Yesaya 50 - Ma Jou ai Demo-demo o Totobelohoka

Nanga Mesia ai dodunguu moioli O Hitararono ma hidogo

⁴ Ma Jou o Yawe wohihiakunu ngohino la ka idadi ai hingahu ma demo tadofanga o nyawaika, de gea hiadono ngohi ka takunu taduhunu ona abe manga hininga de ma dubuhoka. O ngoru-ngorumiye wohitumomiki de wohiwangoro ngohino. De gea ahi ngauku wohiso la ka idadi duru totoihene to Una ai dodotokika.

⁵ Ma Jou o Yawe Una wohitemo ngohino de itararono ai demo, de wohiduhunu la hiadono ai demo ngohino gea duru tohigihene ho ko tilawanua de ko torehenua ai demoino.

⁶ Ho gea hiadono ahi porete tohidoaka onangika la ihipoha-poha, de ahi gotoaka tohidoaka onangika la hiadono yakiwuku ahi gumi. De ngaro duru ihiao itorou masara ko tomadatokua hiadono ona ihiobiri de ihihohedu de ko tomahinipo-niporua.

50:7-11 ko atailakouahi

⁷ De mangale ma titi Ma Jou o Yawe wohiduhunu ho ngohi ko tamaoua o himaleke. Ho ngohi ahi hiningaka de duru tomaputuhoka tato to Una ai mau dika tatobanii-niiki. De gea duru tohioriki de tonganono abe ko ihimalekua genangino.

⁸ De nako hiadono o nyawa ihitae ngohino, naga ngohioka Una gea abe wohidemo wato ko iwa ahi howono. Ho done onagona yotomoroini yoboaino la mimarihimanga de ihitae ngohino? Maraioka to ona manga demo ahao ihikawalimi dika!

⁹ Abeika, gea Ma Jou o Yawe Una ma hirete wohiduhunu ngohi, ho onagona ato bote ka idadi ihitae ngohino de yolaku? Ona gea ahao o binaaha dika yamake, abe imaketero hoka o nyawa manga kiahonanga o goguhu yaolomo hiadono duru awede-wederoka.

¹⁰ Ho nginioka onagona naga abe nia horomati itagi nanga Jou o Yaweika, de onagona naga abe niwigihene to Una ai Huhulokika? Abe nako nia hininga hokogea, ngaro niaohana o huha de o kangela nia wowangoka, de niamao o fufutuoka dika nigogere, masara ka idadi nimahinganono nanga Baluhu o Yawe ai romangika dika la Una winiduhunu. De koaho nimahidutuku dika nanga Jouika.

¹¹ Masara ngini abe naga nia hidee itorou ho niato niahikangela ahi nyawaika, koaho nimahidodiai done niruba! Abe ngini nia hidee gea imaketero hoka o uku niapake la niahiodiri ahi nyawaika. Ho gea ngohi ka idadi tinihingahu dika abe ahao tohikawalimi la ti ngini nia ukuino gea de ngini ma hirete inihiuku. De gea idadioka nia hohowono ma dubuho ahi giamoka de aino abe ma oraha ngini nirubauku!