga o nyawaika miamakeoka o hingahu Ma Jou o Yaweoka de aino ma titi Una gea abe ahao wonahihohe nanga howonino de ai duduhunu gea to Una ai buturungoka dika de aino. Masara abe ona yoihene mia hingahuika gea duru o nyawa ko yowoeua abe imingaku ho manga hohutulu dika abe yangaku Ma Jou ai demoika gea abe miadofanga onangika.

² Abe Ma Jou ai himatoko ngomino hokonaa. Naga womatengo woboa Ma Jouoka de waino, de una gea hoka ma dori ma hungi ma ngutukino abe ipotoka o tonaka ma duu-dudungiye. Ho una hoka ma diburohi abe ko itogowinuahi ma roehe de una gea ahao wofero ka hiadono wobaluhu Ma Jou ai himangoka. De to una ai rupa hoka o nyawa biaha dika ho nako hahidotelega de o nyawa utu manga rupa de to una ai rupa ko yomalihowonua hato ka unangohi worahai. De ngaro ngone hohidotelega ai pakeanga de hato bote una ko wokurutiyeua hoka o koano manga biaha. Ho ko iwa abe hamake ai rupaino hiadono nanga hininga adaene unangika ma titi ai rupa.

³ De o nyawa iwidohata unangika hiadono ona iwioluku ho duru manga hohedu ma demo ma dorou unangika. Ho to una ai hininga ma huha duru ilamoko hiadono iwidotodiri ai badangika. De o nyawa manga ngoe ko iwigoua ho una wodadi hoka o nyawa manga gemono ma ngi. Ho de ma oraha iwitilakuru ai himangino de yomahiniporika la ufa yomalega unangika. Hokogea ngone o nyawa hiemono unangika de ngone hifetongo hato una duru ko kia-kiaua iwidaene.

To ngone nanga howono mata-mata Ma Jou wihitagongo ai Huhulokika

⁴ De duru igoungu gea una abe womahimoku to ngone mata-mataika nanga bole-bole. De to ngone nanga huha una wale de womahitouna. Masara ka de ngone himake una abe ai kokangela ma goronaka de hato marai ai howono naga. De gea ma titi Ma Jou wihipoha de o hohowono ho gea hiadono Ma Jouoka de aino o kangela ma ngoe iwidaene unangika.

⁵ Masara gea to ngone nanga howono abe womale ho iwihohowono ka hiadono iwihitopoko ai badangika de o behi ma dolomo. O hohowonino gea hiadono ngone inahitogumu to ngone nanga howo-howonino. De una iwihidatapaluika de to ngone nanga howono ma dubuho Ma Jouika la genangino ka idadi ngone homakadame de Ma Jou de ko hobinaahaua.

⁶ Ngone o nyawa mata-mataika homaketero hoka o domba abe irehene ma hoanika ho ihupu ma duduonino abe genangoka nanga gogoana wonapaliara ngoneino. Abe ngone mata-mata homahihupuoka Ma Jou o Yawe ai doomuino de homahiaturu homoi-homoiika ho ngone ka ihikaika hahowono. De to ngone nanga howono gea mata-mata Ma Jou o Yawe wihitagongo una womatengoika gea.

O dunia ma nyawa manga hininga to Una ai hohonengika abe ato ai honenge ma dorou

⁷ De ngaro una hokogea iwihikangela de to ngone nanga hohowono iwidaenoka masara una ko womademoua de ko womaduhunua. Una wodadi imaketero hoka o domba ma ngofaka abe duru idaana ho duru iriidi ma oraha yao de yatoma. De to una ai miriidi imaketero hoka o domba abe ko imaruwaeua ma oraha ma gogo o nyawa akulu, ho imarii-riidoka dika. De unangoo hokogenangoli womarii-riidoka dika ma oraha to ngone nanga hohowono ma kangela iwidaene.

⁸ De o hone-honenge dika abe ka idadi iwihihupu una o hohowono ma kangelaino gea. De una ko iwahi ai ngofaka de wohonengoka ho ko iwa ai dano-danonguku manga ade-ade. De abe o duniaka ma wowango, to una gea o nyawa yatoakoka. De gea wohonenge ma titi o nyawa manga howono abe to ngohi o Yesaya ahi gogianongoru mata-mataika yatilakurokau Ma Jou ai paretaika.

⁹ De o nyawa iwihidee la to una ai honenge yahidotulungunu de o dorou ma nyawa manga honenge ma ngiika. Masara ipaha una ka de wohonengoka de iwihinoaika o kaya ma nyawa manga lungunika. De mata-mata gea idadi unangika ngaro ko ma moiuahi una wodiai hoka o dualono ma datoro. De una gea ko ma moiuahi de o budi ma demo wapake.

Ma Jou ai hininga to Una ai hohonengika abe ma utumu ai honengino gea duru irahai

¹⁰ Masara ai kangela mata-mata gea Ma Jou o Yawe ai mau imakiniiki. Gea Ma Jou o Yawe abe wihidatapaluika de o huha de o kangela duru kohaodiri gea. De hokogea una womahidoaka la wodadi o huhuba abe aofi o nyawa manga howono mata-mataika. De angamoi wahihohe manga howonino hiadono o nyawa manga ngoe yomahinganono unangika ho genangino ona yahiromanga to una ai ngofa-ngofaka de ai dano-danonguku. De ngaro una ko iwiperekiuahi de ai wowango atoakoka de o hone-honenge, masara ai hingounino Ma Jou ai mauika hiadono una wamake ai wowango duru ma dekana. Abe gea una wohidagi Ma Jou o Yawe ai hidee o nyawaika la wahihohe manga howo-howonino.

¹¹ Ma Jou wihiromanga una gea ai huhuloko duru wototiai hiadono wihigunoa la wokangela. Ka de ai kangela ma huha ipahaka de una wamake ai kangelaino ma hasili ho hiadono duru ai hininga iriidoka de ai sosanangi. De una ka idadi o nyawa wahitiai manga wowangoka angamoi ahao manga howono mata-mata womahitounaka. De mata-mata gea to una ai tobahiorikoka de aino abe una wohiorikokau Ma Jou ai mau abe kiani una wohonenge la ka idadi o nyawa ko manga ngoe wahitotiai Ma Jou ai himangoka.

¹² Ho Ma Jou wotemo wato, “Ngohi duru tisanangi unangika hiadono ahao tigorakiye de o horomati, de Ngohi tihigogere o kuaha ma gogogeroka abe kiani ona yamake abe yodiai duru ma rorahai de yotobalaku de manga buturungu ma gahumu. De ahi huhuloko gea wamake o lolaku ma utumu hoka onangoli angamoi una womahidoaka ka hiadono wohonenge.” De una gea iwietongo de o nyawa ma dorou manga doomuoka angamoi to ona manga howono womahitounaka. De ona gea una wahidemo Ma Jouika la manga howono waofi angamoi ona manga ngoe yatotilakuroka Ma Jou ai paretaika.