Yesaya 5 - Ma Jou ai Demo-demo o Totobelohoka

Ma Jou o Yawe ai Angguru ma Redi

¹ De naa ngohi toigo tonyanyi o nyanyianga moi ma titi ahi olo, de tosanangi la ngini nitoihene ahi nyanyianga ma demoino. Abe naa ma titi ahi olo de to una ai angguru ma redi, de hokonaa ma demo. Ahi olo wato wodiai ai angguru ma redi, de gea imanoa o tonaka ma geleforino abe naga ma haki ipirini.

² De una ma tonaka gea wohidiaiohi abe ma hakaru waumoika de wobaiti irahai. Wohidiai ibooto de ahao o angguru ma roehe duru ma rorahai womangiriki de wodatomo gea ma tonakuku. De ai redi gea ma goronaka de o gogoana ma tau wodiai de ma digi-digino wodiai o angguru ma hofoko ma duduuku o hakaruino. De ai hidiai wabootoka de wododamaa ma hasili o angguru ma muti-mutiti. Masara ipahaino de ma muti-mutiti ko wamakeua, masara ma suka-suka dika wamake o angguru ma hofokino. De hokogea ahi nyanyianga tonyanyi nginika ma titi ahi olo ai redi.

³ Ho naa o redi ma dutu woigo winileha ngini abe nimanoa o Yudea ma tonakoka de to ena ma kota ma mayo o Yerusaleemoka. De gea winileha wato, “Ngini naa niihenoka ahi gurubungu ma ade-ade, ho nia putuhu sarakia? Ma howono imanoa o kiaka hiadono ma hofoko ma suka-suka dika tamake? Gea imanoa Ngohi o redi ma dutuoka, ekola ahi angguru ma redioka abe ihowono? Nako ngini sarakia?”

⁴ “De Ngohi ka o kiali ka idadi todiai la tobaliara irahai ahi redi la ma hasili irahai? De adodoa ho ahi redi ihihofoko de ihihidoaka o fuhuku ma hofoko ma suka-suka? Angamoi Ngohi duru tonganono ma hofoko ma muti-mutiti genangino.”

⁵ “Ho naa Ngohi tinihingahu nginika abe tohideeoka ma titi ahi redika. Abe to ena ma dadaduhu takokikilianga la ma redi iwedere. Ho o aewani ahao iboaino de yodoko-doko ma angguru ma roehe hiadono ibinaahaka.”

⁶ “De hokogea ahi redi tohidadi la imaketero hoka o fongana dika. Abe ko moiua yapaliara eko yabaiti ma tonaka, de ma ruruubu ilio hiadono awoongo ma redi ma dingii. De Ngohi ahao tahuloko ma lobi-lobi la ibootohi o awana ihidoaka dau ma tonakuku gea.” Hokogea ahi olo o redi ma dutu ai demo nginika ma titi ai redi.

⁷ De ai ade-ade ma demo hokogea angamoi ihidumutu ngini Ma Jou o Yawe Wokokurutiye ai nyawaika! Abe ngini naa nidadioka hoka to Una ai angguru ma redi. Ngini o Isiraele ma nyawa de abe nimanoa o Yudea ma tonakoka, duru ngini abe winihiromanga wato ai redi abe duru wodora! Ho Una duru wongano-nganono la wamake o totiai ma hasili nginioka de aino. Masara ai nganganono gea ko idadiuali ho wamake dika o gangamo nginioka. De Una duru wonganono winimake abe ngini nimakao itiai de nia gogianongoru, masara abe wamake gea o nyawa yopoa-poaka ma titi nimahiketehikokangela! Ho ma hasili abe wamake nginioka gea ka ma suka-suka dika de ko iwa ma muti-mutiti!

5:18-23 ko atailakouahi

¹⁸ Ho naa tinihitiari abe onagona dika nginioka nitobadiai ma dorou nia wowangoka. Ngini niapake nia buturungu la niahowo-howono masara ko idadiua niatingakika nia howonino gea, ka ihikaika ininii-niiki. Ho ahao o bobinaaha dika inidodamaa abe ma oraha nia gahe adonoka.

¹⁹ Abe ngini utu niwimia-mia de hiadono niwidimoaka Ma Jou o Yaweika niato, “Abeika Una womasikaa la wonahimatoko ai kuaha ngoneino! Kiani womataiti woaguru la ngone ka idadi hamake ai bobuturungu! Duru hoigo hohioriki abe ngone o Isiraele nanga Koano ai hidee hokokia!” Hokogea niwidimoaka Ma Jou o Yaweika!

²⁰ De o bobinaaha dika inidodamaa ngini abe o kia dika naga ma rorahai de gea nihiromanga ma dorou dika, de o kia naga ma dorou de gea niato ma rorahai. Ngini nihikawalimi ma romanga la niato ma dararono idadi o fufutu de ma muti-mutiti idadi ma suka-suka.

²¹ De ngini onagona dika abe nimaetongo de nimahiromanga o sosawaro ma nyawa de naga de nia tobahiorikoka, nginioo o bobinaaha dika naga inidodamaa.

^22-23 De nginioli abe nijago niokere o daluku, abe nimagorakiye niato nako de o nyawa utu ma ka nginiohi ma daluku ilamoko ka idadi niokeruku. De abe ngini ma oraha niaurusu o nyawa manga howono de nisanangi niodafongo o tiwi ona yahowo-howonino la iti niaputuhu niato ona ko yahowonua. Masara ona abe ko iwa manga howono, onangika nisanangi niahohowono onangika. De nginioo abe nia datoro hokogea ka o bobinaaha dika inidodamaa ma oraha nia gahe adonoka.