Yesaya 42 - Ma Jou ai Demo-demo o Totobelohoka

42:1-7 ko atailakouahi Ma Jou wihitagongo moi ai Huhulokika

¹ De Ma Jou o Yawe wotemo wato, “Abeika naa Una ahi Huhuloko, Una abe Ngohi tihiputurungu. Abe Ngohi tiirikoka Una de duru tidosanangi Unangika gea. De Ngohi tihidoakoka ahi Womaha Unangika la Una duru de ai kuahaka, de Una ahao wahingahu-ngahu o dutu mata-mataika ma titi abe ma ngekomo hokokia la ka idadi ona yamake to Ngohi ahi totiai onangika.

² De to Una ai demoino de ko yomaketeribuutua Una de o nyawa, de ko wabobanaratua onangika. De nako o nyawa manga ngoe manga hima-himangoka de Una ko womahagaagaua, angamoi ko hokogenangua to Una ai hininga.

³ De ngaro womatengo abe iwihidakadunu de ai hininga ma huha masara ahi Huhuloko gea wibole-bole dika unangika. De ngaro womatengo ai nganganono ka ietekohi imaketero hoka o uku ma dokara ma eteteke, masara ahi Huhuloko ko wahonengua abe una gea ai nganganono, masara ka wihigaro dika unangika la ai nganganono ka ifero. De ona gea ahao yamake to Ngohi ahi totiai ma titi abe ahi Huhuloko ai hininga ma bole-boleino gea.

⁴ De Una gea ka ihikaika woaguru ai himangika de ko worehenua, abe ko womatogumua ka hiadono o totiai duru ilaku o dunia ma amokika. De ngaro o tonaka ma ago-agomoka de hiadono ma nuu-nuuhika masara mata-mataika iwidodamaa de yomahinganono to Una ai hiaturu ma putuhu.”

⁵ De hokonaa Ma Jou o Yawe ai demo, abe Una ma dihanga wotulaada de wahitauru la wakelenga ma ngioka. De Unangoo abe o dunia naa de ma dola mata-mataika wotulaada. Una gea abe wonahidoaka nanga womaha ngone o nyawa mata-mataino la ka idadi howomaha, de abe mata-mataika naga de ma wowangoka, gea to ena ma wowango ihititi duru Unangoka!

⁶ Ho Una gea abe wotemo ai Huhulokika wato, “Ngohi o Yawe, de ma titi ahi totiaiino ho Ngohi tonihitagongo moi Ngonaika. Abe Ngohi tonihihira-hira de tonigoana Ngonaika. De ani tagongo gea tonihidadi o hidemo ma nyawa abe Ngona nao itiai to Ngohi ahi behehongo o nyawa mata-mataika. Abe gea Ngona nodadi hoka o dararono o dunia ma nyawa mata-mataika la ka idadi ihimake Ngohi.

⁷ De abe ona manga lako yahorioka gea nahitogumu la ka idadi yomahioriki, de onagona dika yabuioka o bui ma tau ma goronaka ho yomanoa o fufutuoka dika, ona ka idadi nahihohe de nahihupu ma rorahaiika.” Hokogea Ma Jou o Yawe wihuloko de wihitagongo ai Huhulokika.