Yesaya 49 - Ma Jou ai Demo-demo o Totobelohoka

49:1-18 ko atailakouahi Ma Jou ai hidee la koaho hokokia o Isiraele ma nyawa yowango

¹ De Ma Jou ai Huhuloko wotemo wato, “Abeika nitotoihene, abe ngini nimanoa o nuu-nuuhoka de nginioo abe nia tonaka kohagurutika. Ngohi naa ko tomaboauahi de o Yawe wohiahokoka, abe Ngohi nagahi ngohi meme ami pokoroka de wofetongo ahi romanga la wohihitagongo moi ma karajaanga Ngohino.

² De Una wohihidadi la ahi uru duru idoto abe imaketero hoka o humarangoli ma doto, de wohihitatoko to Una ai giama ma hoatoka. Ho Ngohi wohihidadi hoka ai toimi ma doto, de o hihiipi ma ngioka Una wohigoana.”

³ De Ma Jou o Yawe wohitemo Ngohino wato, “Ngona o Isiraele ai toforauku, Ngona nodadioka ahi Huhuloko, de Ngonaino ahao Ngohi tomahimatoko ahi medebini ma dararono o nyawaika.”

⁴ Masara gea Ngohi toihenino de topaluhu tato, “Masara ngaro tokarajaanga ma dubuho ma ka parahaja dika! Abe ahi gahauku ihupuoka de ahi karajaanga gea duru de ahi buturungu ma gahumu masara ma hasili duru ko kia-kiaua tamake.” De ngaro hokogea ahi hininga, masara tohioriki abe Ma Jou o Yawe ahao wohihibalaha de ma hibalaha abe duru itaana, abe Una ahao wohihidoaka ma utumu hokokia dika imakiniiki de ahi karajaanga abe todiaioka.

⁵ De Ma Jou o Yawe, Una gea abe wohihidadi to Ngohi ngohi meme ami pokoroka la ahao todadi to Una ai Huhuloko. De gea ai hininga la wokarajaanga ahi badangino hiadono o Yakubu ai totoforauku yokokilio Unangika. La gea o Isiraele ma nyawa tahidotoomuino Unangino. De hokogea Una wohihitagongo la Ngohi tamake o horomati o Yawe ai himangoka, angamoi to Ngohi ahi buturungu gea duru ihititi Ma Jouino.

⁶ De naa Una Ma Jou o Yawe wotemo Ngohino wato, “Igoungu tonihitagongo la o Isiraele ma nyawa nahigilio la ona yokokilio Ngohino, masara ka genangua dika ani tagongo tonihidoaka. Abe nagali tonihitagongo la nodadi hoka o hilo ma dararono abe nahitararono ma gou-goungu o dunia ma nyawa mata-mataika, la ngaro o nyawa yomanoa o tonaka kohagurutika masara mata-mata ihioriki abe Ngohi ka idadi taduhunu ona manga howo-howonino.”

⁷ De o Yawe abe Una o Isiraele ma nyawa manga gogoana de manga Koano wokokurutiye, naga to Una ai demo Unangika abe o dunia ma nyawa iwiemono de iwioluku, Unangika abe wodadi o kokoano manga huhuloko. De hokonaa Ma Jou o Yawe ai demo Unangika, wato, “Ahao o kokoano inimake noboaino de inihidoaka o horomati Ngonaika, de o popareta manga hohidimono onangoo yomamotumuku la inihoromati, angamoi Ngohi o Yawe toniirikoka. Abe Ngohi tatobagou-goungu ahi demoino de todadi o Isiraele ma nyawa manga koano tokokurutiye, de Ngohi naa abe toniiriki Ngona.”

⁸ De nagahi o Yawe ai demo Unangika wato, “Ahao nako ma oraha adonoka abe tomaputuhu la ahi owa itagi Ngonaika de gea tonihidoaka ani gogahoko. De nako o duduhunu ma wange adonoka de toniduhunu Ngonaika. Abe gea tonigoana de tonihidadi o hidemo ma nyawa abe Ngona nao itiai to Ngohi ahi behehongo o Isiraele ma nyawa mata-mataika. De nagali toniduhunu la manga tonaka ilio abe hoka ma dihirainoli, angamoi ma dekanino manga tonaka gea ka ma homoa dika ma titi o nyawa ko yaiwa genangoka, masara ahao ka idadi yoboainoli de yomanoa manga tonakoka gea.”

⁹ “De Ngona ahao nahuloko onangika abe yomanoa o bui ma tau ma goronaka nato, ‘Ngini nihupuoka!’ De abe yowango o fufutuoka dika Ngona ahao napareta onangika nato, ‘Nimahiburahiye de nihupu ma rorahaiika!’ De ona ahao ko iwa manga kuranga, abe ngaro ma oraha yotagi-tagi masara ka idadi yamake manga inomo o ngekomo ma datekoka. De o loku-lokuoka abe ma dihiraino ko kia-kiaua yamake masara ahao ka idadi yomaino-inomo genangoka.

¹⁰ De o nyawa gea ahao ko yohafinua de manga ngomaha ko yodudungua, de ngaro o wange ma hauku masara ko yaruwaeokaua onangika, angamoi Ngohi naa tapake de ahi hininga ma doraino onangika, ho tahihira-hira o jojobuubuika la ka idadi yomamaata.

¹¹ De ma oraha gea de Ngohi ahao tahidiai manga ngekomo de gea ko iwa ma dudukoro, abe ahi loku mata-mata tahitipokouku de ma dola tagorakiye la idadi o ngekomo ma rorahai.

¹² Abeika, ma oraha gea de to Ngohi ahi nyawa ahao ma tonaka kohagurutino yokokiboa, abe utu daku de yauku yoboa de utu o wange ma dumunihaino yoboaino, de nagahi utuoli o Sinimi ma tonakoka de yaino yoboaino manga tonakino.” De hokogea Ma Jou o Yawe ai demo.

¹³ Ho abeika o Yawe ai lalaru to Una ai nyawaika! De hokokia ma amoko to Una ai dora ma hiokoo abe itagi onangika manga hininga duru ihuha! Ho mangale ma titi to Una ai hininga ma rorahai ai nyawaika ho koaho o dunia de ma dola mata-mata iwihinere Unangika! Abe koaho o dihanga yohagaaga ma titi o gogaragoino, de o dunia ka idadi imorene, de o loku-loku yopoa-poaka de yonyanyi ma titi ma garagoino!

¹⁴ Masara o Yerusaleeme ma nyawa nagahi manga bobeto ma demo ato, “Koua, o Yawe wonanoaka, nanga Baluhu Una wonawohangoka ngone naa!”

¹⁵ De Una wapaluhu manga demo wato, “Duru hokogenangua! De naa tinileha, abe naga o ngofeka momatengo de ami ngofaka ka wohuhuohi de gea muna ka idadi miwohangika? Ko idadiua! Eko ka idadi momadumungu la ufa ami hininga ma dora itagi unangika? Koua! De naa Ngohi tinihingahu abe ngaro naga o ngofeka abe ami ngofaka miwohangika masara Ngohi naa duru ko idadiua tiniwohanga ngini!

¹⁶ Angamoi abeika, ti ngini nia romanga tohitulihukuoka ahi giama ma hoatika, de ka ihikaika tongano-nganono nia kota ma dadaduhu abe inihigilolitino ngini.

¹⁷ De ko itedekanokaua de ti ngini nia ngofa-ngofaka yolioino nginino, de ona abe iningino la inihibinaaha ona ahao ininoaika de ko iniruwaeokaua.

¹⁸ Ho abeika niolega arihonongaika! Angamoi nia ngofa-ngofaka yokokilio de yomatoomuino nginioka. De naa Ngohi o Yawe duru tagou-goungu tinihingahu de tomahikoboto tato, ‘Nia ngofa-ngofaka gea ahao yodadi ti ngini nia garago ma titi abe duru niadogarago onangika! Abe ngini ahao nimaketero hoka o ngofeka ami gogilaka ma wangeoka abe momagaya-gaya de o hakaru ileto-letongo hiadono duru modogarago enangika, angamoi ngini ahao duru nigogarago ma titi nia ngofa-ngofaka yokokilio nginino!’ De hokogea ahi hingahu ma gou-goungu abe ahao kiani idadi nginioka.” De Ma Jou o Yawe ai demo ai nyawaika hokogea.